WHO៖កម្ពុជាបានស្គាល់ភាពធូរស្រាលល្អជាងមុនពីការចម្លងវីរុសកូវីដ១៩នៅក្នុងសហគមន៍
តំណាងអង្គការសុខភាពពិភពលោកប្រចាំនៅកម្ពុជានៅថ្ងៃទី០៦កញ្ញាបានលើកឡើងថា ស្ថានភាពជំងឺកូវីដ១៩ នៅកម្ពុជានាបច្ចុប្បន្ន មានភាពធូរស្រាលបានល្អជាងមុន បើធៀបនឹងរយៈពេលជាង៣ខែមុននេះ។ តាមរយៈភាពធូរស្រាលនេះ កម្ពុជាបានសម្រេចចិត្តត្រឹមត្រូវហើយ ក្នុងការបើកសាលារៀនជាដំណាក់កាលឡើងវិញ។ នេះបើតាមលោកស្រី Li Ailan។
ចុះផ្សាយនៅថ្ងៃ៖
ស្តាប់ - ០២:១៣
លោកស្រី Li Ailan បានគូសបញ្ជាក់ថា ភាពធូរស្រាលនៃជំងឺកូវីដ១៩ដែលកម្ពុជាទទួលបាននៅពេលនេះ កើតចេញពីសកម្មភាពមួយចំនួនរបស់រដ្ឋាភិបាលគឺការអនុវត្តវិធានការសុខាភិបាលដែលមិនមែនជាឱសថ រួមដំណើរជាមួយនឹងដំណើរការចាក់វ៉ាក់សាំងបង្ការកូវីដ១៩ និងការបង្កើតសមត្ថភាពនៃការព្យាបាលជំងឺកូវីដ១៩។ ទោះជាកម្ពុជាបានស្គាល់ភាពធូរស្រាលពីការចម្លងវីរុសកូវីដ១៩ យ៉ាងណាក្ដី កម្ពុជាមិនត្រូវប្រហែសខ្លួនពីការបង្ការនិងអនុវត្តវិធានការដែលធ្លាប់ដាក់ចេញនាពេលកន្លងមកនោះទេព្រោះបច្ចុប្បន្នកម្ពុជានៅតែពើបប្រទះនឹងវត្តមានមេរោគដែលតា មេរោគកូវីដអាល់ហ្វាល និងមេរោគកូវីដបំប្លែងខ្លួនមួយចំនួនទៀត។
ចំពោះដំណើការបើកសាលាឡើងវិញជាដំណាក់កាល លោកស្រី Li Ailan បានចាត់ទុកជាដំណឹងដ៏រីករាយសម្រាប់អង្គការពាក់ព័ន្ធដែលធ្លាប់ជម្រុញដំណើការនេះកន្លងមកមានដូចជាៈ អង្គការយូនីសេហ្វ អង្គការយូណេស្កូ និងអង្គការសុខភាពពិភពជាដើម។
លោកស្រីបន្តថា មានហេតុផលសមស្របមួយចំនួនដែលកម្ពុជា សម្រេចចិត្តត្រឹមត្រូវបើកសាលារៀនជាដំណាក់កាលឡើងវិញដោយផ្អែកតាមលក្ខណៈវិទ្យាសាស្ត្រ សិស្សនុសិស្សនិងសាលារៀនផ្ទាល់មិនជាដើមហេតុនាំឲ្យមានការចម្លងវីរុសកូវីដ១៩ ជាលក្ខណៈទ្រង់ទ្រាយធំចូលក្នុងសហគមន៍នោះទេ។ ផ្ទុយមកវិញប្រភពដែលនាំឲ្យកម្ពុជាមានការចម្លងវីរុសកូវីដ១៩ទ្រង់ទ្រាយធំចូលក្នុងសហគមន៍គឺកើតចេញពីទីតាំងអាជីវកម្មដូចជាៈ កាស៊ីណូ បណ្ដាលរោងចក្រ ពន្ធគារ ផ្សារមួយចំនួន ការជួបជុំប្រមូលផ្ដុំគ្នាជាលក្ខណៈគ្រួសារជាដើម។ ម្យ៉ាងទៀតកុមារមានភាគរយតិចពីការឆ្លងវីរុសកូវីដ១៩មិនថា នៅកម្ពុជាឬនៅក្នុងពិភពលោកនោះទេ។ ហើយកន្លងមក ការបិទសាលាបានជះផលប៉ះពាល់ខ្លាំងមែនទែនដល់កុមារពាក់ព័ន្ធបញ្ហាផ្លូវចិត្ត។ សម្រាប់អាជីវកម្មផ្សេងៗដែលចង់បើកដំណើរការឡើងវិញគួររងចាំមើលបទពិសោធន៍ពីដំណើរការបើកសាលាឡើងវិញសិន។ នេះបើតាមលោកស្រីតំណាងអង្គការសុខភាព។
បន្ថែមពីលើនេះលោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានអំពាវនាវឲ្យពលរដ្ឋកុំរារែក ក្នុងការចាក់វ៉ាក់សាំងដូសទី៣ដែលជាដូសជម្រុញឲ្យសោះ ព្រោះដូចជម្រុញវានឹងបង្កើនប្រសិទ្ធិភាពកាន់តែខ្លាំងក្នងការទប់ស្កាត់ការចម្លងវីរុសកូវីដ១៩។ ក្នុងនោះមានពលរដ្ឋប្រមាណជាកន្លះលាននាក់ហើយបានចាក់វ៉ាក់សាំងដូសជម្រុញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ