សង្គមស៊ីវិលព្រួយបារម្ភពីជីវភាពពលរដ្ឋ និងបញ្ហាទឹកជន់លិចទីក្រុងក្រោយរដ្ឋាភិបាលបន្តកាត់ផ្ទៃបឹងតាមោក
សង្គមស៊ីវិលបង្ហាញការព្រួយបារម្ភថា បញ្ហាជីវភាពរស់នៅរបស់ប្រជាពលរដ្ឋ និងបញ្ហាទឹកជន់លិចក្នុងក្រុងអាចប្រឈមហានិភ័យខ្ពស់ ប្រសិនបើរដ្ឋាភិបាលនៅតែបន្តកាត់ផ្ទៃបឹងតាមោក ប្រគល់ឱ្យក្រុមហ៊ុនឯកជន និងដោះដូរទៅឱ្យស្ថាប័នរដ្ឋសម្រាប់សាងសង់អគារ និងហេដ្ឋារចនាសម្ព័ន្ធនានាបន្ថែមទៀត។ លោក វណ្ណ សូផាត មន្ត្រីសម្របសម្រួលគម្រោងកំណែទម្រង់ដីធ្លីរបស់មជ្ឈមណ្ឌលសិទ្ធិមនុស្សកម្ពុជាបានអះអាងប្រាប់វិទ្យុបារាំងអន្តរជាតិនាព្រឹកថ្ងៃទី ២២ខែសីហាថា រដ្ឋាភិបាលគួរតែគិតពីផលប៉ះពាល់ដល់សង្គម និងបរិស្ថាន ព្រោះបញ្ហាលុបបឹងនេះមិនមែនជាបញ្ហាតូចតាចដែលត្រូវមើលរំលងនោះទេ។
ចុះផ្សាយនៅថ្ងៃ៖
លោក វណ្ណ សូផាត មន្ត្រីសម្របសម្រួលគម្រោងកំណែទម្រង់ដីធ្លីរបស់មជ្ឈមណ្ឌលសិទ្ធិមនុស្សកម្ពុជាCCHR បានបញ្ជាក់ប្រាប់វិទ្យុបារាំងអន្តរជាតិថា ការបន្តកាត់និងដោះដូរផ្ទៃបឹងទៅឱ្យស្ថាប័នរដ្ឋ និងឯកជនជាបន្តបន្ទាប់នៅពេលនេះបានបង្កផលប៉ះពាល់នូវរូបភាពចំនួនពីរ រួមមានជាអាទិ៍ បញ្ហាបាត់បង់ប្រាក់ចំណូល បញ្ហាបាត់បង់ទីជម្រក និងបញ្ហាខ្វះអាងសម្រាប់ស្តុកទឹកក្នុងរាជធានីភ្នំពេញ។
បើតាម លោក វណ្ណ សូផាត ប្រជាពលរដ្ឋជាច្រើនគ្រួសារត្រូវបានបាត់បង់ប្រាក់ចំណូលពីការនេសាទត្រី និងបាត់បង់ទីជម្រកក្រោយពួកគេត្រូវជម្លៀសចេញដោយបង្ខំពីអាជ្ញាធរ។ ដោយឡែក ការបាត់បង់ផ្ទៃបឹងមួយផ្នែកនេះទៀតសោតលោក វណ្ណ សូផាតថា ជាក្តីព្រួយបារម្ភធំណាស់ ដល់បញ្ហាទឹកលិចក្នុងរាជធានីភ្នំពេញ ដោយកន្លងមកគ្រាន់តែភ្លៀងមួយមេ វត្តមានទឹកលិចក្នុងទីក្រុងក៏កើនឡើងស្ទើរតែគ្រប់ទីកន្លែងទៅហើយ។
ការលើកឡើងរបស់លោកវណ្ឌ សូផាតជុំវិញបញ្ហារបស់ប្រជាពលរដ្ឋ និងបញ្ហាបរិស្ថានខាងដើមនេះធ្វើឡើងក្រោយផ្ទៃបឹងតាមោកប្រហែល១ពាន់ហិកតាត្រូវបានរដ្ឋាភិបាលកាត់និងដោះដូរឱ្យក្រុមហ៊ុនឯកនិងស្ថាប័នរដ្ឋសម្រាប់សាងសង់អគារ និងអភិវឌ្ឍហេដ្ឋារចនាសម្ព័ន្ធផ្សេងៗ។
ក្នុងនោះ ហេតុផលដែលរដ្ឋាភិបាលតែងតែបន្តកាត់ជារឿយៗនៃផ្ទៃបឹងប្រគល់ជូនឱ្យក្រុមហ៊ុនឯកជន លោក វណ្ណ សូផាតថា សម្រាប់សាងសង់បុរី ផ្សារទំនើប និងទីក្រុងរណប។ ប៉ុន្តែលោក វណ្ណ សូផាតថា លោកចង់ឃើញរដ្ឋាភិបាលរក្សាទុកបឹងនេះជាប្រភពមួយសំខាន់ សម្រាប់ជាកន្លែងទេសចរណ៍បឹងធម្មជាតិ និងជាទីតាំងមួយអាចធានាបាននូវការស្តុកទឹកសម្រាប់រាជធានីភ្នំពេញ និងខេត្តកណ្តាលបាន។
គួរកត់សម្គាល់ដែរថា កាលពីខែឧសភា ឆ្នាំ២០២០ ក្រសួងធនធានទឹក និងឧតុនិយមបានចេញលិខិតព្រមានថា ការចាក់ដីលុបនិងការសាងសង់បិទផ្លូវទឹកជាបន្តបន្ទាប់អាចនឹងបង្កគ្រោះមហន្តរាយដោយសារទឹកជំនន់។
សូមបញ្ជាក់ថា បឹងតាមោកជាបឹងមួយធំជាងគេក្នុងរាជធានីភ្នំពេញដែលមានផ្ទៃដីសរុប ៣២៣៩ហិកតា និងមានមុខងារសម្រាប់ស្តុកទឹកកង្វក់ និងរំដោះទឹកចេញពីរាជធានីភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ