ក្រសួងអប់រំផ្អាកដំណើរការថ្នាក់រៀនដោយកម្រិតនៅវិទ្យាល័យចំនួន៥ក្នុងរាជធានីភ្នំពេញបណ្តោះអាសន្ន ក្រោយបើកឡើងវិញបាន៣ថ្ងៃ
ក្រសួងអប់រំ យុវជន និងកីឡា នៅថ្ងៃសុក្រនេះបានសម្រេចផ្អាកដំណើរការថ្នាក់រៀនដោយផ្នែកជាបណ្តោះអាសន្នចំនួន១៤ថ្ងៃនៅចំពោះវិទ្យាល័យចំនួន៥ក្នុងភូមិសាស្រ្តរាជធានីភ្នំពេញ ហើយតម្រូវឲ្យអ្នកពាក់ព័ន្ធទាំងអស់ត្រូវធ្វើចត្តាឡីស័កចំនួន១៤ថ្ងៃ។ យ៉ាងណាមិនមានការបញ្ជាក់ពីមូលហេតុនៃការផ្អាកជាបណ្តោះអាសន្ននេះទេ ក៏ប៉ុន្តែបើតាមលិខិតរបស់ក្រសួងអប់រំ ការផ្អាកនេះគឺដើម្បីចូលរួមទប់ស្កាត់ ការរីករាលដាលនៃជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:២២
ការសម្រេចផ្អាកដំណើរការថ្នាក់រៀនជាបណ្តោះអាសន្ន១៤ថ្ងៃនេះ នឹងធ្វើឡើងនៅវិទ្យាល័យហ៊ុន សែន ពញាពន់ សម្រាប់ថ្នាក់ទី៩B វិទ្យាល័យបឹងប្រិយ៍ សម្រាប់ថ្នាក់ទី១២A1, ៩C1, ៩D1 វិទ្យាល័យវត្តភ្នំ សម្រាប់ថ្នាក់ទី៩H2,៩D2,៩B2, ៩B1,៩H2, ១២C2, ១២C1,១២B2និងថ្នាក់ទី១២H2 វិទ្យាល័យបឹងធំ សម្រាប់ថ្នាក់ទី៧A2 និងវិទ្យាល័យវត្តកោះសម្រាប់ថ្នាក់ទី៧F។ ភាគីដែលពាក់ព័ន្ធទាំងលោកគ្រូនិងសិស្សានុសិស្សនឹងតម្រូវឲ្យធ្វើចត្តាឡីស័កចំនួន១៤ថ្ងៃ។
ដោយឡែកសម្រាប់ថ្នាក់ដទៃទៀតដែលមិនពាក់ព័ន្ធ ក្រសួងអប់រំបានបញ្ជាក់ថាត្រូវដំណើរការជាធម្មតា តែក្នុងលក្ខខណ្ឌមួយចំនួន។ លក្ខខណ្ឌមួយចំនួនដែលតម្រូវឲ្យមានការរឹតត្បិតការចេញលេង និងបន្តពាក់ម៉ាស និងលាងដៃជាប្រចាំ មិនអនុញ្ញាតឲ្យមានទំនាក់ទំនងពីថ្នាក់មួយទៅថ្នាក់មួយ និងមិនអនុញ្ញាតឲ្យមានការជួបជុំ ក្រៅពីការសិក្សាក្នុងសាលារៀន។ នេះបើតាមលិខិតរបស់ក្រសួងអប់រំ យុវជន និងកីឡា ចុះនៅថ្ងៃទី១៧កញ្ញានេះ។
យ៉ាងណាក៏ដោយការសម្រេចផ្អាកដំណើរការថ្នាក់រៀនដោយកម្រិតនេះ មិនត្រូវបានបញ្ជាក់ពីមូលហេតុណាមួយឲ្យច្បាស់នោះឡើយ។ លោករស់ សុវាចា អ្នកនាំពាក្យក្រសួងអប់រំ យុវជន និងកីឡា បានបញ្ជាក់ប្រាប់វិទ្យុបារាំងអន្តរជាតិថា ក្រសួងអប់រំ យុវជន និងកីឡា នឹងជម្រាបពត៌មានជូនមហាជននាពេលខាងមុខ ក្រោមកិច្ចសហការជាមួយរដ្ឋបាលរាជធានីភ្នំពេញ ដើម្បីសម្រួល និងតម្រង់ទិសរៀបចំការរៀននិងបង្រៀនតាមបណ្តុំ ឲ្យកាន់តែប្រសើរ។ បើតាមលោករស់ សុវាចា ក្រសួងអប់រំ និងរដ្ឋបាលរាជធានីភ្នំពេញ បន្តផ្តល់អាទិភាពលើកកម្ពស់សុខភាព និងសុវត្ថិភាព សិស្សានុសិស្ស និងបុគ្គលិកអប់រំ ស្របនឹងការបន្តពង្រឹងការអនុវត្តវិធានការណ៍ចាំបាច់ ឲ្យរឹតតែមានប្រសិទ្ធភាព។
គួរបញ្ជាក់ថា ការសម្រេចផ្អាកជាបណ្តោះអាសន្នចំនួន១៤ថ្ងៃនៅវិទ្យាល័យចំនួន៥តាមកម្រិតថ្នាក់នេះ ធ្វើឡើងតែត្រឹម៣ថ្ងៃប៉ុណ្ណោះ បន្ទាប់ពីក្រសួងអប់រំ យុវជន និងកីឡា និងរដ្ឋបាលរាជធានីភ្នំពេញបានសម្រេចបើកដំណើរការសាលារៀនប្រមាណជាង២០០ក្នុងរាជធានីភ្នំពេញ កាលពីថ្ងៃពុធទី១៥កញ្ញាកន្លងទៅ។
ការបើកសាលារៀនឡើងវិញនេះ ត្រូវបានកំណត់ឲ្យមានការអនុវត្តគោលការណ៍ប្រតិបត្តិស្តង់ដារ និងវិធានសុខាភិបាលនានា ព្រមទាំងកំណត់ចំនួនសិស្សក្នុងថ្នាក់រៀនយ៉ាងច្រើនត្រឹម១៥នាក់ ក្នុងន័យ បញ្ចៀសហានិភ័យនៃការឆ្លងជំងឺកូវីដ១៩ចូលទៅក្នុងសាលារៀន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ