ជំនួបកំពូលកម្ពុជា-វៀតណាម-ឡាវ មេដឹកនាំទាំង៣ប្តេជ្ញាពង្រឹងកិច្ចសហប្រតិបត្តិការលើគ្រប់វិស័យ
ក្រុមមេដឹកនាំគណបក្សកាន់អំណាចរបស់កម្ពុជា-វៀតណាម-ឡាវ បានបើកជំនួបកំពូលកាលពីថ្ងៃអាទិត្យម្សិលមិញនៅទីស្នាក់ការកណ្តាលគណបក្សកុម្មុយនីស្តវៀតណាមនៅទីក្រុងហាណូយ។ ក្នុងជំនួបកំពូលនេះ មេដឹកនាំគណបក្សទាំង៣ បានប្តេជ្ញាពង្រឹងកិច្ចសហប្រតិបត្តិការលើគ្រប់វិស័យ ក្នុងអ្វីដែលគេអះអាងថា ដើម្បីប្រយោជន៍ប្រជាជនរបស់ប្រទេសនីមួយៗ ក្នុងគោលដៅរក្សាសន្តិភាព និងការអភិវឌ្ឍន៍។
ចុះផ្សាយនៅថ្ងៃ៖
ស្តាប់ - ០១:៤១
«មេដឹកនាំទាំង៣បានពិគ្រោះយោបល់គ្នាអំពីកិច្ចសហប្រតិបត្តិការក្នុងរយៈពេលកន្លងមក និងបានពិភាក្សាអំពីទិសដៅនៃកិច្ចសហប្រតិបត្តិការនាពេលខាងមុខ ហើយបានឯកភាពរួមអំពីសារសំខាន់នៃទំនាក់ទំនងជាប្រពៃណី សាមគ្គីភាព មិត្តភាព ស្អិតរមួតរវាងប្រទេសទាំង៣»។ នេះបើតាមសេចក្តីប្រកាសព័ត៌មានរបស់គណបក្សប្រជាជនកម្ពុជា។
មិនខុសគ្នាប៉ុន្មានឡើយ សារព័ត៌មានរបស់វៀតណាមវិញ ក៏បានរាយការណ៍ពីលទ្ធផលនៃជំនួបកំពូលរវាងមេដឹកនាំគណបក្សទាំង៣ ប្រហាក់ប្រហែលគ្នានេះដែរ។ មេដឹកនាំគណបក្សទាំង៣ បានឯកភាពបង្កើតកិច្ចសហប្រតិបត្តិការលើគ្រប់វិស័យ ក្នុងអ្វីដែលគេអះអាងថាដើម្បីប្រយោជន៍ប្រជាជនរបស់ប្រទេសនីមួយៗ ក្នុងគោលដៅរក្សាសន្តិភាព និងការអភិវឌ្ឍន៍ក្នុងតំបន់ និងលើពិភពលោក។
កាលពីសប្តាហ៍មុន សន្និសីទលើកទី៨នៃគណៈកម្មាធិការទំនាក់ទំនងអន្តរជាតិនៃសភាជាតិកម្ពុជា ឡាវ និងវៀតណាម (CLV) បានរៀបចំឡើងតាមរយៈវីដេអូ ស្តីពីការអភិវឌ្ឍន៍តំបន់ត្រីកោណ ដែលកម្ពុជាធ្វើជាម្ចាស់ផ្ទះនៅក្រោមប្រធានបទ“ ការពង្រឹងភាពជាដៃគូសភាសម្រាប់ការអភិវឌ្ឍន៍ប្រកបដោយចីរភាពនិងការឆ្លើយតបទៅនឹងជំងឺកូវីដ-១៩ នៅក្នុងតំបន់ត្រីកោណ។
នៅក្នុងសេចក្តីថ្លែងការណ៍រួម គណៈប្រតិភូបានវាយតម្លៃខ្ពស់ចំពោះសមិទ្ធផលដែលតំបន់បានកត់ត្រានៅក្នុងការអភិវឌ្ឍន៍សេដ្ឋកិច្ច និងសង្គមចំពេលកូវីដ-១៩ ក៏ដូចជាការអនុវត្តកិច្ចព្រមព្រៀងកិច្ចសហប្រតិបត្តិការ។
គណៈកម្មាធិការបានអំពាវនាវឱ្យមានការចែករំលែកវ៉ាក់សាំងពីបណ្តាប្រទេសដែលមានការអភិវឌ្ឍន៍ និងស្វែងរកការគាំទ្រពីប្រទេសទាំងនោះចំពោះការលះបង់សិទ្ធិប៉ាតង់សម្រាប់វ៉ាក់សាំងការពារកូវីដ-១៩។ នេះបើតាមការចុះផ្សាយរបស់សារព័ត៌មានវៀតណាមថាមន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ