សំណុំរឿងព្រលានយន្តហោះនៅខេត្តកណ្ដាល៖ ប្រជាពលរដ្ឋរងផលប៉ះពាល់ សម្រេចផ្អាកការតវ៉ាបណ្តោះអាសន្ន
ប្រជាពលរដ្ឋរងផលប៉ះពាល់នៅក្នុងវិវាទដីធ្លីត្រង់ព្រលានយន្តហោះនៅខេត្តកណ្ដាល បានអះអាងប្រាប់វិទ្យុបារាំងអន្តរជាតិ RFI នៅថ្ងៃសៅរ៍ទី១៨កញ្ញានេះថា សកម្មភាពតវ៉ាដីធ្លីត្រូវបានផ្អាកជាបណ្តោះអាសន្នសិន ក្រោយប្រជាពលរដ្ឋមួយចំនួនរងការចាប់ខ្លួន និងរងការគំរាមកំហែងពីអាជ្ញាធរសមត្ថកិច្ច។ ប៉ុន្តែយ៉ាងណាក៏ដោយ ប្រជាពលរដ្ឋបានរក្សាជំហរតវ៉ាទាមទារប្រាក់សំណង និងបន្តស្វែងរកកិច្ចអន្តរាគមន៍ផ្សេងៗទៀតដដែល។
ចុះផ្សាយនៅថ្ងៃ៖
ស្តាប់ - ០២:២៣
«យើងនឹងនៅតែបន្តការតវ៉ា លុះត្រាទទួលបានសំណងមួយដ៏ត្រឹមត្រូវ ហើយក៏មិនទទួលយកសំណង៨ដុល្លារពីក្រុមហ៊ុននេះដែរ»។ នេះគឺជាការលើកឡើងរបស់តំណាងប្រជាពលរដ្ឋមួយរូបសុំមិនបញ្ចេញឈ្មោះ ដែលរស់នៅក្នុងភូមិខ្យាង ខេត្តកណ្តាល។ តំណាងប្រជាពលរដ្ឋរូបនេះបានប្រាប់វិទ្យុបារាំងតាមទូរស័ព្ទនៅថ្ងៃសៅរ៍ទី១៨កញ្ញានេះថា ការតវ៉ាទាមទាររកដំណោះស្រាយជុំវិញបញ្ហាវិវាទដីធ្លី នឹងអាចធ្វើឡើងវិញ ប្រសិនបើក្រុមហ៊ុននៅតែគ្មានដំណោះស្រាយជូនពួកគាត់។ សូមជម្រាបថា ការលើកឡើងនេះ ធ្វើឡើងក្នុងពេលដែលប្រជាពលរដ្ឋជាច្រើនគ្រួសារបានផ្អាកការប្រមូលផ្តុំគ្នាតវ៉ា ក្រោយការប្រឈមមុខដាក់គ្នាជាមួយកងកម្លាំងសមត្ថកិច្ចកាលពីថ្ងៃទី១២ កញ្ញា ឆ្នាំ២០២១។
ទោះបីការតវ៉ាត្រូវបានផ្អាកអស់រយៈពេលជិត១សប្តាហ៍មក តំណាងពលរដ្ឋក្នុងភូមិខ្យាងរូបនេះបានប្រាប់ថា ពលរដ្ឋនៅតែប្រកាន់ជំហរទាមទារយកសំណងឱ្យសមស្របតាមតម្លៃទីផ្សារ និងស្នើឱ្យអាជ្ញាធរចុះវាយតម្លៃដីធ្លីឱ្យបានត្រឹមត្រូវ ព្រោះបើតាមការចង់បានរបស់ប្រជាពលរដ្ឋ ទំហំដីក្នុងមួយម៉ែត្រការ៉េ អាចមានតម្លៃចន្លោះពី៨០ដុល្លារឡើងទៅ។
ទាក់ទងនឹងតម្លៃដីនេះ បើតាមប្រជាពលរដ្ឋដដែល អាជ្ញាធរបានប្រាប់ពលរដ្ឋដែលមានដីនៅចំផ្លូវរត់របស់យន្តហោះថា ពួកគេមានជម្រើសចំនួន២៖ គឺទទួលបានសំណង៨ដុល្លារ និងប្តូរយកដីនៅទីតាំងផ្សេង។ ចំណែកប្រជាពលរដ្ឋដែលមានដីមិននៅចំផ្លូវរត់ទេ គឺទទួលបានតែសំណង៨ដុល្លារប៉ុណ្ណោះក្នុងមួយម៉ែត្រការ៉េ។ តែយ៉ាងណា តំណាងពលរដ្ឋនៅភូមិខ្យាងរូបនេះបន្តថា គិតមកទល់ពេលនេះ មានតែពលរដ្ឋចំនួន២គ្រួសារ ក្នុងចំណោម១១គ្រួសារប៉ុណ្ណោះ ដែលព្រមទទួលយកសំណង ក្រោយអាជ្ញាធរគំរាមចាប់ខ្លួនគ្រួសារពួកគេដាក់ពន្ធធនាគារ ក្រោមបទចោទ ញុះញង់។
សូមរំឭកថា កាលពីថ្ងៃទី១២ខែកញ្ញា ការតវ៉ាស្វែងរកសំណងរបស់ប្រជាពលរដ្ឋ នៅត្រង់គម្រោងអភិវឌ្ឍព្រលានយន្តហោះអន្ដរជាតិនៅខេត្តកណ្ដាល បានរងការបង្ក្រាបពីសំណាក់អាជ្ញាធរមានសមត្ថកិច្ច។ បន្ទាប់ពីការប៉ះទង្គិចនេះ ពលរដ្ឋចំនួន៩នាក់ត្រូវអាជ្ញាធរចាប់ខ្លួននិងចោទប្រកាន់បញ្ជូនទៅពន្ធនាគារ។ មួយសប្ដាហ៍បន្ទាប់ពីការប៉ះទង្គិចគ្នានេះ ការប្រមូលផ្ដុំគ្នាតវ៉ារបស់ប្រជាពលរដ្ឋត្រូវបានផ្អាក។
ប្រជាពលរដ្ឋម្នាក់រស់នៅក្នុងភូមិកំពង់តាឡុង ដែលសុំមិនបញ្ចេញឈ្មោះ បានប្រាប់វិទ្យុបារាំងនៅថ្ងៃសៅរ៍នេះថា ការតវ៉ានៅពេលក្រោយទៀតស្ថិតក្នុងភាពមិនជាក់លាក់។ មិនជាក់លាក់ព្រោះពលរដ្ឋខ្លះបានចុះកិច្ចសន្យាបញ្ឈប់ការចូលរួមតវ៉ាដីធ្លីនេះទៀត និងដោយសារកងកម្លាំងសមត្ថកិច្ចនៅតែចុះល្បាតក្នុងភូមិ ដើម្បីកុំឱ្យមានចលនាតវ៉ាណាមួយកើតឡើងបន្តទៀត។ នេះបើតាមអ្នកតំណាងពលរដ្ឋភូមិកំពង់តាឡុងដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ