ក្រសួងសុខាភិបាលតម្រូវឲ្យមន្ទីរពេទ្យរដ្ឋ និងឯកជន ត្រូវតែទទួលអ្នកជំងឺទៅព្យាបាល
ក្រសួងសុខាភិបាលកម្ពុជាកាលពីថ្ងៃទី០៤ ខែសីហា ម្សិលមិញ បានប្រាប់ទៅមន្ទីរពេទ្យរដ្ឋ និងសេវាសុខាភិបាលឯកជនទាំងអស់ ត្រូវតែទទួលយកអ្នកជំងឺទាំងអស់ទៅធ្វើការព្យាបាលជាដាច់ខាត។ ការប្រកាសរបស់ក្រសួងសុខាភិបាលដូច្នេះ ធ្វើឡើងបន្ទាប់ពីមានបាតុភាព និងការរិះគន់មួយរយៈកន្លងមកថា អ្នកជំងឺមានសភាពធ្ងន់ធ្ងរមួយចំនួន ត្រូវបានបដិសេធដោយមន្ទីរពេទ្យ និងសេវាព្យាបាលឯកជន ជាហេតុនាំឲ្យ ជះឥទ្ធិពលមិនល្អដល់ក្រសួងសុខាភិបាល។
ចុះផ្សាយនៅថ្ងៃ៖
ស្តាប់ - ០១:៥៧
មន្ទីរពេទ្យថ្នាក់ជាតិ មន្ទីរពេទ្យបង្អែករាជធានី ខេត្ត រួមទាំងមណ្ឌលសុខភាពទូទាំងប្រទេស និងសេវាសុខាភិបាលឯកជនទាំងអស់ ក្នុងនោះមាន មន្ទីរពេទ្យ មន្ទីរពហុព្យាបាល មន្ទីរសម្រាកព្យាបាល និងមន្ទីរសម្ពព ត្រូវបានក្រសួងសុខាភិបាលតម្រូវឲ្យទទួលយកអ្នកជំងឺ ដោយប្រកាន់យកគោលការណ៍ទទួលសង្គ្រោះ ព្យាបាលអ្នកជំងឺជាដាច់ខាត ដោយប្រើប្រាស់តេស្តរហ័សរកអង់ទីហ្សែនកូវីដ-១៩ ក្នុងការញែកអ្នកជំងឺកូវីដ-១៩។
ចំពោះមន្ទីពេទ្យរដ្ឋ អ្នកជំងឺដែលរកទៅឃើញថាវិជ្ជមានកូវីដ-១៩ ត្រូវបញ្ជូនអ្នកជំងឺទៅបន្ទប់ដាច់ដោយឡែក។ តែបើអវិជ្ជមានជំងឺកូវីដ-១៩ ត្រូវបញ្ជូនអ្នកជំងឺទៅតាមផ្នែក និងតាមបច្ចេកទេសព្យាបាលធម្មតា។
សម្រាប់មន្ទីរពេទ្យបង្អែក ស្រុក ខណ្ឌ មណ្ឌលសុខភាព ដែលមិនមានកន្លែងព្យាបាលអ្នកជំងឺកូវីដ គ្រូពេទ្យអាចបញ្ជូនអ្នកជំងឺទៅកាន់មន្ទីរពេទ្យរាជធានី ខេត្ត ដើម្បីព្យាបាល។ នេះបើតាមក្រសួងសុខាភិបាល។
ដោយឡែកចំពោះសេវាសុខាភិបាលឯកជន ក៏ត្រូវក្រសួងសុខាភិបាលណែនាំឲ្យប្រកាន់យកគោលការណ៍សង្គ្រោះអ្នកជំងឺដូចគ្នាដែរ ក៏ប៉ុន្តែត្រង់ថាអ្នកជំងឺកូវីដ-១៩ អាច ឲ្យទទួលព្យាបាលបានក្នុងករណី ដែលគ្លីនិកឯកជននោះ មានការអនុញ្ញាតឲ្យព្យាបាលជំងឺកូវីដ-១៩ ពីក្រសួងសុខាភិបាល។ ប្រសិនបើគ្លីនិច ឯកជនណា មិនមានការអនុញ្ញាតពីក្រសួងសុខាភិបាល ចាំបាច់ត្រូវបញ្ជូនអ្នកជំងឺទៅមន្ទីរពេទ្យរដ្ឋផ្នែកព្យាបាលជំងឺកូវីដ-១៩។
ជាមួយគ្នានេះ ក្រសួងសុខាភិបាលក៏បានព្រមានដែរថា នឹងចាត់វិធានការយ៉ាងម៉ឺងម៉ាត់ បិទទីតាំងសេវាសុខាភិបាលឯកជនណា ដែលមិនអនុវត្តតាមការណែនាំរបស់ក្រសួង។
ចំពោះចំណាត់ការនេះ ក្រុមអ្នកតាមដានបញ្ហាសង្គម និងសុខមាលភាពនានា បានសម្តែងការសាទរ ក៏ប៉ុន្តែនៅក្នុងស្ថានភាពរង់ចាំមើលថាតើវិធានការរបស់ក្រសួងសុខាភិបាលពេលនេះ មានឥទ្ធិពល និងប្រសិទ្ធភាពកំរិតណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ