សម្តេចក្រុមព្រះបង្ហាញព្រះភ័ក្ត្រជាលើកដំបូង ខណៈលេចធ្លាយពីបញ្ហារង្គោះរង្គើផ្ទៃក្នុងហ្វ៊ុនស៊ិនប៉ិច
សម្តេចក្រុមព្រះ នរោត្តម រណឫទ្ធិ បានបង្ហាញព្រះភ័ក្ត្រជាលើកដំបូងកាលពីព្រលប់ថ្ងៃសុក្រម្សិលមិញតាមប្រព័ន្ធវីដេអូ ដើម្បីសំណេះសំណាលជាមួយក្បាលម៉ាស៊ីនថ្នាក់ដឹកនាំរបស់គណបក្សហ្វ៊ុនស៊ិនប៉ិច ខណៈផ្ទៃក្នុងហ៊្វុនស៊ិនប៉ិចត្រូវបានលេចធ្លាយថាមានបញ្ហារង្គោះរង្គើ។ បើតាមអ្នកនាំពាក្យ ព្រះរាជសុខភាពរបស់សម្តេចក្រុមព្រះគឺបានប្រសើរឡើងវិញហើយ នឹងគ្រោងយាងចេញពីប្រទេសបារាំងមកមាតុភូមិវិញឲ្យបានទាន់ការបោះឆ្នោតឃុំ-សង្កាត់ នាពេលខាងមុខ។
ចុះផ្សាយនៅថ្ងៃ៖
ស្តាប់ - ០១:៣៩
ការចេញព្រះភ័ក្ត្រជាលើកដំបូងរបស់សម្តេចព្រះតាំងពីព្រះអង្គយាងទៅព្យាបាលនៅប្រទេសបារាំងនេះ ត្រូវបានលោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច បញ្ជាក់ប្រាប់វិទ្យុបារាំងអន្តរជាតិRFIថា នេះអាចនិយាយថាជាការបន្សាបព័ត៌មានដែលលេចធ្លាយនាប៉ុន្មានថ្ងៃចុងក្រោយពីបញ្ហាស្រួចស្រាវ ឬឈានទៅដល់ការរង្គោះរង្គើផ្ទៃក្នុងគណបក្សរាជានិយមមួយនេះសាជាថ្មី។ លើសពីនេះ ការបង្ហាញព្រះភ័ក្ត្ររបស់សម្តេចក្រុមព្រះនៅពេលនេះ ក៏ដើម្បីជម្រះមន្ទិលនៃការចុះផ្សាយថា សម្តេចក្រុមព្រះត្រូវបានគេយកទៅដាក់នៅមណ្ឌលចាស់ជរា។
សូមបញ្ជាក់ថា សម្តេចក្រុមព្រះបានបាត់ព្រះភ័ក្ត្រមួយរយៈពេល ក្រោយពីទ្រង់យាងទៅព្រះព្យាបាលព្រះរោគ នៅប្រទេសបារាំង បន្ទាប់ពីជួបគ្រោះថ្នាក់ចរាចរណ៍ដ៏រន្ធត់មួយ នៅស្រុកព្រៃនប់ ខេត្តព្រះសីហនុ កាលពីថ្ងៃទី១៧ ខែមិថុនា ឆ្នាំ២០១៨។ ជាគ្រោះថ្នាក់ចរាចរណ៍ដែលបានបណ្តាលទ្រង់បានរងរបួសយ៉ាងធ្ងន់ធ្ងរ នៅគ្រាដែលអ្នកម្នាង អ៊ុក ផល្លា ទទួលមរណភាព។
ក្នុងរយៈពេលចុងក្រោយនេះ គណបក្សរាជានិយមមួយនេះ គឺបានហ៊ុមព័ន្ធទៅដោយបញ្ហារកាំរកូសមិនចេះចប់ ជាពិសេស គឺបានផ្លាស់ប្តូរក្បាលម៉ាស៊ីនដឹកនាំជាបន្តបន្ទាប់ធ្វើឱ្យមិនមានសកម្មភាពផុសផុលដូចគណបក្សនយោបាយដទៃៗទៀត។ ប៉ុន្តែ លោកញឿន រ៉ាដែន បានគូសបញ្ជាក់ថា បញ្ហាផ្ទៃក្នុងរបស់គណបក្សហ្វ៊ុនស៊ិនប៉ិចនៅពេលនេះ គឺនៅសល់បន្តិចបន្តួចតែប៉ុណ្ណោះ ហើយនឹងអាចដោះស្រាយបញ្ចប់ទាំងស្រុងនាពេលឆាប់ៗខាងមុខនេះ។
បើតាមអ្នកនាំពាក្យរូបនេះ គណបក្សហ្វ៊ុនស៊ិនប៉ិចមានលទ្ធភាពគ្រប់គ្រាន់ក្នុងការចូលរួមបោះឆ្នោតឃុំ-សង្កាត់នៅឆ្នាំ២០២២ខាងមុខ ហើយថាសម្តេចក្រុមព្រះគ្រោងយាងចេញពីប្រទេសបារាំងមកមាតុភូមិវិញឲ្យបានទាន់ការបោះឆ្នោតនេះ ខណៈព្រះរាជសុខភាពរបស់ទ្រង់បានប្រសើរឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ