ក្រុមអាណាព្យាបាលកុមារដែលរងគ្រោះដោយសារម្សៅទឹកដោះគោដាក់ញត្តិសុំពន្លឿនការដោះស្រាយបន្ទាប់ពីស្ងប់ស្ងាត់ជាងប្រាំខែ
ក្រុមអាណាព្យាបាលកុមារដែលរងគ្រោះផ្នែកសុខភាពដោយសារការប្រើប្រាស់ម្សៅទឹកដោះគោNutrilatt នៅព្រឹកថ្ងៃសុក្រនេះ បានរួមគ្នាដាក់ញត្តិទៅក្រសួងយុត្តិធម៌ដើម្បីស្នើសុំការគាំទ្រនិងពន្លឿនសំណុំរឿងជាមួយភាគីក្រុមហ៊ុន S&TK Trading Co, LTD។ ក្រុមអាណាព្យាបាលទារកនិងកុមារដែលរងគ្រោះបានអះអាងថា ការសម្រេចចិត្តដាក់ញត្តិទៅដល់ក្រសួងយុត្តិធម៌ពេលនេះ គឺបន្ទាប់ពីសំណុំរឿងរបស់ពួកគេបានអូសបន្លាយជាង៥ខែដោយមិនមានការកោះហៅឲ្យទៅបំភ្លឺបន្ថែម។ ក៏ប៉ុន្តែអ្នកនាំពាក្យសាលាដំបូងរាជធានីភ្នំពេញនៅថ្ងៃសុក្រនេះ បានបញ្ជាក់ប្រាប់វិទ្យុបារាំងអន្តរជាតិថា សំណុំរឿងនេះនឹងអាចត្រូវតុលាការលើកមកជំនុំជម្រះនៅសប្តាហ៍ក្រោយ។
ចុះផ្សាយនៅថ្ងៃ៖
ស្តាប់ - ០២:៤១
ចាប់តាំងពីក្រសួងពាណិជ្ជកម្មដែលមានអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ជាអ្នកសម្របសម្រួល បានបញ្ជូនសំណុំរឿងឡើងទៅដល់តុលាការកាលពីចុងឆ្នាំ២០២០ ក្រុមអាណាព្យាបាលចំនួន២១គ្រួសារ បានអះអាងថាពួកគេត្រូវបានសាលាដំបូងរាជធានីភ្នំពេញកោះហៅទៅបំភ្លឺនិងសួរនាំព័ត៌មានតែពីរដងប៉ុណ្ណោះ ហើយបន្ទាប់មកនោះគឺពួកគេមិនទាន់ទទួលការកោះហៅ ឬដំណោះស្រាយណាមួយឡើយពីសាលាដំបូងរាជធានីភ្នំពេញ។
លោកស្រីគង់ ច័ន្ទម៉ាលីស ម្តាយរបស់កុមារដែលរងគ្រោះក្រោយការប្រើប្រាស់ម្សៅទឹកដោះគោNutrilatt បានប្រាប់វិទ្យុបារាំងអន្តរជាតិនៅថ្ងៃសុក្រនេះថា ការណ៍ដែលមិនទាន់បានទទួលដំណោះស្រាយសមស្របនេះហើយ ទើបក្រុមអាណាព្យាបាលទាំង២១គ្រួសារសម្រេចចិត្តដាក់ញត្តិទៅក្រសួងយុត្តិធម៌ដើម្បីស្នើឲ្យរដ្ឋមន្ត្រីមានការអន្តរាគមន៍។
បើតាមម្តាយកុមាររងគ្រោះមួយរូបនេះ ការកោះហៅចូលបំភ្លឺចំនួន២ដងមកនោះ គឺមិនមានដំណោះស្រាយអ្វីសោះឡើយ ព្រោះភាគីក្រុមហ៊ុននាំចូលម្សៅទឹកដោះគោមិនព្រមទូទាត់ទៅតាមសំណងដែលក្រុមអាណាព្យាបាលទាមទារ។ តាមលោកស្រី ការផ្តល់សំណងជាទឹកប្រាក់ចំនួន២ពាន់ដុល្លារក្នុងមួយគ្រួសារគឺជារឿងមួយដែលមិនអាចទទួលយកបាន ខណៈដែលទារកនិងកុមារនីមួយៗមានការប៉ះទង្គិចផ្នែកសុខភាពខុសៗគ្នា។ លោកស្រីគង់ ច័ន្ទម៉ាលីស បានអះអាងថា នេះគឺជាការខូចខាតយ៉ាងធ្ងន់ធ្ងរដល់កុមារដែលជាទំពាំងស្នងឫស្សី ដែលត្រូវរងគ្រោះដោយសារការប្រើប្រាស់ម្សៅទឹកដោះគោរកឃើញថាខ្វះសារធាតុចិញ្ចឹម។
ជុំវិញការដាក់ញត្តិចូលទៅក្រសួងយុត្តិធម៌នៅព្រឹកនេះ លោកជិន ម៉ាលីន រដ្ឋលេខាធិការនិងជាអ្នកនាំពាក្យក្រសួងយុត្តិធម៌ បានបញ្ជាក់ថា ក្រសួងនឹងពិនិត្យមើលតាមសមត្ថកិច្ច ហើយថាពន្លឿនយ៉ាងណាត្រូវរង់ចាំអ្នកជំនាញពិនិត្យវាយតម្លៃ។
ជាមួយគ្នានេះដែរ លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញបានបញ្ជាក់ប្រាប់វិទ្យុបារាំងអន្តរជាតិនៅថ្ងៃនេះដែរ តាមរយៈការកោះហៅចំនួន២ដងរួចមកហើយនោះ មកដល់ពេលនេះសំណុំរឿងត្រូវបានបញ្ជូនដល់អង្គជំនុំជម្រះហើយតុលាការនឹងពិនិត្យមើល។ បើតាមអ្នកនាំពាក្យសាលាដំបូងរាជធានីភ្នំពេញ ក្រោយការពិនិត្យលម្អិតម្តងទៀត តុលាការនឹងអាចបើកការជំនុំជម្រះនៅសប្តាហ៍ក្រោយ។
គួរបញ្ជាក់ជូនថា វិវាទរវាងក្រុមអាណាព្យាបាល និងក្រុមហ៊ុននាំចូលម្សៅទឹកដោះគោ Nutrilatt បានអូសបន្លាយជាង១ឆ្នាំមកហើយ។ វិវាទដែលអាជ្ញាធរបានរកឃើញថា ម្សៅទឹកដោះគោ Nutrilatt ចំនួន៦លេខ ខ្វះនូវសារធាតុចិញ្ចឹម និងជាតិដែកដល់ទារក ដែលធ្វើឲ្យប៉ះពាល់ដល់ការលូតលាស់។ យ៉ាងណាមិញអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ក៏ធ្លាប់បានទុកពេលឲ្យភាគីទាំងសងខាងធ្វើការសម្របសម្រួលគ្នាលើសំណងផ្លូវចិត្តណាមួយដែលសមស្រប។ ក៏ប៉ុន្តែនៅតែគ្មានលទ្ធផលទើប ក.ប.ប សម្រេចបញ្ជូនសំណុំរឿងនេះឡើងទៅកាន់ដៃតុលាការកាលពីថ្ងៃ១៣ ខែវិច្ឆិកា ឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ