អត្រាឆ្លងជំងឺកូវីដប្រចាំថ្ងៃនៅកម្ពុជាហក់ឡើងខ្ពស់វិញ ខណៈមានការបើកដំណើរការសាលារៀនឡើងវិញ
ករណីឆ្លងកូវីដ១៩ប្រចាំថ្ងៃនៅកម្ពុជានាប៉ុន្មានថ្ងៃចុងក្រោយនេះ បានលោតឡើងខ្ពស់វិញ។ ជាក់ស្តែងនៅថ្ងៃទី១១កញ្ញានេះ កម្ពុជារកឃើញករណីឆ្លងថ្មីចំនួន ៦៥៨ករណី ក្នុងនោះ៤៩៨ករណីឆ្លងក្នុងសហគមន៍។ ដ្បិតភូមិសាស្ត្រខ្លះនៅបន្តអនុវត្តវិធានការរដ្ឋបាល តែសាលារៀននៅតាមតំបន់មួយចំនួនក៏បានប្រកាសបើកដំណើរការជាបន្តបន្ទាប់ដែរ។
ចុះផ្សាយនៅថ្ងៃ៖
ស្តាប់ - ០២:២៥
កាលពីអំឡុងចុងខែសីហា និងដើមខែកញ្ញា កម្ពុជាបានស្គាល់អត្រាឆ្លងកូវីដប្រចាំថ្ងៃត្រឹមខ្ទង់៤០០នាក់ប៉ុណ្ណោះ តែក្នុងរយៈពេលប៉ុន្មានថ្ងៃចុងក្រោយនេះ ចំនួនអ្នកឆ្លងបានហក់ឡើងខ្ពស់ខ្ទង់ជាង៦០០ និងជិត៧០០នាក់ក្នុងមួយថ្ងៃវិញដែលភាគច្រើនជាករណីឆ្លងក្នុងសហគមន៍។
គួរជ្រាបដែរថា ចំនួនករណីឆ្លងកូវីដ១៩នៅកម្ពុជាបានលោតឡើងខ្ពស់លើសករណីឆ្លងនៅប្រទេសចិនទៅទៀត។ យោងតាមតួលេខចុងក្រោយនៅថ្ងៃទី១១កញ្ញានេះ កម្ពុជាមានករណីឆ្លងកូវីដសរុបចំនួន ៩៨៨៤២នាក់ខណៈប្រទេសចិនវិញ មានករណីឆ្លងសរុប ៩៥១៥៣នាក់។
ក្រៅពីនេះ ឥទ្ធិពលនៃការរាតត្បាតនៃមេរោគកូវីដ១៩បំប្លែងថ្មី ដែលតា ក៏កាន់តែច្រើនទៅៗផងដែរ។ គិតត្រឹមថ្ងៃទី៩កញ្ញា កម្ពុជាមានវត្តមានដែលតាសរុប ៣៧៣១ករណី ដែលកើតមានភាគច្រើនជាងគេនៅរាជធានីភ្នំពេញចំនួន ១២៥៦ករណី បន្ទាយមានជ័យ ៨២៧ករណី និងជាច្រើនករណីទៀតមាននៅតាមបណ្តាខេត្តនានាលើកលែងតែខេត្តកែបមួយប៉ុណ្ណោះ។
ដ្បិតភូមិសាស្ត្រខ្លះនៅបន្តអនុវត្តវិធានការរដ្ឋបាលទប់ស្កាត់ការចម្លងជំងឺកូវីដហើយក្តី តែសាលារៀននៅតាមតំបន់មួយចំនួនក៏បានប្រកាសបើកដំណើរការជាបន្តបន្ទាប់ដែរ។ តួយ៉ាងនៅរាជធានីភ្នំពេញ ខេត្តកណ្តាល និងខេត្តព្រៃវែង បានប្រកាសបើកដំណើរការគ្រឹះស្ថានសិក្សារដ្ឋ និងឯកជនសម្រាប់កម្រិតអនុវិទ្យាល័យ និងវិទ្យាល័យ នៅថ្ងៃទី១៥កញ្ញា សប្តាហ៍ក្រោយនេះ។
សូមជម្រាបថា ការបើកដំណើរការសាលារដ្ឋ និងឯកជនឡើងវិញនេះ ត្រូវអាជ្ញាធរដែនដីណែនាំឲ្យសាលានីមួយៗ ត្រៀមលក្ខណៈសម្បត្តិឲ្យបានគ្រប់គ្រាន់ស្របតាមគោលការណ៍ប្រតិបត្តិស្តង់ដា (SOP) របស់ក្រសួងអប់រំ យុវជន និងកីឡា។ គោលការណ៍ប្រតិបត្តិស្តង់ដា (SOP) នោះ បានកំណត់នូវលក្ខខណ្ឌតម្រូវជាច្រើន ដើម្បីឲ្យសាលារៀនដែលចង់បើកដំណើរការឡើងវិញ អនុវត្តន៍ឲ្យបាន ដើម្បីធានានូវបទដ្ឋានអានាម័យដែលក្រសួងសុខាភិបាល និងអង្គការសុខភាពពិភពលោកបានកំណត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ