កម្ពុជាយកថ្ងៃ៨សីហា ផ្តើមចាក់វ៉ាក់សាំងកូវីដដូសទី៣ នៅខេត្តជាប់ព្រំដែនកម្ពុជា-ថៃ ចំនួន៧
កម្ពុជានៅថ្ងៃទី៨ ខែសីហា ស្អែកនេះនឹងចាប់ផ្តើមចាក់វ៉ាក់សាំងកូវីដដូសទី៣ ដោយប្រើប្រាស់វ៉ាក់សាំងប្រភេទ អាស្ត្រាហ្សេនីកា ដល់ក្រុមគ្រូពេទ្យជួរមុខ កងទ័ព និងមន្ត្រីរាជការ នៅខេត្តជាប់ព្រំដែនកម្ពុជា-ថៃ ចំនួន៧។ ប្រតិបត្តិការនេះ ធ្វើឡើងស្របពេលរដ្ឋាភិបាលត្រៀមរៀបចំបើកព្រំដែនជាមួយប្រទេសថៃវិញ ក្នុងពេលឆាប់ៗខាងមុខ។
ចុះផ្សាយនៅថ្ងៃ៖
ស្តាប់ - ០១:៥១
ជាការឆ្លើយតបនឹងវត្តមានមេរោគកូវីដ១៩បំប្លែងខ្លួនថ្មី ដែលតា ដែលកំពុងរីករាលដាលយ៉ាងខ្លាំងក្លា នៅក្នុងតំបន់ជាប់ព្រំដែនថៃ រដ្ឋាភិបាលកម្ពុជាបានសម្រេចយកខេត្តចំនួន៧ ផ្តើមចាក់វ៉ាក់សាំងដូសទី៣ ចាប់ពីថ្ងៃទី៨សីហាតទៅ ដើម្បីបង្កើតប្រព័ន្ធការពារដ៏រឹងមាំថែមទៀត ក្នុងការទប់ទល់នឹងជំងឺដ៏កំណាចនេះ ។
ប្រតិបតិ្តការលក្ខណៈបន្ទាន់នេះធ្វើឡើង បន្ទាប់ពីលោកនាយករដ្ឋមន្ត្រី ហ៊ុន សែន បានបញ្ជាឲ្យអភិបាលខេត្តនៅតាមព្រំដែនទាំងអស់ ត្រូវពង្រឹងបន្ថែមទីតាំងរៀបចំធ្វើចត្តាឡីស័កទទួលពលករខ្មែរ ដែលអាចនឹងសម្រុកមកកម្ពុជាវិញយ៉ាងគំហុក ក្រោយការបិទខ្ទប់ ១៤ថ្ងៃ ត្រូវបញ្ចប់នៅសប្តាហ៍ក្រោយ។
ក្រសួងសុខាភិបាលកម្ពុជានាថ្ងៃទី៧សីហានេះ បានជូនដំណឹងថា ខេត្តជាប់ព្រំដែនថៃទាំង៧ ដំបូងគេដែលត្រៀមចាក់ដូសទី៣នោះមានដូចជា ខេត្តបាត់ដំបង បន្ទាយមានជ័យ ប៉ៃលិន កោះកុង ឧត្តរមានជ័យ ពោធិ៍សាត់ និងខេត្តព្រះវិហារ។
បើតាមក្រសួងសុខាភិបាល គណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខ័ណ្ឌទូទាំងប្រទេសនឹងផ្តល់វ៉ាក់សាំងកូវីដ ១៩ ប្រភេទ អាស្ត្រាហ្សែនីកា ជាដូសទី៣ សម្រាប់អ្នកដែលបានចាក់វ៉ាក់សាំងស៊ីណូហ្វាម ឬស៊ីណូវ៉ាក់ ជូនដល់ក្រុមគ្រូពេទ្យជួរមុខ ទាំងរដ្ឋ និងឯកជន និងដល់មន្ត្រីរាជការនៅខេត្តទាំង៧ខាងលើ។
គួរជម្រាបជូនថា កម្ពុជាទើបនឹងទទួលបានជំនួយ វ៉ាក់សាំងបង្ការកូវីដអាស្ត្រាហ្សេនីកា លក្ខណៈទ្វេរភាគីពីរដ្ឋាភិបាលជប៉ុនសរុបចំនួន ១លានដូស និងពីរដ្ឋាភិបាលចក្រភពអង់គ្លេសចំនួន ៤១៥,០០០ ដូស ដែលកំពុងត្រៀមចែកចាយទៅកាន់បណ្តាខេត្តទាំង៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ