កូវីដ១៩បន្តធ្លាក់ចុះយ៉ាងគំហុកក្នុង១ថ្ងៃ ខណៈលទ្ធផលនៃការធ្វើតេស្តរហ័សឈប់រាប់បញ្ចូល
ក្នុងរយៈពេល២ថ្ងៃចុងក្រោយនេះ ចំនួនកូវីដ១៩ដែលឆ្លងប្រចាំថ្ងៃនៅកម្ពុជាបានបន្តធ្លាក់ចុះយ៉ាងគំហុក ពោលបានថយចុះពីជិត១០០០នាក់មកនៅតែរង្វង់២០០នាក់ក្នុងមួយថ្ងៃ។ ការដែលចំនួនអ្នកវិជ្ជមានកូវីដ១៩ប្រចាំថ្ងៃធ្លាក់ចុះបែបនេះ គឺបន្ទាប់ពីលោកប្រមុខរដ្ឋាភិបាលបានបញ្ជាឲ្យក្រសួងសុខាភិបាលបញ្ឈប់ការរាប់បញ្ចូលលទ្ធផលនៃការធ្វើតេស្តរហ័សរកកូវីដ១៩ ដែលអ្នកឆ្លងមានកម្រិតស្រាល ឬមិនចេញរោគសញ្ញា។
ចុះផ្សាយនៅថ្ងៃ៖
ស្តាប់ - ០២:០៥
យោងតាមលទ្ធផលប្រចាំថ្ងៃរបស់ក្រសួងសុខាភិបាលនៅថ្ងៃទី៣០កញ្ញា បង្ហាញថា ចំនួនអ្នកវិជ្ជមានកូវីដ១៩ គឺមានចំនួន២៣២នាក់ គឺបានថយចុះយ៉ាងគំហុកបើប្រៀបធៀបនឹងលទ្ធផលថ្ងៃទី២៩កញ្ញា ដែលមានអ្នកវិជ្ជមានចំនួន៩៧៨នាក់ ហើយបន្តធ្លាក់ចុះបន្ថែមទៀតនៅថ្ងៃទី១តុលា គឺចំនួនអ្នកឆ្លងកូវីដ១៩ប្រចាំថ្ងៃនៅសល់តែ១៧៤នាក់ប៉ុណ្ណោះ។
លទ្ធផលធ្លាក់ចុះយ៉ាងគំហុកនៃចំនួនអ្នកឆ្លងកូវីដ១៩ប្រចាំថ្ងៃបែបនេះ បានញាំងឲ្យពលរដ្ឋជាច្រើននាំគ្នាភ្ញាក់ផ្អើល និងបានចូលទៅបញ្ចេញយោបល់ក្នុងទំព័រហ្វេសប៊ុករបស់ក្រសួងសុខាភិបាល។ អ្នកខ្លះបញ្ចេញយោបល់ក្នុងន័យរីករាយ ដោយសារឃើញតួលេខថយចុះ ប៉ុន្តែអ្នកខ្លះទៀតសរសេរថា នេះជារឿងគួរឱ្យព្រួយបារម្ភទៅវិញទេ ខណៈតួលេខដែលក្រសួងប្រកាសថា ថយចុះនេះ គឺមិនបានរាប់បញ្ចូលអ្នកកើតជំងឺដែលមិនចេញរោគសញ្ញា និងអ្នកដែលទទួលលទ្ធផលវិជ្ជមាន តាមរយៈឧបករណ៍តេស្ដរហ័សនោះឡើយ។ ដូច្នេះពួកគេយល់ថាចំនួនអ្នកឆ្លងកូវីដ១៩ជាក់ស្ដែងអាចនៅតែច្រើនដដែល។
យ៉ាងណាក៏ដោយលោកនាយករដ្ឋមន្ត្រី ហ៊ុន សែន កាលពីថ្ងៃទី២៩ ខែកញ្ញា តាមរយៈសារជាសំឡេងតាមតេឡេក្រាមលោកបានថ្លែងថា នៅពេលនេះពលរដ្ឋខ្មែរគួរតែចេះសម្របខ្លួនក្នុងស្ថានភាពកូវីដ១៩ ដោយមិនចាំបាច់ធ្វើតេស្តរហ័សតទៀតនោះឡើយ ពីព្រោះវាធ្វើមានបញ្ហាដល់ច្រមុះដែលធ្វើតេស្តច្រើនដងពេក។ លោកបានបញ្ជាឲ្យអាជ្ញាធរសុខាភិបាលបញ្ឈប់ការតាមរុករកពលរដ្ឋនៅតាមភូមិ មកធ្វើតេស្តកូវីដ១៩ តាមរយៈការធ្វើតេស្ត(rapid tests)តទៅទៀត។ បទបញ្ជារបស់លោក ហ៊ុន សែន យ៉ាងដូច្នេះដោយសំអាងថា ពលរដ្ឋខ្មែរស្ទើរតែទាំងអស់ត្រូវចាក់វ៉ាក់សាំងការពារកូវីដ១៩រួចហើយ។
ប៉ុន្តែអ្នកជំនាញវេជ្ជសាស្រ្ត ព្រមានថា កម្ពុជានឹងកាន់តែគ្រោះថ្នាក់ ប្រសិនបើការធ្វើតេស្តរហ័សរកជំកូវីដ១៩ត្រូវបានផ្អាក ខណៈការឆ្លងរាលដាលនៃមេរោគបំប្លែងថ្មីប្រភេទ(Delta)កំពុងមានសន្ទុះខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ