រាជវាំងខ្មែរបដិសេធសំណេររបស់កាសែតបារាំង និងបំភ្លឺថាកម្ពុជាមិនមាន«រជ្ជទាយាទ»ទេ
ក្រសួងព្រះបរមរាជវាំងកម្ពុជា នៅថ្ងៃចន្ទនេះ បានប្រកាសថា ច្បាប់របស់ប្រទេសកម្ពុជា មិនមានការចែងស្តីពីការចាត់តាំងរជ្ជទាយាទឬ« Prince Héritier » ទេ។ ប្រតិកម្មរបស់ស្ថាប័នព្រះបរមរាជវាំងដូច្នេះ គឺដោយសារកាលពីពេលថ្មីៗនេះ មានកាសែតបារាំងមួយចំនួន បានចុះផ្សាយពាក់ព័ន្ធដល់ព្រះអង្គម្ចាស់រជ្ជទាយាទកម្ពុជាមួយព្រះអង្គ បានដាក់ស្នើសុំទិញក្លឹបបាល់ទាត់ AS Saint-Etienne របស់ប្រទេសបារាំង ក្នុងតម្លៃ១០០លានអឺរ៉ូ។
ចុះផ្សាយនៅថ្ងៃ៖
ស្តាប់ - ០១:៤៧
កាសែតបារាំងមួយចំនួនកាលពីចុងសប្តាហ៍មុន បានចុះផ្សាយតៗគ្នា ដោយប្រើពាក្យដូចៗគ្នាថា «រជ្ជទាយាទ» ឬ «Prince Héritier» នៃប្រទេសកម្ពុជា បានដាក់ស្នើសុំទិញក្លឹបបាល់ទាត់ AS Saint-Etienne របស់ប្រទេសបារាំង ក្នុងតម្លៃ១០០លានអឺរ៉ូ។ កាសែតទាំងនោះត្រូវគេដឹងថា កាសែត Le Parisien Liberation Le Figaro និងOuest-France ជាដើម។
កាសែតបារាំងទាំងនោះ បានចុះផ្សាយដូចៗគ្នាថា ព្រះអង្គម្ចាស់ នរោត្តម រ៉ាវីចក្រ គឺជាចៅប្រុសរបស់សម្តេចព្រះនរោត្តម សីហនុ ដែលស្រលាញ់ប្រទេសបារាំង ហើយងប់ងល់នឹងកីឡាបាល់ទាត់ និងកីឡាជាទូទៅ ខណៈ ជាច្រើនឆ្នាំមកហើយ ដែលក្រុមគ្រួសារព្រះអង្គបានធ្វើដំណើរទៅមករវាងទីក្រុងភ្នំពេញ និងទីក្រុងប៉ារីស។ ព្រះអង្គម្ចាស់រ៉ាវីចក្រ ដែលគេដឹងថាជាបុត្រារបស់ព្រះអង្គម្ចាស់ចក្រពង្ស ត្រូវកាសែតបារាំង ដែលចុះផ្សាយទាំងអស់សរសេរថាជា«រជ្ជទាយាទ»។
ក៏ប៉ុន្តែតាមសេចក្តីប្រកាសព័ត៌មានរបស់ព្រះបរមរាជវាំងខ្មែរនៅថ្ងៃនេះ រដ្ឋធម្មនុញ្ញនៃប្រទេសកម្ពុជា និងច្បាប់ស្តីពីការរៀបចំ និងការប្រព្រឹត្តទៅរបស់ក្រុមប្រឹក្សារាជសម្បត្តិនៃប្រទេសកម្ពុជា មិនមានចែងអំពីការចាត់តាំង ព្រះរជ្ជទាយាទឬ Prince Héritier ទេ ហើយក៏ពុំមានចែងអំពីស្ថាប័ន ឬបុគ្គលណាមួយមានសិទ្ធិអំណាចចាត់តាំងព្រះរជ្ជទាយាទឡើយ។
យោងតាមរដ្ឋធម្មនុញ្ញ ការជ្រើសរើសព្រះមហាក្សត្រ ត្រូវធ្វើឡើងក្នុងរយៈវេលា៧ថ្ងៃយ៉ាងយូរ ដោយក្រុមប្រឹក្សារាជ្យសម្បត្តិ ដែលរួមមានឥស្សរៈជន៩រូប។ ក្នុងនោះមាន ប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី សម្ដេចព្រះសង្ឃរាជទាំង២គណៈ អនុប្រធានទី១ រដ្ឋសភា និងព្រឹទ្ធសភា និងអនុប្រធានទី២រដ្ឋសភា និងព្រឹទ្ធសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ