អ្នកនាំពាក្យក្រសួងការងារ៖កម្មករនិយោជិត៣៧៥នាក់វិជ្ជមានកូវីដ១៩ ក្រោយត្រឡប់ពីភ្ជុំបិណ្ឌ
លោក ហេង សួរ អ្នកនាំពាក្យក្រសួងការងារនិងបណ្ដុះបណ្ដាលវិជ្ជាជីវៈបានប្រាប់វិទ្យុបារាំងអន្តរជាតិនៅថ្ងៃទី១៣តុលានេះថា មានរោងចក្រចំនួន៤៣៤បានស្ម័គ្រចិត្តធ្វើតេស្តរកវីរុសកូវីដ១៩ និងមានការស្ម័គ្រចិត្តពីកម្មករជិត៧ម៉ឺននាក់ បន្ទាប់ពីពួកគេត្រឡប់មកពីស្រុកកំណើតវិញ ក្នុងឱកាសឈប់សម្រាកនៃពិធីបុណ្យភ្ជុំបិណ្ឌកាលពីសប្ដាហ៍មុន។ តាមរយៈលទ្ធផលតេស្តពីថ្ងៃទី៨ដល់ថ្ងៃទី១២តុលារកឃើញថា កម្មករនិយោជិត៣៧៥នាក់បានរកឃើញវិជ្ជមានវីរុសកូវីដ១៩។
ចុះផ្សាយនៅថ្ងៃ៖
ស្តាប់ - ០២:១១
ក្រោយរកឃើញកម្មករនិយោជិត៣៧៥នាក់វិជ្ជមានវីរុសកូវីដ១៩ ភាគីពាក់ព័ន្ធបានរៀបចំកន្លែងស្នាក់នៅនិងព្យាបាលពួកគេទៅតាមស្ថានភាពជាក់ស្ដែង ខណៈដែលអ្នកវិជ្ជមានទាំង៣៧៥នាក់នេះមិនមានអាការៈអ្វីធ្ងន់ធ្ងរគួរឲ្យបារម្ភនោះទេ។ នេះបើតាមលោក ហេង សួរ។
អ្នកនាំពាក្យក្រសួងការងាររូបនេះបានគូសបញ្ជាក់ថា កម្មករនិយោជិត៣៧៥ដែលរកឃើញវិជ្ជមានវីរុសកូវីដ១៩នេះទាបជាង១ភាគរយប៉ុណ្ណោះ និងមិនបានបង្កជាក្ដីព្រួយបារម្ភធំប៉ះពាល់ដល់វិស័យកាត់ដេរនៅកម្ពុជាទេ បើធៀបកាលពីដើមឆ្នាំដែលកម្ពុជាប្រឈមនឹងបិទខ្ទប់នោះ។ បើលោក ហេង សួរ នេះ ភាគរយទាបនេះបណ្ដាលមកពីល្បឿននៃការចាក់វ៉ាក់សាំងជូនកម្មករនិយោជិត និងពលរដ្ឋទូទៅស្រោចស្រពស្ទើរតែបាន១០០ភាគរយទៅហើយ ហើយម្យ៉ាងទៀតដោយសារកម្មករនិយោជិតខ្លួនឯង ចូលរួមអនុវត្តបានល្អ ចំពោះវិធាការការពារ និងទប់ស្កាត់ការចម្លងវីរុសកូវីដ១៩។
ទោះជាមានរោងចក្រ សហគ្រាស ក្រុមហ៊ុនឯកជន មួយចំនួននៅក្នុងវិស័យឧស្សាហកម្មបាន និងកំពុងធ្វើតេស្តរហ័សរកវីរុសកូវីដ១៩លើកម្មករ-កម្មាការិនីក៏ដោយ តែមានរោងចក្រ សហគ្រាស ក្រុមហ៊ុនភាគច្រើនមិនបានធ្វើតេស្តរហ័សរកកូវីដ១៩ លើកម្មករនិយោជិតនោះទេ។ នេះក៏ដោយសារភាគីនិយោជកត្រូវចំណាយច្រើនការទិញឧបករណ៍តេស្ត ហើយកម្មករនិយោជិតវិញពួកគេហាក់មានភាពធុញទ្រាន់នឹងការធ្វើតេស្តម្ដងជាពីរដងទាំងដែលពួកគេបានចាក់វ៉ាក់សាំងបង្ការកូវីដ១៩រួចទៅហើយ។ ម្យ៉ាងកម្មករនិយោជិតភាគច្រើនពេលទៅដល់ផ្ទះកំណើត គេមិនបានចល័តទៅកន្លែងផ្សេងឡើយ ក្រៅពីផ្ទះផ្ទាល់ខ្លួន។ នេះបើតាមការឲ្យដឹងរបស់លោកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្ពុជា។
ដំណាលគ្នានេះលោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានឲ្យដឹងដែរថា មានរោងចក្រមួយចំនួនទៀតបានធ្វើតេស្តរហ័ស តែទៅលើកម្មករនិយោជិតដែលគេសង្ស័យប៉ុណ្ណោះ។ បើតាមសហជីពរូបនេះ ក្រុមហ៊ុន សហគ្រាស រោងចក្រខ្លះក៏បង្ខំចិត្តធ្វើតេស្តលើបុគ្គលិកខ្លួន ដោយសារតែពួកគេបានបញ្ជាទិញឧបករណ៍តេស្តរួចទៅហើយ មុនក្រសួងការងារប្ដូរពីការធ្វើតេស្តដោយចាំបាច់ទៅជាការធ្វើតេស្តដោយស្ម័គ្រចិត្តវិញ។
សូមជម្រាបជូនថា ការធ្វើតេស្តរហ័សនេះគឺឈរលើគោលការណ៍ស្ម័គ្រចិត្តពីភាគីនិយោជក និងកម្មករនិយោជិត ស្របតាមសេចក្ដីណែនាំរបស់ក្រសួងការងារកាលពីទី៤តុលា។ ការធ្វើតេស្តនេះទៀតសោតផ្ដោតតែទៅលើកម្មករនិយោជិតដែលមានរោគសញ្ញានិងអាការៈសង្ស័យប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ