លោកអ៊ូ ច័ន្ទរ័ត្ន៖ បេសកកម្មពីរបីខែខាងមុខ គណបក្សកែទម្រង់កម្ពុជានឹងកៀងគរសំឡេងប្រឆាំងដើម្បីចូលរួមការបោះឆ្នោត
ក្រោយការទទួលបានភ្លើងខៀវភ្លាមៗពីក្រសួងមហាផ្ទៃក្នុងការចុះឈ្មោះជាគណបក្សនយោបាយ លោកអ៊ូ ច័ន្ទរ័ត្ន សហស្ថាបនិកគណបក្សកែទម្រង់កម្ពុជា បានអះអាងប្រាប់វិទ្យុបារាំងអន្តរជាតិនៅថ្ងៃសៅរ៍នេះ គណបក្សរបស់លោកនឹងចាប់ផ្តើមបេសកកម្មចំនួន២ចម្បង ដើម្បីត្រៀមខ្លួនចូលប្រកួតប្រជែងការបោះឆ្នោតឃុំ-សង្កាត់២០២២ខាងមុខ។ ការអះអាងនេះ ធ្វើឡើងបន្ទាប់ពីគណបក្សកែទម្រង់កម្ពុជា ដែលមានលោក ប៉ុល ហំម ជាប្រធាន និងលោកអ៊ូ ច័ន្ទរ័ត្ន ជាសហស្ថាបនិក ត្រូវបានក្រសួងមហាផ្ទៃផ្តល់ភ្លើងខៀវទទួលចុះជាគណបក្សនយោបាយហើយ កាលពីថ្ងៃទី១៥កញ្ញាកន្លងទៅនេះ។
ចុះផ្សាយនៅថ្ងៃ៖
ស្តាប់ - ០១:៥០
បេសកកម្មចម្បងធំៗចំនួន២ដែលត្រូវធ្វើនៅពេលនេះ គឺគណបក្សកែទម្រង់កម្ពុជានឹងចាប់ផ្តើមចុះទៅតាមមូលដ្ឋាន ដើម្បីរៀបចំរចនាសម្ព័ន្ធ និងសមាសភាពអ្នកឈរឈ្មោះគណបក្សតាមឃុំ-សង្កាត់ ក៏ដូចជាលើកស្លាកគណបក្សតាមខេត្តមួយចំនួន។ នេះបើតាមការបញ្ជាក់ពីលោកអ៊ូ ច័ន្ទរ័ត្ន សហស្ថាបនិកគណបក្សកែទម្រង់កម្ពុជា។
រីឯបេសកកម្មចម្បងមួយទៀតនោះ គឺការកៀងគរសំឡេងប្រឆាំងឲ្យមកចូលរួមជាមួយគណបក្សកែទម្រង់កម្ពុជាដើម្បីចូលរួមការបោះឆ្នោតនាពេលខាងមុខ។ លោកអ៊ូ ច័ន្ទរ័ត្ន បានគូសបញ្ជាក់ថា លោកនឹងមិនបោះបង់ជំហរ បង្រួបបង្រួមអ្នកដែលមាននិន្នាការប្រឆាំង ឲ្យមកចូលរួមជាមួយគណបក្សខ្លួននោះទេ។ តាមលោកអ៊ូ ច័ន្ទរ័ត្ន ការកៀងគរសំឡេងប្រឆាំងនេះទៀតសោតក៏មិនមែនសុទ្ធតែមកពីអតីតគណបក្សសង្រ្គោះជាតិនោះទេ ដោយលោកបញ្ជាក់ថា កន្លងមកគណបក្សកែទម្រង់កម្ពុជាក៏ធ្លាប់ជជែកជាមួយគណបក្សប្រជាធិបតេយ្យមូលដ្ឋានជាដើម។ល។
តែបើទោះបីជាធ្លាប់ជជែកគ្នាពិតមែនក្តី ក៏ប៉ុន្តែមកដល់ពេលនេះការកៀងគរសំឡេងប្រឆាំងណាមួយមកចូលរួមជាមួយគណបក្សកែទម្រង់កម្ពុជានៅមិនទាន់ទទួលបានផ្លែផ្កានោះទេ។ នេះដោយដ្បិតថាកន្លងមក គណបក្សមួយនេះនៅមិនទាន់ទទួលបានភាពស្របច្បាប់ពីក្រសួងមហាផ្ទៃ។ លោកអ៊ូ ច័ន្ទរ័ត្ន ដដែល បានបញ្ជាក់បន្ថែមទៀតថា តាមរយៈការចុះបញ្ជីស្របច្បាប់ជាគណបក្សនយោបាយរួចនៅពេលនេះ គណបក្សកែទម្រង់កម្ពុជានឹងរៀបចំយុទ្ធសាស្រ្ត និងបន្តបេសកកម្មជជែកពិភាក្សាជាមួយគណបក្សនយោបាយ និងអ្នកមាននិន្នាការក្រៅរដ្ឋាភិបាលមកចូលរួមជាមួយគ្នា។
បើតាមសហស្ថាបនិកគណបក្សរូបនេះ ការកៀងគរបានសំឡេងប្រឆាំងមកផ្តុំគ្នា ទើបជាលទ្ធភាពក្នុងការចូលប្រកួតប្រជែងជាមួយគណបក្សកាន់អំណាចនៅក្នុងការបោះឆ្នោតឃុំ-សង្កាត់ឆ្នាំ២០២២។ ហើយសម្រាប់គណបក្សកែទម្រង់កម្ពុជាប្តេជ្ញាថា នឹងចូលរួមឲ្យខានតែបានក្នុងកម្រិតណាមួយ ទោះបច្ចុប្បន្នសល់ពេលវេលាខ្លីក្នុងការរៀបចំ និងបញ្ហាយាយីដោយសារជំងឺកូវីដ១៩ក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ