បាត់ដំបង៖ កម្ពស់ទឹកស្ទឹងសង្កែចាប់ផ្តើមស្រកវិញជាបណ្តើរៗមកនៅជាង១៣ម៉ែត្រ
កម្ពស់ទឹកស្ទឹងសង្កែក្រុងបាត់ដំបងចាប់ផ្តើមស្រកវិញជាបណ្តើរៗ មកនៅជាង១៣ម៉ែត្រេ បន្ទាប់ពីកើនដល់កម្ពស់១៤ម៉ែត្រកាលពីយប់ថ្ងៃសៅរ៍ទី១៦តុលាម្សិលមិញ។ នេះបើតាមការបញ្ជាក់ពីលោកសុខ លូ អភិបាលខេត្តបាត់ដំបង ដែលបានថ្លែងប្រាប់វិទ្យុបារាំងអន្ដរជាតិ RFI នៅថ្ងៃអាទិត្យ ទី១៧តុលានេះ។ មុននឹងស្រកចុះបន្តិចនាព្រឹកនេះ ទឹកស្ទឹងសង្កែបានហូរចាក់ទៅក្នុងក្រុង បណ្តាលឲ្យជន់លិចផ្លូវមួយចំនួនក្នុងក្រុងបាត់ដំបងនៅព្រឹកថ្ងៃអាទិត្យនេះ។
ចុះផ្សាយនៅថ្ងៃ៖
ស្តាប់ - ០១:៣៣
ភ្លៀងធ្លាក់ច្រើន២ថ្ងៃជាប់គ្នានៅផ្នែកខាងលើនៃស្រុកសំឡូត បណ្តាលឲ្យស្ទឹងសង្កែចាប់ផ្តើមកើនកម្ពស់រហូតដល់១៤ម៉ែត្រ។ ភ្លាមៗ រដ្ឋបាលខេត្តបាត់ដំបងកាលពីថ្ងៃសុក្រ ក៏បានជូនដំណឹងឲ្យប្រជាពលរដ្ឋមានការប្រុងប្រយ័ត្នខ្ពស់ ដើម្បីបញ្ចៀសនូវហានិភ័យណាមួយជាយថាហេតុ។ ជាពិសេសសម្រាប់ប្រជាពលរដ្ឋដែលរស់នៅតាមបណ្តោយដងស្ទឹងទាំងអស់ក្នុងខេត្តបាត់ដំបង។
លោកសុខ លូ អភិបាលខេត្តបាត់ដំបង បានបញ្ជាក់ប្រាប់វិទ្យុបារាំងអន្តរជាតិនៅថ្ងៃអាទិត្យទី១៧តុលាថា ជំនន់ទឹកស្ទឹងសង្កែ បានហូរចូលមកក្នុងក្រុងបាត់ដំបង បណ្តាលឲ្យប៉ះពាល់ហេដ្ឋារចនាសម្ព័ន្ធផ្លូវ ផ្ទះសម្បែងប្រជាពលរដ្ឋមួយចំនួនក្នុងទីរួមខេត្ត និងប្រជាពលរដ្ឋមួយចំនួនទៀតរស់នៅតាមដងស្ទឹង ដែលបង្កការខូចខាតបន្តិចបន្តួចតាំងពីល្ងាចថ្ងៃទី១៦តុលា។
បើតាមអភិបាលខេត្តរូបនេះ អាជ្ញាធរក៏បានអន្តរាគមន៍ចុះទៅបិទទំនប់មួយចំនួននៅតាមដងស្ទឹង ក្នុងន័យបង្ការទឹកហូរចាក់មកខ្លាំងចូលមកតំបន់ទំនាបបន្ថែមទៀត។
យ៉ាងណាមិញ លោកសុខ លូ បញ្ជាក់បន្ថែមទៀតថា ជំនន់ទឹកក្នុងក្រុងមានសភាពរាក់នៅឡើយ ហើយក៏ចាប់ផ្តើមស្រកទៅវិញជាបណើ្តរៗ ខណៈដែលកម្ពស់ទឹកស្ទឹងសង្កែក៏ចាប់ផ្តើមស្រកជាង១ម៉ែត្រមកវិញដែរនោះ។ ដូច្នេះលោករំពឹងថា ជំនន់ទឹកនេះនឹងអាចស្រកទៅវិញឆាប់ៗក្នុងពេលប៉ុន្មានថ្ងៃខាងមុខ។
សូមជម្រាបជូនថា ជំនន់ទឹកភ្លៀងនៅខេត្តបាត់ដំបងនាពេលនេះ កើតឡើងស្របពេលដែលទូទាំងប្រទេសកម្ពុជា កំពុងទទួលរងឥទ្ធិពលមូសុងនិរតីខ្លាំង និងប្រព័ន្ធសម្ពាធទាប ភ្ជាប់ជាមួយវិសម្ពាធ ដែលស្ថិតក្នុងសមុទ្រចិនខាងត្បូង។ បើតាមសេចក្ដីជូនដំណឹងរបស់ក្រសួងធនធានទឹក ស្ថានភាពនេះ ធ្វើឲ្យមានភ្លៀងធ្លាក់ច្រើននៅទូទាំងប្រទេសកម្ពុជា រហូតដល់ថ្ងៃទី១៩ខែតុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ