គយប្រកាសបន្ថយពន្ធ១០%ដល់រថយន្តដែលមិនទាន់បង់ពន្ធនាំចូលរហូតដល់ដំណាច់ឆ្នាំនេះ
អគ្គនាយកដ្ឋានគយ និងរដ្ឋាករកម្ពុជា នឹងបន្ធូរបន្ថយពន្ធចំនួន ១០ភាគរយនៃទឹកប្រាក់ពន្ធអាករសរុបដែលត្រូវបង់ ដល់រថយន្តដែលមិនទាន់បង់ពន្ធនាំចូល រហូតដល់ដំណាច់ឆ្នាំ ២០២១នេះ។ ជាមួយគ្នា អាជ្ញាធរ ក៏សម្រេចផ្អាកសកម្មភាពបង្ក្រាបយានយន្តនៅភូមិសាស្ត្រក្នុងប្រទេសមួយរយៈ លើកលែងតែតំបន់តាមព្រំដែន ចាប់ពីពេលនេះ រហូតដល់ចុងឆ្នាំ ២០២១ដែរ។ ក្នុងសេចក្តីជូនដំណឹងចុះថ្ងៃទី ៩ខែកញ្ញា អគ្គនាយកដ្ឋានគយ និងរដ្ឋាករកម្ពុជា បញ្ជាក់ថា វិធានាការនេះ គឺដើម្បីលើកទឹកចិត្ត ក៏ដូចជាទុកពេលឱ្យម្ចាស់យានយន្តជ្រកក្រោមផ្លាកលេខផ្សេងៗ មិនទាន់បានបង់ពន្ធអាករ មានពេលវេលាគ្រប់គ្រាន់មកបំពេញកាតព្វកិច្ចពន្ធ និងអាករតាមច្បាប់។
ចុះផ្សាយនៅថ្ងៃ៖
ស្តាប់ - ០២:០៩
យោងតាមសេចក្តីជូនដំណឹង ៥ចំនុច អគ្គនាយកដ្ឋានគយ និងរដ្ឋាករកម្ពុជា បានលម្អិតថា ម្ចាស់យានយន្ត ដែលជ្រកក្រោមផ្លាកលេខផ្សេងៗ ដូចជាផ្លាកលេខរដ្ឋ ផ្លាកលេខ ខ.ម និងន.ប ដែលមានចង្កូតឆ្វេង និងមានឆ្នាំផលិតមុនឆ្នាំ ២០២១ នឹងទទួលបានការអនុគ្រោះបន្ធូរបន្ថយពន្ធចំនួន ១០ភាគរយនៃទឹកប្រាក់ពន្ធអាករសរុបដែលត្រូវបង់។ ការបន្ធូរបន្ថយនេះ មានឱសាទវាទអនុវត្តត្រឹមថ្ងៃទី ៣១ខែធ្នូ ឆ្នាំ ២០២១។ ហើយចាប់ពីថ្ងៃទី ១ខែមករា ឆ្នាំ ២០២២ រហូតដល់ថ្ងៃទី ៣០ខែមិថុនា ឆ្នាំ ២០២២ គឺជាថ្ងៃឱសាទវាទចុងក្រោយនៃការអនុញ្ញាតឲ្យចូលខ្លួនមកបង់ពន្ធ ដែលម្ចាស់យានយន្ត ត្រូវបំពេញកាតព្វកិច្ចពន្ធ និងអាករពេញលេញដោយគ្មានការអនុគ្រោះបន្ធូរបន្ថយពន្ធឡើយ។
ចំពោះករណីររថយន្តចង្កូតស្តាំវិញ អគ្គនាយកដ្ឋានគយ ឱ្យដឹងថា ម្ចាស់រថយន្ត ក៏ត្រូវមកតម្កល់ប្រាក់កក់ស្មើនឹងប្រាក់ពន្ធ និងអាករសរុបដក ១០ភាគរយ ហើយត្រូវយករថយន្តទៅកែចង្កូតពីស្តាំមកឆ្វេង ឱ្យបានរួចរាល់យ៉ាងយូរត្រឹមថ្ងៃទី ៣០ខែមិថុនា ឆ្នាំ ២០២២។ ក្រោយការប្តូរចង្កូតហើយ ម្ចាស់រថយន្តអាចទទួលបង្កាន់ដៃពន្ធ និងលត្តាបត្ររថយន្តពីមន្ត្រីគយ។
ទាក់ទងនឹងការអនុវត្តច្បាប់ក្រោយការបន្ធូរបន្ធយទាំងនេះ អគ្គនាយកដ្ឋាន បានសង្កត់ធ្ងន់ថា ចាប់ពីថ្ងៃទី ១ខែកក្កដា ឆ្នាំ ២០២២តទៅ យានយន្តគ្មានពន្ធដែលបង្ក្រាបបាន នឹងត្រូវតម្រូវឱ្យបង់ពន្ធ និងអាកររួមទាំងប្រាក់ពិន័យតាមច្បាប់។ ឯរថយន្តចង្កូតស្តាំ ដែលជាប្រភេទរថយន្តហាមនាំចូល ក្នុងករណីបង្ក្រាបបាន នឹងត្រូវកំទេចចោល ឬ ដោះបំបែកជាគ្រឿងបន្លាស់។
គួរជម្រាបជូនថា សេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជា នៅពេលនេះ គឺក្រោយពេលទីស្តីការគណៈឫដ្ឋមន្ត្រី កាលពីថ្ងៃទី ២ខែកញ្ញាកន្លងទៅនេះ បានស្នើឱ្យរដ្ឋមន្ត្រីក្រសួងមហាផ្ទៃ ក្រសួងការពារជាតិ និងក្រសួងសេដ្ឋកិច្ច អនុវត្តវិធានការលើការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ ២០២១ ជាលើកចុងក្រោយ ចំពោះយានយន្តឯកជនដែលជ្រកក្រោមផ្លាកលេខ ក្រសួង ស្ថាប័នរដ្ឋ ជាពិសេស ផ្លាកលេខ ខ.ម និង ន.ប ដើម្បីឱ្យម្ចាស់ចូលខ្លួនមកបំពេញកាតព្វកិច្ចពន្ធ និងអាករនាំចូលស្របតាមច្បាប់គយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ