កម្មករ និយោជិកចាប់ផ្តើមត្រលប់ទៅលេងស្រុកកំណើត ខណៈដែលរដ្ឋនិងសហជីពអំពាវនាវឲ្យចូលរួមអនុវត្តវិធានសុខាភិបាល
នៅថ្ងៃអាទិត្យទី០៣តុលានេះ កម្មករ និយោជិក មួយចំនួនធំបានចាប់ផ្តើមធ្វើដំណើរទៅកាន់ស្រុកកំណើតតាមមធ្យោបាយរៀងៗខ្លួន មុនពិធីបុណ្យភ្ជុំបិណ្ឌចូលមកដល់នៅថ្ងៃអង្គារទី០៥តុលា។ ការចាកចេញទៅស្រុកកំណើតក្នុងបរិបទកូវីដ១៩នេះ បានធ្វើឲ្យភាគីរដ្ឋាភិបាលនិងភាគីសហជីព មានការព្រួយបារម្ភពីបញ្ហាឆ្លងជំងឺកូវីដ១៩ជាយថាហេតុ នៅខណៈដែលវិធានការសុខាភិបាលមួយចំនួននៅមិនទាន់អនុវត្តបានល្អនៅឡើយ។
ចុះផ្សាយនៅថ្ងៃ៖
ស្តាប់ - ០២:០៩
ស្របពេលដែលប្រជាពលរដ្ឋ ជាពិសេសកម្មករ និយោជិក ជាច្រើនកំពុងសម្រុកធ្វើដំណើរទៅស្រុកកំណើត ដើម្បីជួបជុំក្រុមគ្រួសារក្នុងពិធីបុណ្យភ្ជុំបិណ្ឌខាងមុខ លោកហេង សួរ រដ្ឋលេខាធិការនិងជាអ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ តាមរយៈទំព័រហ្វេសប៊ុកផ្ទាល់ខ្លួន បានអំពាវនាវឲ្យកម្មករ និយោជិកមានការប្រយ័ត្នប្រយែងខ្ពស់ពេលដំណើរតាមរថយន្តឈ្នួល។ បើតាមអ្នកនាំពាក្យរូបនេះ កម្មករ និយោជិកដាច់ខាតកុំអង្គុយទល់មុខគ្នា ហើយត្រូវពាក់ម៉ាស និងបាញ់អាកុលជាចាំបាច់។
រីឯលោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាវិញ បានបញ្ជាក់ប្រាប់វិទ្យុបារាំងអន្តរជាតិនៅព្រឹកថ្ងៃអាទិត្យនេះថា មានកម្មករនិយោជិកប្រមាណ៥០ទៅ៦០ម៉ឺននាក់បានចាកចេញពីរាជធានីភ្នំពេញទៅលេងស្រុកកំណើតនៅពីរថ្ងៃចុងសប្តាហ៍នេះ។ ចរន្តធ្វើដំណើរទៅស្រុកកំណើតរបស់កម្មករប្រមាណ៥០%នេះ ត្រូវបានប្រមុខសហជីពរូបនេះសង្កេតឃើញថា នៅមានចន្លោះប្រហោងក្នុងការអនុវត្តវិធានការសុខាភិបាល ដើម្បីបង្ការការឆ្លងជំងឺកូវីដ១៩។
បើតាមលោកអាត់ ធន់ ការប្រជ្រៀតគ្នាជិះរថយន្តឈ្នួលនៅតែជាកង្វល់និងកើតមានដដែលនៅក្នុងបរិបទកូវីដ១៩ជាង២ឆ្នាំមកនេះ។ លោកលើកឡើងថា រថយន្តឈ្នួលមួយចំនួនធំនៅបន្តដាក់កម្មករនិយោជិកប្រជ្រៀតគ្នា ពី១៥ទៅ២០នាក់តាមចំណុះរថយន្ត ដែលនេះធ្វើឲ្យការរក្សាគម្លាតបុគ្គលមិនអាចអនុវត្តបាន។ ហើយប្រសិនបើមានករណីឆ្លងនៅលើរថយន្តនោះនឹងក្លាយជាការរាលដាលបន្ត ពេលកម្មករ និយោជិកទៅដល់ស្រុកកំណើត។ លោកបន្តថា ក្នុងករណីមិនចាំបាច់ពេកទេ កម្មករនិយោជិកគួរកុំទាន់ទៅលេងស្រុកកំណើត និងរង់ចាំពេលវេលាណាមួយសមស្របវិញល្អជាង។
ការធ្វើដំណើរទៅកាន់ស្រុកកំណើតនេះដែរ ក្រសួងការងារនិងបណ្តុះបណ្តាលវិជ្ជាជីវៈបានស្នើឲ្យម្ចាស់រោងចក្រ សហគ្រាស ធ្វើតេស្តរហ័សលើកម្មករ មុនពេលពួកគេចូលធ្វើការវិញ ដើម្បីបញ្ចៀសការឆ្លងជំងឺកូវីដ១៩ទៅក្នុងរោងចក្រ សហគ្រាស ក៏ប៉ុន្តែលោកអាត់ ធន់ យល់ឃើញថា វាមិនមែនជាការចាំបាច់ពេកទេ។ ការធ្វើតេស្តនេះគួរធ្វើតែលើកម្មករនិយោជិកណាដែលមានការសង្ស័យ ខណៈដែលលោកនាយករដ្ឋមន្រ្តីហ៊ុន សែន ក៏ធ្លាប់ស្នើឲ្យអាជ្ញាធរផ្អាកការធ្វើតេស្តរហ័សប្រសិនបើមិនចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ