រយៈពេល២សប្តាហ៍ ប្រជាពលរដ្ឋដែលបានទៅចុះឈ្មោះបោះឆ្នោតថ្មីមានជាង១៦ម៉ឺននាក់
នៅក្នុងរយៈពេល២សប្តាហ៍ ពោល គឺចាប់ពីថ្ងៃទី១២ ខែតុលា ដល់ថ្ងៃទី២៧ ខែតុលា ឆ្នាំ២០២១ ប្រជាពលរដ្ឋដែលបានទៅចុះឈ្មោះបោះឆ្នោតថ្មីមានចំនួនជាង១៦ម៉ឺន៣ពាន់នាក់។ នេះបើតាមការប្រកាសឱ្យដឹងរបស់គណៈកម្មាធិការជាតិរៀបចំការបោះឆ្នោត(គ.ជ.ប)នៅយប់ថ្ងៃទី២៨ ខែតុលា ឆ្នាំ២០២១។ ជាមួយនឹងចំនួនអ្នកចុះឈ្មោះខ្ទង់ម៉ឺននាក់នេះ គ.ជ.ប ក៏បានគូសបញ្ជាក់ឱ្យដឹងដែរថា ដំណើរការពិនិត្យឈ្មោះ និងចុះឈ្មោះបោះឆ្នោតបានប្រព្រឹត្តទៅល្អ ត្បិតមានការរំខានល្អៗដោយទឹកជំនន់ក៏ដោយ។
ចុះផ្សាយនៅថ្ងៃ៖
ស្តាប់ - ០១:៥៨
គណៈកម្មាធិការជាតិរៀបចំការបោះឆ្នោត(គ.ជ.ប) បានគូសបញ្ជាក់ឱ្យដឹងថា ចំនួនប្រជាពលរដ្ឋថ្មីដែលមកចុះឈ្មោះបោះឆ្នោតមាន១៦៣,៥៤២នាក់ ហើយប្រជាពលរដ្ឋដែលត្រូវលុបឈ្មោះចេញមានចំនួនជិត១០ម៉ឺននាក់(៩១,៤១៤នាក់) ប្រជាពលរដ្ឋមកកែតម្រូវឈ្មោះ និងទិន្នន័យមានចំនួនជាង៤ម៉ឺននាក់(៤៧,១៣១នាក់) និងប្រជាពលរដ្ឋដែលផ្ទេរចូលមានចំនួនជាង៥ម៉ឺននាក់(៥០,៤៤៣នាក់)។ ទន្ទឹមគ្នានេះ គណៈកម្មាធិការជាតិរៀបចំការបោះឆ្នោត(គ.ជ.ប) ក៏បានអះអាងថា ដំណើរការពិនិត្យឈ្មោះ និងចុះឈ្មោះបោះឆ្នោតបានប្រព្រឹត្តដោយរលូន មានសន្តិសុខ សុវត្ថិភាព និងសណ្តាប់ធ្នាប់ល្អ។
ក៏ប៉ុន្តែទឹកជំនន់នាពេលថ្មីៗនេះ ក៏បានបង្កការរំខានខ្លះៗដែរ។ ជាក់ស្តែង សាលាឃុំ សង្កាត់ខ្លះត្រូវប្តូរការិយាល័យមកទីទួលសុវត្ថិភាព ហើយសម្ភារ បរិក្ខារមួយចំនួនបានខូច គាំង ឬដំណើរការអាក់រអួល។ ចំណែក តំបន់ខ្លះ មានបញ្ហារអាក់រអួលផ្នែកប្រព័ន្ធអ៊ីនធើណែតសម្រាប់បញ្ជូនទិន្នន័យទៅគ.ជ.ប។ នេះបើតាមការអះអាងរបស់គណៈកម្មាធិការជាតិរៀបចំការបោះឆ្នោត(គ.ជ.ប)ដដែល។
សូមបញ្ជាក់ថា សម្រាប់ឆ្នាំ២០២១នេះ ការពិនិត្យបញ្ជីឈ្មោះ និងការចុះឈ្មោះបោះឆ្នោតថ្មីបានចាប់ផ្តើមឡើងពីថ្ងៃទី១២ ខែតុលា រហូតដល់ថ្ងៃទី៣០ ខែវិច្ឆិកា ឆ្នាំ២០២១ ដែលមានរយៈពេល៥០ថ្ងៃ។ គណៈកម្មាធិការជាតិរៀបចំការបោះឆ្នោត(គ.ជ.ប)បានអះអាងថា ដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតនេះ គឺធ្វើឡើងរៀងរាល់ថ្ងៃតែម្តង រួមទាំងថ្ងៃសៅរ៍ និងថ្ងៃអាទិត្យផងដែរ។
ជាមួយគ្នានេះ គណៈកម្មាធិការជាតិរៀបចំការបោះឆ្នោត(គ.ជ.ប)ក៏បានបញ្ជាក់ឱ្យដឹងដែរថា ចាប់ពីថ្ងៃទី២៧ ខែតុលាដល់ថ្ងៃទី២១ ខែវិច្ឆិកា ក្រុមការងារចុះឈ្មោះបោះឆ្នោតនឹងដាក់ការិយាល័យចុះឈ្មោះទៅតាមភូមិមួយចំនួននៅក្នុងឃុំ សង្កាត់នានា។ ប៉ុន្តែ បើសិនគ.ជ.ប សង្កេតឃើញថា ការចុះឈ្មោះតាមភូមិមានកំណើនខ្ពស់ នោះ គ.ជ.ប នឹងពិចារណាពន្យាពេលវេលាចុះឈ្មោះបោះឆ្នោតបន្ថែមទៀតតាមភូមិ និងកាត់បន្ថយពេលវេលាចុះឈ្មោះបោះឆ្នោតនៅសាលាឃុំ សង្កាត់វិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ