លោកកឹម សុខា គូសបញ្ជាក់ជាថ្មីថា មានតែមេធាវីប៉ុណ្ណោះដែលអាចនិយាយតំណាងឱ្យលោកបាន
ជាថ្មីម្តងទៀត លោកកឹម សុខា ប្រធានអតីតគណបក្សសង្រ្គោះជាតិ បានចេញមកទាត់ចោលរាល់ការយកឈ្មោះ និងរូបភាពរបស់លោកទៅភ្ជាប់នឹងសកម្មភាពនយោបាយរបស់បុគ្គល ក្រុម ឬគណបក្សនយោបាយនានា។ នៅក្នុងសំណេរលើបណ្ដាញសង្គមនាថ្ងៃអាទិត្យទី០៥កញ្ញានេះ លោកកឹម សុខា គូសបញ្ជាក់ថា គឺមានតែក្រុមមេធាវីរបស់លោកប៉ុណ្ណោះ ដែលមានសិទ្ធិធ្វើសេចក្តីថ្លែងការណ៍ ឬសេចក្តីប្រកាសតំណាងឱ្យរូបលោកបាន។
ចុះផ្សាយនៅថ្ងៃ៖
ស្តាប់ - ០១:៥៤
គឺតាមរយៈទំព័រហ្វេសប៊ុក លោកកឹម សុខា បានសរសេរបញ្ជាក់ថា មានបុគ្គល ក្រុម គណបក្ស ឬ ចលនានយោបាយខ្លះ នៅតែយកឈ្មោះ និង រូបភាពរបស់លោកទៅភ្ជាប់ពាក់ព័ន្ធជាមួយនឹងសកម្មភាពផ្សេងៗ ដើម្បីបម្រើផលប្រយោជន៍ និង មហិច្ឆិតារបស់ពួកគេ។ អាស្រ័យហេតុដូច្នេះហើយ លោកកឹម សុខា បានគូសបញ្ជាក់ជាថ្មីថា គឺទាល់តែសេចក្តីថ្លែងការណ៍ ឬសេចក្តីប្រកាសរបស់សហមេធាវីដែលជាតំណាងស្របច្បាប់របស់លោក ទើបធ្វើក្នុងនាមរូបលោក និងជាឆន្ទៈរបស់លោក។
សាររបស់លោកកឹម សុខា លើកនេះ ក៏មិនខុសគ្នានឹងរាល់ដងដែរ គឺលោកមិនបានចុចឱ្យចំឈ្មោះទៅលើបុគ្គល ក្រុម ឬគណបក្សនយោបាយណាមួយឡើយ។ ប៉ុន្តែកន្លងមក គេសង្កេតឃើញមានក្រុម និងគណបក្សនយោបាយដែលទើបបង្កើតថ្មីមួយចំនួន តែងតែលើកឡើងពីសារនយោបាយរបស់ពួកគេ ដោយភ្ជាប់ទៅនឹងលោកកឹម សុខា និងឆន្ទៈនយោបាយរបស់លោក ខណៈរូបលោកកំពុងជាប់រឿងក្តីក្តាំនៅតុលាការ និងកំពុងត្រូវបានតុលាការហាមមិនឱ្យធ្វើសកម្មភាពពាក់ព័ន្ធនឹងនយោបាយ។
នៅចុងក្រោយនេះ បើតាមការកត់សម្គាល់ ឈ្មោះ និងរូបភាពលោកកឹម សុខា ត្រូវបានលោកសម រង្ស៊ី និងក្រុមរបស់លោក យកទៅប្រើប្រាស់នៅក្នុងពិធីជួបជុំជាមួយអ្នកគាំទ្រនៅលើទឹកដីអាមេរិក កាលពីថ្ងៃទី២២ ខែសីហា ឆ្នាំ២០២១។ នៅក្នុងពិធីជួបជុំនោះ រូបលោកសម រង្ស៊ី និងលោកកឹម សុខា ចាប់ដៃគ្នាលើកឡើងទៅលើ ត្រូវបានគេដាក់តាំងនៅខាងក្រោយតុគណៈអធិបតី ហើយពាក្យថា សម រង្ស៊ី និងកឹម សុខា ជាមនុស្សតែមួយក៏ត្រូវបានលោកសម រង្ស៊ី លើកឡើងប្រាប់ទៅអ្នកគាំទ្រផងដែរនៅពេលនោះ។
ប៉ុន្តែ ការប្រើប្រាស់ឈ្មោះ និងរូបភាពលោកកឹម សុខានេះ ត្រូវបានក្រុមមេធាវីលោកកឹម សុខា ចេញមកបញ្ជាក់ហាមឃាត់តាំងពីដំបូងតាមរយៈសេចក្តីថ្លែងការណ៍។ ជាមួយនឹងការហាមឃាត់ ក្រុមមេធាវីក៏បានព្រមានដល់បុគ្គល ឬក្រុមដែលធ្វើសកម្មភាពបែបនេះ ត្រូវហ៊ានទទួលខុសត្រូវដោយខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ