FTA កម្ពុជា-ចិន បានឆ្លងកាត់សភាហើយ ក្រោយចុះហត្ថលេខាពីរដ្ឋាភិបាលទាំងពីររយៈពេលជិត១ឆ្នាំ
រដ្ឋសភាប្រទេសកម្ពុជា នៅព្រឹកថ្ងៃព្រហស្បតិ៍នេះ បានអនុម័តជាឯកច្ឆ័ន្ទនៃសម្លេងសមាជិកសភាវត្តមាន ៩៤នាក់ លើ៩៤ នូវសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរី រវាងប្រទេសកម្ពុជា និងចិន។ ការអនុម័តសេចក្តីព្រាងច្បាប់ដ៏សំខាន់នេះ ធ្វើឡើងជិតមួយឆ្នាំ ក្រោយការចុះហត្ថលេខាពីរដ្ឋមន្ត្រីពាណិជ្ជកម្មនៃប្រទេសទាំងពីរ កាលពីខែកក្កដា ឆ្នាំ២០២០ អំឡុងពេលទស្សនកិច្ចរបស់ប្រមុខការទូតចិនលោក វ៉ាង យី នៅកម្ពុជា។
ចុះផ្សាយនៅថ្ងៃ៖
ស្តាប់ - ០៣:១៥
តាមពិតទៅសេចក្តីព្រាងច្បាប់ស្តីពីកិច្ចព្រមព្រៀងពាណិជ្ជកម្មសេរី(FTA) កម្ពុជា-ចិន ពិតជាមានសារៈសំខាន់សំរាប់ប្រទេសកម្ពុជា ក្នុងការប្រើប្រាស់ច្បាប់នេះ ជាឧបរករណ៍ជួយស្តារឡើងវិញវិស័យសេដ្ឋកិច្ច ដែលរងគ្រោះដោយសារវិបត្តិកូវីដ-១៩។ ក៏ប៉ុន្តែអស់ពេល១ឆ្នាំកន្លងទៅហើយ ច្បាប់ដ៏ចាំបាច់នេះ ទើបតែទទួលបានការអនុម័តពីរដ្ឋសភាជាតិ។
សេចក្តីព្រាងច្បាប់ស្តីពីកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលមាន១៦ជំពូក និងជាង១៤០មាត្រានោះ បានកើតឡើងកាលពីថ្ងៃទី២២ ខែមករា ឆ្នាំ២០១៩ តាមរយៈការជួបជជែកគ្នារវាងប្រមុខរដ្ឋាភិបាលនៃប្រទេសទាំងពីរ។ ផ្តើមចេញពីនេះរដ្ឋាភិបាលកម្ពុជា-ចិន ក៏បានចាត់ឲ្យក្រុមការងារនៃប្រទេសទាំងពីរចាប់ផ្តើមធ្វើការ ដោយសិក្សាពីផលចំណេញ និងការប្រឈម ដើម្បីពង្រីកកំណើនសេដ្ឋកិច្ចនៃប្រទេសទាំងពីរ។ សេចក្តីព្រាងច្បាប់នេះ បានឆ្លងកាត់ការចរចារវាងអ្នកជំនាញកម្ពុជា និងចិន ចំនួន៣ជុំ គឺចាប់ផ្តើមពីខែមករា ឆ្នាំ២០២០ រហូតដល់ខែមិថុនា ឆ្នាំ២០២០។
FTA កម្ពុជា-ចិន ត្រូវបានប្រកាសបញ្ចប់ការចរចាដោយរដ្ឋមន្ត្រីពាណិជ្ជកម្មនៃប្រទេសទាំងពីរនៅថ្ងៃទី២០ ខែកក្កដា ឆ្នាំ២០២០ ហើយកិច្ចព្រមព្រៀងនេះ ត្រូវបានចុះហត្ថលេខានៅថ្ងៃទី៩ ខែតុលា ឆ្នាំ ២០២០ តាមប្រព័ន្ធវីដេអូ ក្នុងអំឡុងពេលទស្សនកិច្ចរបស់លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិន នៅកម្ពុជា។ យោងតាមមាត្រា ១៦.២ កិច្ចព្រមព្រៀងនេះ ត្រូវចូលជាធរមានក្នុងរយៈពេល៣០ថ្ងៃ បន្ទាប់ពីភាគីទាំងពីរបានបំពេញនីតិវិធីផ្ទៃក្នុងរបស់ខ្លួនចប់សព្វគ្រប់ និងបានផ្លាស់ប្តូរលិខិតុបករណ៍នៃការផ្តល់សច្ចាប័នតាមផ្លូវការទូត។
ជារួមសេចក្តីព្រាងច្បាប់ស្តីពីពាណិជ្ជកម្មសេរីកម្ពុជា-ចិន នេះត្រូវបានធ្វើឡើងក្នុងគោលបំណង ធ្វើសេរីភាវូបនីយកម្ម និងសម្រួលពាណិជ្ជកម្មទំនិញរវាងភាគីទាំងពីរ តាមរយៈការកាត់បន្ថយ និងលុបបំបាត់ពន្ធគយ និងរបាំងមិនមែនពន្ធគយ ដោយធានាថាស្តង់ដា បទប្បញ្ញត្តិបច្ចេកទេស និងនីតិវិធីវាយតម្លៃអនុលោមភាព មិនបង្កជាឧបសគ្គដល់ការធ្វើពាណិជ្ជកម្ម។
ជាក់ស្តែងប្រទេសកម្ពុជានឹងទទួលបានអត្ថប្រយោជន៍ពីកិច្ចព្រមព្រៀងនេះ ដូចជាអត្រាពន្ធគយអនុវត្ត០% ភា្លមៗមានចំនួន ៨ ៣២៨បន្ទាត់ពន្ធ ស្មើនឹង៩៧,៤៤% នៃបន្ទាត់ពន្ធសរុប។ អត្រាពន្ធគយអនុវត្ត០% ក្នុងរយៈពេល៥ឆ្នាំ មានចំនួន៦បន្ទាត់ពន្ធ ស្មើនឹង ០,០៧% នៃបន្ទាត់ពន្ធសរុបជាដើម។ សរុបមុខទំនិញ ដែលកម្ពុជាទទួលបានការបញ្ចុះពន្ធគយទៅ០% មាន ៨ ៣៣៦ បន្ទាត់ពន្ធគយ ស្មើនឹងប្រមាណ ៩៧,៥៣% នៃបន្ទាត់ពន្ធគយសរុប។
ក្រៅពីនេះ តាមរយៈសេចក្តីព្រាងច្បាប់នេះ កម្ពុជាទទួលបានអត្ថប្រយោជន៍ដ៏ធំធេងជាច្រើនទៀតនៅក្នុងវិស័យពាណិជ្ជកម្មជាមួយចិន ដែលការនេះអាចជួយពង្រឹងសមត្ថភាពរបស់កម្ពុជា ក្នុងការបន្តសមាហរណកម្មខ្លួនចូលក្នុងសេដ្ឋកិច្ចតំបន់ និងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ