លោកអ៊ូ ច័ន្ទរ័ត្ន បារម្ភការចុះបញ្ជីបក្សកែទម្រង់កម្ពុជាមិនរលូន ដោយសារគម្រោងបង្រួបបង្រួមជាមួយបក្សផ្សេង
នៅពេលនេះ ថ្នាក់ដឹកនាំគណបក្សកែទម្រង់កម្ពុជាកំពុងកែសម្រួលលើលក្ខន្តិកៈទៅតាមការតម្រូវរបស់ក្រសួងមហាផ្ទៃកម្ពុជា។ សហស្ថានិកគណបក្សកែទម្រង់កម្ពុជា លោកអ៊ូ ច័ន្ទរ័ត្ន បានលើកឡើងឱ្យដឹងថា នៅសប្តាហ៍ក្រោយ គណបក្សនឹងបញ្ជូនឯកសារកែតម្រូវរួចរាល់ទៅកាន់ក្រសួងមហាផ្ទៃ ដើម្បីចុះបញ្ជីគណបក្សជាផ្លូវការ។ ប៉ុន្តែលោកក៏បានព្រួយបារម្ភដែរដោយខ្លាចក្រែងដំណើរការចុះបញ្ជីមិនរលូនដូចការគ្រោងទុក បន្ទាប់ពីរូបលោកបានបង្ហាញចេតនាចង់កៀងគរអ្នកនយោបាយអតីតគណបក្សសង្រ្គោះជាតិមករួបរួមគ្នា។
ចុះផ្សាយនៅថ្ងៃ៖
ស្តាប់ - ០២:០៤
តាមរយៈវិទ្យុបារាំងអន្តរជាតិនៅព្រឹកថ្ងៃចន្ទនេះ លោកអ៊ូ ច័ន្ទរ័ត្ន សហស្ថាបនិកគណបក្សកែទម្រង់កម្ពុជាបានអះអាងថា គណបក្សកែទម្រង់កម្ពុជាមានការបារម្ភខ្លះៗពាក់ព័ន្ធនឹងដំណើរការចុះបញ្ជីនៅក្រសួងមហាផ្ទៃ បន្ទាប់ពីលោកបានប្រកាសកៀងគរអ្នកនយោបាយនៃអតីតគណបក្សប្រឆាំងមករួបរួមគ្នាជាធ្លុងមួយ ដើម្បីប្រកួតប្រជែងជាមួយនឹងគណបក្សកាន់អំណាច។ សម្រាប់លោកអ៊ូ ច័ន្ទរ័ត្ន ការប្រកាសនេះ អាចនឹងធ្វើឱ្យគណបក្សប្រជាជនកម្ពុជារឹតបន្តឹងមកលើគណបក្សទើបបង្កើតថ្មីរបស់លោក។ តែទោះជាបែបនេះក្តី លោកអ៊ូ ច័ន្ទរ័ត្ន នៅតែមានជំនឿថា ក្រសួងមហាផ្ទៃកម្ពុជា នឹងធ្វើការងារដោយត្រឹមត្រូវលើការចុះបញ្ជីគណបក្សកែទម្រង់កម្ពុជា។
ការព្រួយបារម្ភរបស់លោកអ៊ូ ច័ន្ទរ័ត្ននេះ កើតឡើងក្រោយពីក្រសួងមហាផ្ទៃ កាលពីថ្ងៃ២០ខែសីហា បានស្នើឱ្យស្ថាបនិកគណបក្សកែទម្រង់កម្ពុជា ត្រួតពិនិត្យឡើងវិញនូវសំណុំឯកសារ ដែលស្នើសុំចុះបញ្ជីគណបក្សនយោបាយ ក្រោយពិនិត្យឃើញថា គណបក្សមួយនេះ មិនទាន់បានបំពេញលក្ខន្តិកៈត្រឹមត្រូវស្របតាមបទប្បញ្ញត្តិមាត្រា៩ និងមាត្រា២០ នៃច្បាប់ស្តីពីគណបក្សនយោបាយនៅកម្ពុជា។
បើតាមក្រសួងមហាផ្ទៃ គណបក្សកែទម្រង់កម្ពុជា នៅខ្វះឯកសារសំខាន់ៗមួយចំនួនទៀត មានជាអាទិ៍ សេចក្តីសម្រេចបង្កើតគណៈកម្មាធិការបណ្តោះអាសន្ន គោលនយោបាយ និងកម្មវិធីនយោបាយសំខាន់ៗរបស់គណបក្ស រួមទាំងលក្ខនិ្តកៈគណបក្សមានកំហុសអក្ខរាវិរុទ្ធច្រើន និងខ្លឹមសារខ្លះផ្ទុយនឹងបទប្បញ្ញតិ្តនៃច្បាប់ស្តីពីគណបក្សនយោបាយ។ ក្រសួងមហាផ្ទៃ ទុករយៈពេល១៥ថ្ងៃដល់ស្ថាបនិកគណបក្សនេះ ដើម្បីកែសម្រួលលើឯកសាររបស់ខ្លួន ហើយបញ្ជូនទៅកាន់ក្រសួងមហាផ្ទៃវិញ។
សម្រាប់លោកអ៊ូ ច័ន្ទរ័ត្ន បញ្ហាកែសម្រួលនេះមិនមែនជារឿងធំដុំ និងជាបញ្ហាអ្វីដែរសម្រាប់គណបក្សរបស់លោក។ លោកថា ក្រុមការងារកំពុងរៀបចំបញ្ហានេះហើយៗនឹងបញ្ជូនទៅកាន់ក្រសួងមហាផ្ទៃវិញនៅសប្តាហ៍ក្រោយនេះ។ ក្រោយបញ្ជូន និងចុះបញ្ជីគណបក្សជាផ្លូវការនៅក្រសួងមហាផ្ទៃរួចរាល់ហើយ លោកអ៊ូ ច័ន្ទរ័ត្ន នឹងចាប់ផ្តើមកៀងគរអ្នកនយោបាយនៃអតីតគណបក្សប្រឆាំងឱ្យមករួបរួមគ្នាជាផ្លូវការ ដើម្បីប្រកួតប្រជែងនឹងគណបក្សកាន់អំណាចរបស់លោកនាយករដ្ឋមន្រ្តីហ៊ុន សែន នៅក្នុងការបោះឆ្នោតនាពេលខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ