លោកកឹម សុខា ជួបមន្ត្រីទូតធំៗជជែកពីកិច្ចព្រមព្រៀងទីក្រុងប៉ារីស
លោកកឹម សុខា ប្រធាននៃអតីតគណបក្សសង្គ្រោះជាតិបានចាប់ផ្តើមជួបជាមួយមន្ត្រីទូតអន្តរជាតិធំៗនៅកម្ពុជា ដោយនិយាយរៀបរាប់ពីកិច្ចព្រមព្រៀងសន្ធិសញ្ញាទីក្រុងប៉ារីស២៣តុលា។ ត្រឹមរយៈពេល៣ថ្ងៃប៉ុណ្ណោះ លោកកឹម សុខា បានជួបនិយាយពីបញ្ហាកិច្ចព្រៀមព្រៀងសន្ធិសញ្ញាទីក្រុងប៉ារីស ជាមួយមន្ត្រីទូតអន្តរជាតិធំៗចំនួន២ គឺសហភាពអ៊ឺរ៉ុប និងអូស្ត្រាលី នៅទន្ទឹមដែលខួបលើកទី៣០នៃកិច្ចព្រមព្រៀងទីក្រុងប៉ារីស នឹងមកដល់នៅ១០ថ្ងៃខាងមុខ។
ចុះផ្សាយនៅថ្ងៃ៖
ស្តាប់ - ០១:៥៣
លោកកឹម សុខា នៅថ្ងៃអង្គារនេះ បានជួបជាមួយឯកអគ្គរាជទូតអូស្ត្រាលី ពិសារអាហារពេលព្រឹកនៅនិវេសដ្ឋានទូតអូស្ត្រាលី ដោយពិភាក្សាលើបញ្ហាមួយចំនួន។ ជាមួយឯកអគ្គរាជទូតអូស្ត្រាលី លោក Pablo Kang លោកកឹម សុខា បានលើកឡើងពីការប្រកាន់យកលទ្ធិប្រជាធិបតេយ្យ សេរី ពហុបក្សជឿនលឿនរបស់អូស្រា្តលី និងជាពិសេសការលើកឡើងពីកិច្ចព្រមពៀងសន្ធិសញ្ញាទីក្រុងប៉ារីស ដែលជាខួបលើកទី៣០ឆ្នាំ នៅថ្ងៃទី២៣តុលាខាងមុខ។
សម្រាប់កិច្ចព្រមព្រៀងសន្ធិសញ្ញាទីក្រុងប៉ារីស លោកកឹម សុខា បានលើកឡើងថា អូស្ត្រាលីជាប្រទេសដែលចូលរួមយ៉ាងសកម្មជួយកម្ពុជាក្នុងការបង្កើតនិងអនុវត្តន៍នូវកិច្ចព្រមព្រៀងមួយនេះតាំងពីឆ្នាំ១៩៩១មក។ ដូច្នេះប្រធានអតីតគណបក្សប្រឆាំងរូបនេះ នៅតែសង្ឃឹមថា ប្រទេសដែលប្រកាន់យកនូវលទ្ធិប្រជាធិបតេយ្យមួយនេះ នៅតែចង់ឃើញ និងជួយដល់ប្រជាពលរដ្ឋខ្មែរឲ្យទទួលបាននូវអ្វីដែលស្របតាមស្មារតីនៃកិច្ចព្រមព្រៀងទីក្រុងប៉ារីសនេះ ក៏ដូចជារដ្ឋធម្មនុញ្ញកម្ពុជា។
ក្រៅតែពីជំនួបជាមួយភាគីអូស្រ្តាលី លោកកឹម សុខា កាលពីថ្ងៃទី១១តុលាកន្លងទៅ ក៏បានលើកយកកិច្ចព្រមព្រៀងសន្ធិសញ្ញាទីក្រុងប៉ារីស ទៅពិភាក្សាជាមួយភាគីរដ្ឋទូតសហភាពអ៊ឺរ៉ុបផងដែរ។ ក្នុងជំនួបជាមួយលោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំកម្ពុជា លោកកឹម សុខា បានអរគុណពីការយកចិត្តទុកដាក់នៃបណ្តាប្រទេសមួយចំនួន ជុំវិញស្មារតីនៃកិច្ចព្រមព្រៀងសន្ធិសញ្ញាទីក្រុងប៉ារីសនេះ។
គួរបញ្ជាក់ថា កិច្ចព្រមព្រៀងសន្ធិសញ្ញាទីក្រុងប៉ារីស ជាកិច្ចព្រមព្រៀងក្នុងការឈានទៅបញ្ចប់សង្រ្គាមស៊ីវិលរ៉ាំរ៉ៃនៅកម្ពុជា ដោយមានការទទួលស្គាល់ពីភាគីជាប្រទេសនិងអង្គការអន្តរជាតិ។ ហើយនៅឆ្នាំ២០២១ កិច្ចព្រមព្រៀងសន្ធិសញ្ញាទីក្រុងប៉ារីសមានអាយុ៣០ឆ្នាំហើយ បន្ទាប់ពីបង្កើតឡើងនៅថ្ងៃទី២៣តុលាឆ្នាំ១៩៩១។ តែយ៉ាងណា រដ្ឋាភិបាលកាលពីឆ្នាំ២០២០ បានសម្រេចលុបចោលការឈប់សម្រាកនៅថ្ងៃខួបកិច្ចព្រមព្រៀងមួយនេះ ចេញពីពិធីបុណ្យជាតិនិងអន្តរជាតិ ដោយសម្អាងហេតុផលថា ដើម្បីទាក់ទាញវិនិយោគិនចូលមកកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ