អ្នកនាំពាក្យរដ្ឋាភិបាលអំពាវនាវឲ្យបរទេសសហការក្នុងការកាត់ក្តីលោក រ៉ុង ឈុន
អ្នកនាំពាក្យរដ្ឋាភិបាលកាលពីម្សិលមិញបានចេញមកឆ្លើយតបនឹងប្រតិកម្មពីសំណាក់មជ្ឈដ្ឋាននានាដែលមិនយល់ស្របនឹងការកាត់ទោស លោក រ៉ុង ឈុន ។ តាមរយៈហ្វេសប៊ុក លោក ផៃ ស៊ីផាន បានអំពាវនាវឲ្យមិត្តបរទេសចូលរួមសហការជាមួយប្រជាពលរដ្ឋកម្ពុជា ក្នុងការវិនិច្ឆ័យរឿងក្តីនេះដោយឈរលើផលប្រយោជន៍របស់ប្រជាពលរដ្ឋខ្មែរ។ ការឆ្លើយតបបែបនេះ គឺបន្ទាប់ពីស្ថានទូតធំៗនៅកម្ពុជានាំគ្នាចោទសួរពីឯករាជ្យភាពនៃតុលាការ និងសិទ្ធិបញ្ចេញមតិនៅកម្ពុជា ក្រោយមានការដាក់ទោសលោក រ៉ុង ឈុន។
ចុះផ្សាយនៅថ្ងៃ៖
ស្តាប់ - ០១:៥១
«អ្វីដែលជាចម្លើយរបស់ខ្ញុំ គឺការវិនិច្ឆ័យក្តីនោះផ្អែកលើមូលដ្ឋានអង្គហេតុ និងអង្គច្បាប់ដែលបុគ្គលរូបនោះ បានប្រព្រឹត្តិអំពើផ្ទុយពីច្បាប់កម្ពុជា ដែលបានហាមប្រាម និងបញ្ញត្តិជាធរមាន។ កង្វល់អាទិភាពបំផុតរបស់រាជរដ្ឋាភិបាលកម្ពុជា គឺថែរក្សាសន្តិភាព និងសន្តិសុខជាតិ»។ នេះគឺជាឆ្លើយតបរបស់លោក ផៃ ស៊ីផន ប្រធានក្រុមអ្នកនាំពាក្យរដ្ឋាភិបាលកម្ពុជា។
អ្នកនាំពាក្យដដែលក៏បានអំពាវនាវដល់បណ្ដាមិត្តបរទេសទាំងអស់ ដែលរស់នៅកម្ពុជាក្តី ឬនៅឯនាយសមុទ្រក្តី ចូលរួមសហការជាមួយប្រជាពលរដ្ឋកម្ពុជា ក្នុងការវិនិច្ឆ័យក្តីនេះ ដោយឈរលើផលប្រយោជន៍របស់ប្រជាពលរដ្ឋខ្មែរ។
គួរកត់សំគាល់ថា ភ្លាមៗក្រោយពីតុលាការក្រុងភ្នំពេញប្រកាសសាលក្រមកាត់ទោស លោក រ៉ុង ឈុន ដាក់ពន្ធនាគារ២ឆ្នាំ និងសកម្មជន២នាក់ទៀតម្នាក់២០ខែ ក្រោមបទ«ញុះញង់»នោះ បានញាំងឲ្យមានប្រតិកម្មពីស្ថានទូតបរទេសធំៗខាងលោកសេរីជាបន្តបន្ទាប់។ ពួកគេបាននាំគ្នាចោទសួរពីឯករាជ្យភាពនៃតុលាការ និងសិទ្ធិបញ្ចេញមតិនៅកម្ពុជា។
នាំមុខដោយស្ថានទូតស្ថានទូតសហភាពអឺរ៉ុបប្រចាំនៅកម្ពុជា បណ្តុំប្រទេសលោកសេរីមួយនេះ បានហៅសាលក្រមប្រឆាំងនឹង លោករ៉ុង ឈុន និងសកម្មជន២នាក់ទៀតថាធ្វើឱ្យប៉ះពាល់ដល់សិទ្ធិបញ្ចេញមតិជំទាស់ជាសាធារណៈ ឬការរិះគន់នយោបាយ។
ប្រតិកម្មនេះត្រូវបានបន្ទរដោយស្ថានទូតបារាំងប្រចាំនៅកម្ពុជា ស្របពេលដែលស្ថានទូតអាមេរិក និងអង់គ្លេសប្រចាំនៅកម្ពុជាវិញ ក៏មិនពេញចិត្ត និងសម្តែងកង្វល់អំពីបញ្ហាកាត់ទោសនេះផងដែរ។
ឯកអគ្គរដ្ឋទូតអាមេរិក លោក Patrick Murphy បានអះអាង ប្រព័ន្ធតុលាការមិនគួរត្រូវបានគេរំលោភបំពាន ដើម្បីបំបិទសំឡេងសកម្មជនសន្តិភាពទេ។ រីឯ លោកស្រី Tina Redshaw ឯកអគ្គរាជទូតអង់គ្លេសវិញថា សេរីភាពនៃការបញ្ចេញមតិ គឺត្រូវបានការពារដោយរដ្ឋធម្មនុញ្ញកម្ពុជា ហើយប្រព័ន្ធតុលាការមិនគួរត្រូវបានប្រើប្រាស់ដើម្បីកាត់តម្រឹមនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ