ពលរដ្ឋខ្មែរនៅតែទៅកាន់វត្តអារាមនៅក្នុងថ្ងៃបុណ្យភ្ជុំបិណ្ឌច្រើនជាងថ្ងៃដាក់បិណ្ឌ
នៅក្នុងឱកាសថ្ងៃបុណ្យភ្ជុំបិណ្ឌនាថ្ងៃពុធទី០៦ ខែតុលានេះ ត្រូវនឹងថ្ងៃទី១៥រោច ខែភទ្របទ ព.ស ២៥៦៥ គ្រប់អារាមនៅក្នុងប្រទេសកម្ពុជា មិនមានភាពស្ងាត់ស្ងៀមទេ ដោយប្រជាពលរដ្ឋខ្មែរ ដែលកាន់ព្រះពុទ្ធសាសនាបាននាំគ្នាទៅវត្ត ប្រគេនចង្ហាន់ និងទេយ្យវត្ថុដល់ព្រះសង្ឃ បង្សុកូល ឧទ្ទិសកុសលដល់សាច់ញាតិ បុព្វការីជន ដែលបានចែកឋានទៅកាន់លោកខាងមុខ។ ក៏ប៉ុន្តែ ជំងឺកូវីដ-១៩ គឺជាឧបសគ្គដែលធ្វើឲ្យពុទ្ធបរិស័ទថមថយចំនួន តែមិនថមថយចង្ហាន់ព្រះសង្ឃទេ។
ចុះផ្សាយនៅថ្ងៃ៖
ស្តាប់ - ០១:៤០
ទាំងវត្តអារាមនៅក្នុងរាជធានីភ្នំពេញ និងវត្តអារាមនៅតាមបណ្តាខេត្ត ទាំងជាង ៤ ០០០វត្ត មិនមានវត្តណាមួយត្រូវបានទុកចោល ដោយពុទ្ធបរិស័ទឡើយ។ នៅភ្នំពេញ វត្តខ្លះបានរៀបរោងពិធីនៅត្រឹមខ្លោងទ្វារចូល វត្តខ្លះបានរៀបរោងពិធីនៅក្នុងទីធ្លាវត្តតែម្តង ដោយមានសន្តិសុខ និងគណៈកម្មការវត្តជួយរៀបចំសណ្តាប់ធ្លាប់ អនាម័យប្រដាប់ដោយអាល់កុល និងម៉ាស៊ីនវាស់កំដៅ។
ដោយឡែកចំពោះវត្ត ដែលមិនសូវមានមុខមានមាត់ គ្មានអ្នកធំ និងអ្នកមានធនធានជួយជ្រោមជ្រែង មិនសូវមានឧបករណ៍ការពារកូវីដ-១៩ គ្រប់គ្រាន់នោះទេ ក៏ប៉ុន្តែពុទ្ធបរិស័ទក៏មានវិធីការពាររៀងៗខ្លួនដែរ ដោយពាក់ម៉ាស់ និងកាន់ជាប់ជាមួយនូវកាល់កុលសំលាប់មេរោគ។
ក្រសួងធម្មការ និងសាសនា ក៏ដូចជាមន្ត្រីសង្ឃជាន់ខ្ពស់នៃប្រទេសកម្ពុជា នៅមិនទាន់មានការវាយតម្លៃពីស្ថានភាពនៃការធ្វើបុណ្យភ្ជុំបិណ្ឌនៅក្នុងសម័យកូវីដនេះយ៉ាងណានៅឡើយ។ ក៏ប៉ុន្តែតាមការឲ្យដឹងពីពុទ្ធបរិស័ទនានា ចំនួនអ្នកទៅធ្វើបុណ្យភ្ជុំបិណ្ឌឆ្នាំនេះ មានការធ្លាក់ចុះច្រើន ហើយស្ថានភាពនៅតាមវត្តអារាម ក៏មិនមានភាពអ៊ូអរ ប្រកបដោយអត្ថន័យសាសនាជ្រាលជ្រៅ ដូចជាឆ្នាំកន្លងៗទៅ ដែលប្រទេសមិនទាន់ប្រឈមនឹងជំងឺកូវីដ-១៩។
សូមបញ្ជាក់ថា ប្រជាពលរដ្ឋខ្មែរ នៅតែឆ្លៀតទៅវត្ត ដើម្បីធ្វើបុណ្យដាក់បិណ្ឌចាប់តាំងពីថ្ងៃ១រោច ខែភទ្របទ រហូតដល់ថ្ងៃភ្ជុំធំ បើទោះណាជារដ្ឋាភិបាលបានហាមប្រាមមិនឲ្យបើកវត្តសម្រាប់ធ្វើបុណ្យដោយចំហរដូចឆ្នាំកន្លងទៅក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ