ដ្បិតយុទ្ទនាការប្រយុទ្ធនិងទប់ស្កាត់ជំងឺកូវីដ១៩បិទបញ្ចប់ តែកម្ពុជានៅបន្តរឹតបន្តឹងតាមសភាពការណ៍ជាក់ស្តែង
រដ្ឋាភិបាលកម្ពុជាបានសម្រេចបិទបញ្ចប់ការអនុវត្តយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ១៩នៅទូទាំងប្រទេស ប៉ុន្តែការរឹតបន្តឹងវិធានការផ្សេងៗទៀតនឹងនៅតែបន្តអនុវត្តតាមភូមិសាស្ត្ររាជធានីខេត្តនានា ដោយផ្អែកតាមស្ថានការណ៍ជាក់ស្តែងនៃជំងឺកូវីដ១៩។ ចំពោះភូមិសាស្ត្ររាជធានីភ្នំពេញ អាជ្ញាធរបិទបញ្ចប់តែបម្រាបគោចរនាពេលរាត្រីប៉ុណ្ណោះ ចំណែកឯវិធានការដទៃទៀត គឺនៅតែបន្តដូចពេលមុនដដែល។ រីឯខេត្តឧត្តរមានជ័យឯណោះវិញគឺនឹងនៅតែបន្តអនុវត្តវិធានការដូចមុនទាំងអស់ រយៈពេល៧ថ្ងៃទៀត។
ចុះផ្សាយនៅថ្ងៃ៖
ស្តាប់ - ០១:៤៤
សេចក្តីសម្រេចរបស់រដ្ឋាភិបាលកម្ពុជានាថ្ងៃទី១៩សីហា បិទបញ្ចប់យុទ្ធនាការទប់ស្កាត់ជំងឺកូវីដ១៩ គឺធ្វើឡើងដោយមានការសង្កេតឃើញប្រសិទ្ធភាពនៃការទប់ស្កាត់ចរន្តឆ្លងនៃមេរោគកូវីដ១៩ ជាពិសេសដែលតា ក្រោយបានដាក់ចេញវិធានការតឹងរ៉ឹងប្រយុទ្ធនិងទប់ស្កាត់ជំងឺកូវីដ១៩ ក្នុងក្របខណ្ឌ័ទូទាំងប្រទេសអស់រយៈពេល២១ថ្ងៃកន្លងមក។
ចាប់ពីថ្ងៃទី២០សីហានេះតទៅ ការរឹតបន្តឹងវិធានការផ្សេងៗទៀតនឹងនៅតែបន្តអនុវត្តតាមភូមិសាស្ត្ររាជធានីខេត្តនានា ដោយផ្អែកតាមស្ថានការណ៍ជាក់ស្តែងនៃជំងឺកូវីដ១៩។
ជាក់ស្តែង នៅភូមិសាស្ត្រនៃរាជធានីភ្នំពេញត្រូវបាន លោក ឃួង ស្រេង អភិបាលក្រុង តាមរយៈសារព័ត៌មានក្នុងស្រុក នាថ្ងៃទី២០សីហានេះ លើកឡើងថា អាជ្ញាធរសម្រេចបិទបញ្ចប់តែបម្រាមគោចរក្នុងពេលរាត្រីប៉ុណ្ណោះ ចំណែកវិធានការផ្សេងៗទៀត ដូចជាការផ្អាកនូវអាជីវកម្មដែលមានកម្រិតហានិភ័យខ្ពស់ ការហាមជួបជុំដែលមានមនុស្សច្រើនចាប់ពី១៥នាក់ឡើងទៅ នៅតែបន្តអនុវត្តដដែល។
នៅខេត្តឧត្តរមានជ័យឯណោះវិញ លោកអភិបាលរងខេត្ត ឌី រ៉ាដូ ថ្លែងប្រាប់វិទ្យុបារាំងអន្តរជាតិ នាថ្ងៃទី២០សីហា ថា ទោះបីជារដ្ឋាភិបាលបញ្ចប់យុទ្ធនាការទប់ស្កាត់ជំងឺកូវីដ១៩យ៉ាងណាក្តី អាជ្ញាធរបានសម្រេចបន្តអនុវត្តវិធានការមុនទាំងអស់ រយៈពេល៧ថ្ងៃបន្ថែមទៀត រួមមានហាមមិនឱ្យមានការជួបជុំគ្នាច្រើន ការបន្តបិទកន្លែងកម្សាន្ត និងវិធានការសុខាភិបាលនានា។ សេចក្តីសម្រេចនេះ គឺដោយមានការសង្កេតឃើញពីស្ថានភាពជាក់ស្តែងក្នុងខេត្តមិនទាន់មានភាពល្អប្រសើរនៅឡើយ។
គួរជម្រាបជូនថា នៅក្នុងរយៈពេលចុងក្រោយនេះ អាត្រាអ្នកស្លាប់ប្រចាំថ្ងៃដោយសារជំងឺកូវីដ១៩ បានធ្លាប់ចុះមកត្រឹម១២-១៤នាក់តែប៉ុណ្ណ៉ោះ គិតចាប់ពីដើមខែសីហាមក។ ចំណែកអាត្រាឆ្លងថ្មីប្រចាំថ្ងៃវិញគឺ បានធ្លាក់ចុះពីខ្ទង់ក្បែរពាន់ករណី មកត្រឹម៤០០ទៅ៥០០ករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ