អ្នកជំនាញ៖ ពលរដ្ឋខេត្តមណ្ឌលគិរីគួរពង្រឹងភាសាបរទេសឲ្យបានប្រសើរដើម្បីទាក់ទាញភ្ញៀវអន្តរជាតិពេលខាងមុខ
ប្រមុខរដ្ឋាភិបាលកម្ពុជាលោកហ៊ុន សែន នៅថ្ងៃទី០៩សីហាកន្លងទៅ បានអនុម័តដាក់ឲ្យប្រើប្រាស់ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី២០២១-២០៣៥ ដែលបានសិក្សាអស់ពេលជាងមួយឆ្នាំ។ នៅចំពោះមុខនៃការដាក់ឲ្យប្រើប្រាស់ផែនការមេនេះ អ្នកជំនាញក្នុងវិស័យទេសចរណ៍មើលឃើញថាជារឿងល្អប្រសើរ ត្បិតខេត្តមណ្ឌលគិរីសម្បូរតំបន់អេកូទេសចរណ៍ធម្មជាតិ។ តែអ្វីដែលត្រូវធ្វើបន្ទាប់នោះ គឺពលរដ្ឋក្នុងខេត្តមណ្ឌលគិរីត្រូវត្រៀមខ្លួនពង្រឹងសមត្ថភាពនិងភាសាបរទេស ពេលភ្ញៀវទេសចរអន្តរជាតិអាចមកកម្សាន្តនាពេលខាងមុខ។
ចុះផ្សាយនៅថ្ងៃ៖
ស្តាប់ - ០២:០៧
ថ្លែងប្រាប់វិទ្យុបារាំងអន្តរជាតិ នៅព្រឹកថ្ងៃអាទិត្យទី១៥សីហានេះ លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា បានសម្តែងការសាទរជុំវិញការដាក់ឲ្យប្រើប្រាស់ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរីឆ្នាំ២០២១-២០៣៥។ នេះក៏ដោយសារថាខេត្តភូមិភាគឥសានមួយនេះ សម្បូរទៅដោយសក្តានុពលផ្នែកកសិកម្ម ឧស្សាហកម្ម និងតំបន់ធម្មជាតិ ដែលជាផ្នែកទាក់ទាញនូវភ្ញៀវទេសចរកន្លងមក។ បើតាមលោកស្រី ឆាយ ស៊ីវលីន ការដាក់ឲ្យប្រើប្រាស់ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី នឹងមានលទ្ធភាពជួយប្រជាពលរដ្ឋក្នុងខេត្តមួយនេះបន្ថែម ឲ្យទទួលបានចំណូលផ្គត់ផ្គង់ តាមរយៈការផ្តល់សេវាកម្មទេសចរណ៍។
តែយ៉ាងណាមិញនៅចំពោះមុខនៃការអនុម័តផែនការមេ និងការផ្អាកជាបណ្តោះអាសន្ននូវភ្ញៀវទេសចរអន្តរជាតិមកកម្សាន្តនៅកម្ពុជានោះ លោកស្រីឆាយ ស៊ីវលីន មើលឃើញថានេះជាឱកាសឲ្យប្រជាពលរដ្ឋជាពិសេសអ្នកដែលរស់នៅក្នុងខេត្តមណ្ឌលគិរី ចេះសម្លឹងមើលពីផលប្រយោជន៍ដែលអាចទទួលបានពីវិស័យទេសចរណ៍ ព្រមទាំងការត្រៀមខ្លួនឲ្យបានល្អក្នុងការពង្រឹងសមត្ថភាពផែ្នកភាសាបរទេសឲ្យបានល្អ ព្រោះថាកន្លងមកខេត្តនៅតំបន់ភូមិភាគឥសានមួយនេះនៅខ្វះធនធានក្នុងការប្រាស្រ័យទាក់ទងជាមួយភ្ញៀវអន្តរជាតិនៅឡើយ។ ដូច្នេះការពង្រឹងផ្នែកភាសាបរទេសនេះនឹងជួយដល់ពលរដ្ឋក្នុងខេត្តផ្ទាល់អាចទាក់ទាញភ្ញៀវទេសចរអន្តរជាតិ នៅពេលដែលរដ្ឋាភិបាលមកទទួលភ្ញៀវទេសចរអន្តរជាតិនាពេលខាងមុខ។
គួរជម្រាបជូនថាផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី២០២១-២០៣៥ ត្រូវបានក្រសួងទេសចរណ៍សិក្សាអស់រយៈពេល១ឆ្នាំ មុននឹងប្រមុខរដ្ឋាភិបាលសម្រេចអនុម័តដាក់ឲ្យប្រើប្រាស់នៅថ្ងៃទី០៩សីហាកន្លងទៅនេះ។ តាមគម្រោងផែនការមេនេះ នឹងផ្តល់អាទិភាពទៅតំបន់ចំនួន៦នៅក្នុងខេត្តរួមមាន តំបន់របៀងអេកូទេសចរណ៍និងទេសចរណ៍ធម្មជាតិនៃដែនជម្រកសត្វព្រៃទាំង៥ តំបន់របៀងទេសចរណ៍វប្បធម៌និងអេកូទេសចរណ៍ ប៊ូស្រា-ដាក់ដាំ តំបន់ក្រុងសែនមនោរម្យ តំបន់ស្រុកអូរាំងភ្ជាប់ជាមួយការអភិវឌ្ឍអាកាសយានដ្ឋានខេត្តមណ្ឌលគិរី តំបន់ប្រជុំជននៃស្រុកកោះញែក និងតំបន់ទេសចរណ៍សមាហ័រណតាមច្រកព្រំដែន។
បើតាមក្រសួងទេសចរណ៍ ផែនការមេនេះនឹងមានលទ្ធភាពបង្កើតការងារដល់ពលរដ្ឋប្រមាណ៨ម៉ឺនកន្លែងនិងបង្កើតចំណូលដោយផ្ទាល់ប្រមាណ៥០០លានដុល្លារសម្រាប់សេដ្ឋកិច្ចជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ