WHO សាទរថាការចាក់វ៉ាក់សាំងលឿននៅកម្ពុជា តែព្រមានថាសុទិដ្ឋិនិយមចំពោះវ៉ាក់សាំងខ្លាំងពេក អាចបង្កគ្រោះថ្នាក់
អង្គការសុខភាពពិភពលោក(WHO) បានបង្ហាញនូវការកោតសរសើរដល់ប្រទេសកម្ពុជា ដែលសម្រេចបានជោគជ័យ នៅក្នុងការចាក់វ៉ាក់សាំងការពារកូវីដ-១៩ ដល់ប្រជាពលរដ្ឋរបស់ខ្លួន មុនកាលកំណត់ ធៀបទៅនឹងផែនការ ដែលបានគ្រោងទុក។ តាម WHO ការចាក់វ៉ាក់សាំងបង្ការជំងឺកូវីដ-១៩ គឺជាយុទ្ធសាស្ត្រដ៏ខ្លាំងមួយ ក៏ប៉ុន្តែវាមិនមែនជាដំណោះស្រាយវេទមន្ត ដើម្បីបញ្ចប់ជំងឺរាតត្បាតកូវីដ-១៩នោះទេ។
ចុះផ្សាយនៅថ្ងៃ៖
ស្តាប់ - ០២:០៩
អង្គការសុខភាពពិភពលោក(WHO) ឲ្យដឹងថា អង្គការពិភពលោកនេះ បានផ្តល់ការគាំទ្រផ្នែកយុទ្ធសាស្ត្រ និងបច្ចេកទេសដល់យុទ្ធនាការចាក់វ៉ាក់សាំងរបស់រដ្ឋាភិបាលកម្ពុជា ក្នុងនោះមានការវិភាគស្ថានភាព ការផ្តល់យោបល់គោលនយោបាយអំពីការផ្តល់អាទិភាព ការធ្វើផែនការអនុវត្ត និងការតាមដានការចាក់វ៉ាក់សាំង រួមទាំងការបណ្តុះបណ្តាលបុគ្គលិក និងគ្រប់គ្រងស្ថានការណ៍មិនល្អ ក្រោយពីចាក់វ៉ាក់សាំងរួច។
ប្រទេសកម្ពុជាបានចាប់ផ្តើមចាក់វ៉ាក់សាំងការពារកូវីដ-១៩ ដំបូង នៅថ្ងៃទី១០ ខែកុម្ភៈ ឆ្នាំ២០២១នេះ ដោយផ្តើមពីការប្រើប្រាស់វ៉ាក់សាំងចិន Sinopharm។ គិតមកដល់ថ្ងៃទី១២ ខែសីហា ម្សិលមិញ កម្ពុជាបានចាក់វ៉ាក់សាំងដល់ពលរដ្ឋខ្លួនចំនួនជាង ៨,៦លាននាក់(ជាង៨០%) ក្នុងចំណោមមនុស្សពេញវ័យ ១០លាននាក់។ ជាមួយគ្នានេះ កុមារ និងយុវជន ចាប់ពីអាយុ ១២ឆ្នាំដល់១៧ឆ្នាំ ចំនួនជិតកន្លះលាននាក់ ក៏ត្រូវបានចាក់វ៉ាក់សាំងចិនប្រភេទ Sinovacផងដែរ ក្នុងផែនការ ២លាននាក់។
លោកស្រីវេជ្ជបណ្ឌិត Li Ailan តំណាងអង្គការសុខភាពពិភពលោកប្រចាំនៅកម្ពុជាថ្លែងថា ភាពក្លាហាន ការយល់ចិត្ត និងសេចក្តីស្រលាញ់ដែលរដ្ឋាភិបាល និងប្រជាជនកម្ពុជាមានចំពោះប្រទេសជាតិ និងមនុស្សជាទីស្រលាញ់របស់ខ្លួន តែងតែជម្រុញចិត្តលោកស្រី។ ជាមួយនឹងសកម្មភាពបុគ្គល និងសមូហភាព យកឈ្នះនៅក្នុងការប្រយុទ្ធនឹងជំងឺកូវីដ-១៩ បាន។
ទោះយ៉ាងណា អង្គការសុខភាពពិភពលោកបញ្ជាក់ថា ប្រជាជនកម្ពុជា ព្រោះតែបានចាក់វ៉ាក់សាំងរួចហើយៗ មិនអាចភ្លេចខ្លួន មិនគោរពតាមវិធានសុខាភិបាល ដូចជាពាក់ម៉ាស់ អនាម័យដៃ រក្សាគម្លាតសុវត្ថិភាពសង្គមនោះទេ។ អង្គការសុខភាពពិភពលោកក៏បានអបអរដែរ ចំពោះការធ្លាក់ចុះ ជាបណ្តើរៗហើយចំនួនអ្នកឆ្លងជំងឺកូវីដ-១៩ នៅកម្ពុជា ក៏ប៉ុន្តែបានព្រមានថា ហានិភ័យនៅតែបន្តមាន ខណៈដែលជំងឺកូវីដ-១៩ បំប្លែងថ្មីប្រភេទដែលតា កំពុងគម្រាមកំហែងពិភពលោក ក៏ដូចជាកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ