រដ្ឋាភិបាលប្រាប់ឲ្យខេត្តរៀបចំទីតាំងចាក់វ៉ាក់សាំង ខណៈយុទ្ធនាការជុំទី១ជិតបិទដោយសល់ពេលតែជាង៣០ថ្ងៃ
កម្ពុជាត្រៀមបិទបញ្ចប់យុទ្ធនាការចាក់វ៉ាក់សាំងបង្ការកូវីដ១៩ជុំទី១ នៅរវាងចុងខែតុលា ឬដើមខែវិច្ឆិកាស្របពេលដែលល្បឿនចាក់វ៉ាក់សាំងដើរជិតដល់គោលដៅ១២លាននាក់ ក្រោយដំណើរការចាក់វ៉ាក់សាំងជូនពលរដ្ឋដែលមានអាយុចាប់ពី១២ឆ្នាំឡើងទៅសម្រេចបាន៨៩ភាគរយ។ ខណៈយុទ្ធនាការចាក់វ៉ាក់សាំងជុំទី១ជិតបិទបញ្ចប់ដោយសល់ពេលវេលាតែជាង៣០ថ្ងៃទៀតនោះ រដ្ឋាភិបាលប្រាប់ឲ្យខេត្តទូទាំងប្រទេសរៀបចំទីតាំងចាក់វ៉ាក់សាំងនៅមូលដ្ឋានដោយឥតគិតថ្លៃ។ នេះបើផ្អែកតាមសេចក្ដីណែនាំរបស់រដ្ឋាភិបាលនៅថ្ងៃទី២៨សីហាម្សិលមិញ។
ចុះផ្សាយនៅថ្ងៃ៖
ស្តាប់ - ០២:០៤
មុនឈានទៅបិទបញ្ចប់យុទ្ធនាការជុំទី១នៅទូទាំងប្រទេស កម្ពុជាត្រូវផ្ដើមបិទបញ្ចប់ការចាក់វ៉ាក់សាំងនៅថ្នាក់មូលដ្ឋានសិន ដោយក្នុងនោះរដ្ឋាភិបាលប្រាប់ឲ្យអភិបាលខេត្តទាំងអស់ ត្រូវរៀបចំបច្ចុប្បន្នកម្មឡើងវិញឲ្យបានច្បាស់លាស់និងឆាប់រហ័សពីចំនួនប្រជាជននៅមូលដ្ឋានដែលចាក់វ៉ាក់សាំងហើយ ដើម្បីកែសម្រួលផែនការចាក់វ៉ាក់សាំងផ្អែកតាមចំនួនប្រជាជនជាក់ស្ដែង។ តែត្រូវញែកចេញចំនួនប្រជាជនចំណាកស្រុក ដែលអាចទទួលការចាក់វ៉ាក់សាំងកូវីដ១៩នៅទីកន្លែងផ្សេង។
ក្រោយធ្វើបច្ចុប្បន្នភាពចំនួនប្រជាជនជាក់ស្ដែងបានចាក់វ៉ាក់សាំងក្នុងមូលដ្ឋានរួច គណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស និងគណៈអភិបាលរាជធានី-ខេត្ត ត្រូវសហការគ្នាកំណត់ទីតាំងសម្រាប់ផ្ដល់សេវាចាក់វ៉ាក់សាំងជូនដល់ប្រជាពលរដ្ឋដោយឥតគិតថ្លៃ នៅតាមមន្ទីរពេទ្យបង្អែកស្រុក ខណ្ឌ ឬតាមមណ្ឌលសុខភាព។ បន្ទាប់មកអាជ្ញាធរត្រូវជូនដំណឹងជាសាធារណៈ ដើម្បីអនុញ្ញាតឲ្យប្រជាជនដែលមិនទាន់បានការចាក់វ៉ាក់សាំងអាចទៅទទួលការចាក់វ៉ាក់សាំងនេះបាន នៅតាមទីតាំងដែលបានកំណត់។
ស្របពេលដែលយុទ្ធនាការចាក់វ៉ាក់សាំងជុំទី១ សល់ពេលប្រមាណតែជាងសាបសិបថ្ងៃទៀត រដ្ឋាភិបាលកម្ពុជាបានក្រើនរំឮកឲ្យភាគីពាក់ព័ន្ធឲ្យឆ្លើយតបឲ្យទាន់ពេលវេលា ចំពោះដំណើរការចាក់វ៉ាក់សាំងជូនពលរដ្ឋនៅថ្នាក់មូលដ្ឋានឲ្យទាន់ពេលវេលា និងមិនត្រូវខ្វះវ៉ាក់សាំងផ្ដល់ជូនដល់បណ្ដាលខេត្តឡើយ ដោយត្រូវគោរពតាមអភិក្រម«មិនអនុញ្ញាត្តឲ្យមានវ៉ាក់សាំងដេកក្នុងឃ្លាំង ក្នុងពេលដែលប្រជាជនត្រូវការវ៉ាក់សាំងនោះទេ»។
នៅចំពោះមុខល្បឿនចាក់វ៉ាក់សាំង និងដំណើរការចាក់វ៉ាក់សាំងដូសជម្រុញរបស់រដ្ឋាភិបាលនៅពេលនេះ គឺធ្វើយ៉ាងណាត្រៀមលក្ខណៈសម្រាប់ផែនការបើកដំណើរការប្រទេសពេញលេញឡើងវិញលើគ្រប់វិស័យ និងការរស់នៅជាមួយជំងឺកូវីដ១៩ តាមគន្លងប្រក្រីភាពថ្មី។ សូមជម្រាបដែរថា វិស័យអាទិភាពមួយដែលគ្រប់គ្នាចង់ឃើញដំណើរការឡើងវិញឆាប់ៗនោះគឺវិស័យអប់រំ។ នេះក៏ព្រោះតែវិស័យអប់រំការបង្រៀនតាមអនឡាញនៅគ្រានេះផ្ទេរចំណេះដឹងបានតិចបំផុតដល់សិស្សានុសិស្ស ហើយការបិទសាលាក៏បានធ្វើឲ្យសិស្សានុសិស្សមួយចំនួនធំប្រឈមនឹងសម្ពាធផ្លូវចិត្តផងដែរ។ នេះបើតាមអ្នកជំនាញធ្វើការក្នុងវិស័យអប់រំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ