ជាប្រធានអាស៊ាន កម្ពុជាប្តេជ្ញាដោះស្រាយវិបត្តិជាប់គាំងនយោបាយនៅភូមា
កម្ពុជា ក្នុងនាមជាប្រធានអាស៊ានប្តូរវេនបានប្តេជ្ញាដោះស្រាយវិបត្តិជាប់គាំងនយោបាយនៅភូមាដែលជាបញ្ហាក្តៅមួយនៅក្នុងតំបន់។ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា បានគូសបញ្ជាក់យ៉ាងដូច្នេះជាមួយទីភ្នាក់ងារសារព័ត៌មានReuter នាថ្ងៃទី២៨ ខែតុលា។ លោកលើកឡើងទៀតថា កម្ពុជាត្រៀមតែងតាំងអន្តរការីពិសេស សម្រាប់បន្តការងារពីអន្តរការីពិសេសបច្ចុប្បន្ន នៅដើមឆ្នាំ២០២២ខាងមុខ។
ចុះផ្សាយនៅថ្ងៃ៖
ស្តាប់ - ០២:៥២
ក្រោយភូមាធ្វើពហិការ កិច្ចប្រជុំកំពូលអាស៊ានលើកទី៣៨-៣៩ កម្ពុជា ក្នុងនាមជាប្រធានអាស៊ានចាប់ពីខែមករា ឆ្នាំ២០២២ខាងមុខនេះ កម្ពុជានឹងប្តេជ្ញាជំរុញឱ្យមានកិច្ចសន្ទនាបើកចំហរជាមួយមេដឹកនាំភូមាលោក មីន អោងឡាំង ក៏ដូចជាព្យាយាមដោះស្រាយនូវវិបត្តិជាប់គាំងនយោបាយដ៏រ៉ាំរ៉ៃនៅមីយ៉ាន់ម៉ាផងដែរ។ នេះបើតាមការលើកឡើងរបស់ រដ្ឋមន្ត្រីក្រសួងបរទេសកម្ពុជាលោក ប្រាក់ សុខុនជាមួយសារព័ត៌មានរ៉យទ័រកាលពីថ្ងៃទី២៨ តុលាកន្លងទៅ។
លោក ប្រាក់ សុខុន បានលើកឡើងថា ជាត្រីវិស័យក្នុងឋានៈជាប្រធានអាស៊ានឆ្នាំ២០២២ កម្ពុជាក៏នឹងត្រៀមតែងតាំងអន្តរការីពិសេស សម្រាប់បន្តការងារពីអន្តរការីពិសេសនាពេលបច្ចុប្បន្ន ក្នុងការដោះស្រាយបញ្ហានយោបាយជាមួយភូមាប្រកបដោយប្រសិទ្ធភាព។ តែយ៉ាងណា កម្ពុជានៅមិនទាន់អាចបញ្ជាក់អំពីឥស្សរជនរូបណាមួយដែលនឹងត្រូវតែងតាំងជាអន្តរការីពិសេសរបស់កម្ពុជាសម្រាប់បញ្ហាភូមានៅឡើយនោះទេ។
បើតាម រដ្ឋមន្ត្រីក្រសួងការបរទេសកម្ពុជារូបនេះ កម្ពុជាក៏ដូចជាសមាជិកអាស៊ាន៨ផ្សេងទៀត ចង់ជួយភូមាឱ្យចៀសផុតពីសោកនាកម្មបន្តទៀត ខណៈប្រទេសមួយនេះកំពុងស្ថិតនៅមាត់ជ្រោះនៃសង្គ្រាមស៊ីវិលទៅហើយ បូកផ្សំជាមួយនឹងបញ្ហាប្រឈមដ៏ធ្ងន់ធ្ងរលើផ្នែកសេដ្ឋកិច្ច សុខភាព និងមនុស្សធម៌ថែមទៀត។
តែយ៉ាងណា ប្រមុខការទូតកម្ពុជាបានគូសបញ្ជាក់ថា ច្រកចេញនៃវិបត្តិនៅភូមា គឺត្រូវពឹងផ្អែកយ៉ាងសំខាន់ទៅលើតួអង្គនយោបាននៅក្នុងប្រទេសភូមាផ្ទាល់តែម្តង ពោលគឺត្រូវដោះស្រាយវិបត្តិរបស់ខ្លួនឱ្យច្រើនជាងការជួយពីខាងក្រៅ។ ទោះបីជាយ៉ាងនេះក្តី កម្ពុជាក៏ត្រៀមដោះស្រាយ និងធ្វើនូវអ្វីដែលកម្ពុជាអាចធ្វើបាន ដើម្បីជួយដល់កិច្ចខិតខំប្រឹងប្រែងមួយនេះ។
សូមរំលឹកថា ភូមាបានធ្វើពហិការមិនចូលរួមកិច្ចប្រជុំកំពូលអាស៊ាន ក្រោយប្រទេសប្រ៊ុយណេដែលជាប្រធានអាស៊ានក្នុងឆ្នាំនេះ មិនបានអញ្ជើញមេដឹកនាំភូមាលោក មីន អោងឡាំងឱ្យចូលរួមកិច្ចប្រជុំនោះទេ។ ដោយប្រ៊ុយណេបានអញ្ចើញតំណាងមិនមែនជាអ្នកនយោបាយមកពីភូមាជំនួសកន្លែងមេដឹកនាំយោធាទៅវិញ។
ជាក់ស្តែង ការមិនអញ្ជើញមេដឹកនាំភូមារូបនេះ ធ្វើឡើងក្រោយពេលរូបលោក បដិសេធមិនអនុញ្ញាតឱ្យបេសកជនពិសេសរបស់អាស៊ាន ដែលជារដ្ឋមន្ត្រីការបរទេសទីពីររបស់ប្រ៊ុយណេ លោក Erywan Yusof ជួបជាមួយលោកស្រី Aung San Suu Kyi និងមេដឹកនាំដទៃទៀតដែលត្រូវបានឃុំខ្លួនចាប់តាំងពីការឡើងកាន់អំណាចកាលពីថ្ងៃទី១ខែកុម្ភៈ និងដោយសារ ការមិនគោរពកិច្ចសន្យារបស់ឧត្តមសេនីយន៍យោធារូបនេះ ជាមួយមេដឹកនាំអាស៊ានកាលពីខែមេសាកន្លងមកជុំវិញការឯកភាពគ្នាចំនួនប្រាំចំណុច។
គូសបញ្ជាក់ផងដែរ កិច្ចព្រមព្រៀងជាឯកច្ឆន្ទ៥ចំណុចរបស់អាស៊ានរួមមាន៖ ការបញ្ឈប់អំពើហិង្សាភ្លាមៗ និងការអនុវត្តការអត់ធ្មត់ជាអតិបរមា, ការសន្ទនារវាងភាគីពាក់ព័ន្ធទាំងអស់ដើម្បីស្វែងរកដំណោះស្រាយដោយសន្តិវិធី, តែងតាំងបេសកជនពិសេសដោយប្រធានអាស៊ានដើម្បីជួយសម្រួលដល់ការសម្រុះសម្រួលក្នុងដំណើរការសន្ទនា និងបើកផ្លូវសម្រាប់ជំនួយមនុស្សធម៌ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ