កម្ពុជានឹងទទួលបានថវិកាជំនួយចំនួន២៤០លានដុល្លារពី IMF
ប្រទេសកម្ពុជានឹងទទួលបានថវិកាជំនួយ ២៤០លានដុល្លារពីទុនបម្រុងទូទៅរបស់គណនីមូលនិធិពិសេសSDR ដែលក្រុមប្រឹក្សាភិបាលនៃមូលនិធិរូបិយវត្ថុអន្តរជាតិ(IMF)បានអនុម័តកាលពីដើមខែសីហានេះ។ ថវិកាដែលកម្ពុជាគ្រោងនឹងទទួលបានពីមូលនិធិតម្លាភាពថវិកា SDR គឺដើម្បីចូលរួមដោះស្រាយវិបត្តិកូវីដ១៩ និងស្តារសេដ្ឋកិច្ចឡើងវិញរបស់រដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០២:២៤
យោងតាមសេចក្តីប្រកាសព័ត៍មានរបស់អង្គការអុកស្វាមបានឱ្យដឹងនៅថ្ងៃពុធនេះថា ក្រុមប្រឹក្សាភិបាលនៃមូលនិធិរូបិយវត្ថុអន្តរជាតិIMF បានអនុម័តការវិភាជថវិកា រឺហៅថាទុនបម្រុងទូទៅមួយពីគណនីមូលនិធិពិសេស លើកទី១ជាប្រវិត្តសាស្រ្ត ដែលស្មើនឹងទឹកប្រាក់៦៥០ពាន់លានដុល្លារដើម្បីជម្រុញលទ្ធភាពទូទាត់ការចំណាយរបស់សកលលោក។
បើតាមប្រភពដដែល ប្រទេសកម្ពុជាក៏នឹងទទួលបានជំនួយចំនួន២៤០លានដុល្លារ ពីការអនុម័តទុនបម្រុងទូទៅរបស់គណនីមូលនិធិពិសេស SDRផងដែរ។
SDRs គឺជាទម្រង់នៃរូបិប័ណ្ណសកលមួយដែលអាចចាក់បញ្ចូលទៅក្នុងសេដ្ឋកិច្ចសកលលោក ដោយធ្វើការបែងចែកជំនួយឥតសំណង់ ជូនប្រទេសជាសមាជិកនីមួយៗរបស់មូលនិធិរូបិយវត្ថុអន្តរជាតិ ហើយការប្រើប្រាស់មូលនិធិនេះ គឺជាការសម្រេចចិត្តដោយប្រទេសដែលទទួលមូលនិធិដោយផ្ទាល់។
លោកស្រី លឹម សូលីន នាយិកាប្រចាំប្រទេសនៃអង្គការអុកស្វាមថ្លែងក្នុងសេចក្តីប្រកាសព័ត៍មានថា ថវិកាSDRថ្មីនេះនឹងជួយដល់ប្រទេសកំពុងអភិវឌ្ឍន៍ ក្នុងនោះក៏មានកម្ពុជាផងដែរ ដើម្បីដោះស្រាយទប់ទល់ផលប៉ះពាល់នៃជំងឺកូវីដ១៩ និងស្តារលំនឹងសេដ្ឋកិច្ចរបស់ខ្លួនឡើងវិញ។
តាមរយៈមូលនិធិ ដែលអុកស្វាមបានអំពាវនាវឱ្យមានការផ្តល់ថវិកាជួយសង្គ្រោះសេដ្ឋកិច្ចចំពោះប្រទេសកំពុងអភិវឌ្ឍន៍ លោកស្រី សូលីនបញ្ជាក់ថា រដ្ឋាភិបាលកម្ពុជាគួរទាញយកផលប្រយោជន៍ដើម្បីផ្តល់ការគាំទ្របន្ថែម និងជួយអន្តរាគមន៍ឆ្លើយតបនូវជំងឺកូវីដ១៩ស្របតាមលក្ខណៈបរិយាប័ន្នដោយគ្មានការរើសអើង។
សូមបញ្ជាក់ថា ថវិកាSDRs នឹងចូលជាធរមាននៅថ្ងៃទី២៣ ខែសីហា ហើយថវិកាចំនួន៦៥០ពាន់លានដុល្លារនឹងត្រូវបែងចែកដោយផ្អែកតាមកូតា និងចំណែករបស់ប្រទេសនីមួយៗនៅក្នុងIMF។ ក្នុងនោះតម្លាភាពថវិកាSDRsចំនួន៦៥០ពាន់លានដុល្លារនេះ នឹងផ្តល់ប្រាក់បម្រុងបន្ថែមជិត ៤០០ពាន់លានដុល្លារដល់ប្រទេសដែលមានជាងគេបំផុតលើពិភពលោក ហើយប្រាក់បម្រុងជិត២៣០ពាន់លានដុល្លារសម្រាប់ប្រទេសមានប្រាក់ចំណូលមធ្យម និង២១ពាន់លានដុល្លារទៀតមកឱ្យប្រទេសមានប្រាក់ចំណូលទាប។
យោងតាមរបាយការណ៍របស់មូលនិធិអន្តរជាតិ ប្រទេសចំនួន១០ក្នុងតំបន់អាស៊ានក៏ទទួលបានចំណែកនៃជំនួយនេះផងដែរ រួមមាន ឡាវចំនួន១៤០លានដុល្លារ ប្រ៊ុយណេចំនួន៤១០លានដុល្លារ មីយ៉ាន់ម៉ាចំនួន៧១០លានដុល្លារ វៀតណាមចំនួន១៥៨០លានដុល្លារ ហ្វីលីពីនចំនួន២៧៩០លានដុល្លារ ថៃចំនួន៤៣៩០លានដុល្លារ ម៉ាឡេស៊ីចំនួន៤៩៦០លានដុល្លារ សឹង្ហបុរីចំនួន ៥៤២០លានដុល្លារ និងឥណ្ឌូនេស៊ីចំនួន៦៣៥០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ