បក្សនយោបាយ៣គ្រោងនឹងច្របាច់បញ្ចូលគ្នា ដើម្បីប្រជែងនឹងបក្សកាន់អំណាចក្នុងការបោះឆ្នោតខាងមុខ
តំណាងគណបក្សកែទម្រង់កម្ពុជាកាលពីថ្ងៃព្រហស្បតិ៍ម្សិលមិញនេះ បានជួបដាច់ដោយឡែកជាមួយតំណាងគណបក្សប្រជាធិបតេយ្យមូលដ្ឋាន និងគណបក្សឆន្ទៈខ្មែរ។ ជំនួបនេះ គឺដើម្បីស្វែងយល់ពីគ្នាបានកាន់តែច្បាស់ និងបានជជែកពីលទ្ធភាព និងរូបមន្តក្នុងការឈានទៅច្របាច់បញ្ចួលគ្នាទៅជាគណបក្សនយោបាយតែមួយត្រៀមប្រកួតប្រជែងនឹងគណបក្សប្រជាជនកម្ពុជានៅក្នុងការបោះឆ្នោតនាពេលខាងមុខ។
ចុះផ្សាយនៅថ្ងៃ៖
ស្តាប់ - ០២:១៤
ដូចការគ្រោងទុកអ៊ីចឹង គឺបន្ទាប់ពីត្រូវបានក្រសួងមហាផ្ទៃសម្រេចចុះបញ្ជីជាផ្លូវការ គណបក្សកែទម្រង់កម្ពុជារបស់លោកប៉ុល ហំម និងលោកអ៊ូ ច័ន្ទរ័ត្ន បានចាប់ផ្តើមធ្វើសកម្មភាពគៀងគរគណបក្សនយោបាយដទៃ ដើម្បីរកផ្លូវបង្រួបង្រួមគ្នាទៅជាគណបក្សតែមួយ។ ជាបឋមនេះ គណបក្សកែទម្រង់កម្ពុជាទាក់ទងបានគណបក្សប្រជាធិបតេយ្យមូលដ្ឋាន និងគណបក្សឆន្ទៈខ្មែរដែលមានឆន្ទៈដូចគ្នា។
នៅក្នុងជំនួបកាលពីថ្ងៃព្រហស្បតិ៍ លោកអ៊ូ ច័ន្ទរ័ត្ន សហស្ថានិកគណបក្សកែទម្រង់កម្ពុជាបានអះអាងពីភាពវិជ្ជមាននៃការដើរទៅមុខជាមួយគ្នានៃគណបក្សទាំង៣នេះ។ លោកគូសបញ្ជាក់ថា គណបក្សទាំង៣បានស្រុះស្រួលគ្នាលើបញ្ហាមួយចំនួនដូចជា បង្កើតបណ្តាញទំនាក់ទំនងគ្នាទៅវិញទៅមកឱ្យបានទៀងទាត់ កំណត់ពេលវេលាជួបគ្នា និងគ្រោងធ្វើសេចក្តីថ្លែងការណ៍រួមគ្នាលើបញ្ហាអ្វីមួយជាដើម។
ចំណែក លោកសាម អ៊ីន អគ្គលេខាធិការគណបក្សប្រជាធិបតេយ្យមូលដ្ឋាន(GDP) និងលោកគង់ មុនីកា ដែលជាប្រធានគណបក្សឆន្ទៈខ្មែរវិញត្បិតថា បានជួយដាច់ដោយឡែកជាមួយតំណាងគណបក្សកែទម្រង់កម្ពុជាក្តី ប៉ុន្តែ ពួកគេអះអាងដូចគ្នាថា កំពុងស្វែងរករូបមន្ត ដើម្បីឈានទៅបង្រួបបង្រួម និងច្របាច់បញ្ចូលគ្នានាពេលខាងមុខ។ បើតាមពួកគេ គឺតំណាងគណបក្សទាំង៣នេះ នឹងបន្តជួបគ្នាទៀតនាពេលខាងមុខ ដើម្បីស្វែងរកឱ្យបាននូវរូបមន្តរួមមួយសម្រាប់ធ្វើការបង្រួបបបង្រួមគ្នា។
សូមបញ្ជាក់ថា គំនិតបង្រួបបង្រួមគ្នានេះ កើតចេញពីគណបក្សកែទម្រង់កម្ពុជា។ គណបក្សកែទម្រង់កម្ពុជាបានអះអាងឱ្យដឹងថា ក្រៅពីគណបក្សប្រជាធិបតេយ្យមូលដ្ឋាន និងគណបក្សឆន្ទៈខ្មែរ គឺគណបក្សកែទម្រង់កម្ពុជាក៏គ្រោងនឹងទាក់ទងជាមួយគណបក្សដទៃទៀតដែរ រួមមានជាដូចជាកម្ពុជានិយម គណបក្សខ្មែរស្រឡាញ់ជាតិ និងគណបក្សដែលបង្កើតឡើងដោយសមាជិកអតីតគណបក្សសង្រ្គោះជាតិ។
ក៏ប៉ុន្តែ គណបក្សកែទម្រង់កម្ពុជាបានដាក់លក្ខខណ្ឌកំណត់មួយថា ប្រសិនបើគណបក្សនយោបាយណាមួយមានការជាប់ពាក់ព័ន្ធជាមួយនឹងគណបក្សកាន់អំណាចដោយផ្ទាល់ និងដោយប្រយោលក្តី គឺមិនអាចសហការជាមួយគ្នាបានទេ។ គណបក្សកែទម្រង់កម្ពុជាបានអះអាងថា ដោយសារតែគោលដៅរួមនៃការបង្រួបបង្រួមគ្នានេះ គឺប្រកួតប្រជែងនឹងគណបក្សកាន់អំណាច ដូច្នេះហើយគណបក្សទាំងអស់មិនអាចមានទំនាក់ទំនងជាមួយបក្សកាន់អំណាចបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ