ក្រុមពលរដ្ឋងាយរងគ្រោះព្រមានថាភាពអត់ឃ្លាននឹងកើនឡើងលឿនជាងការឆ្លងកូវីដ១៩ទៅទៀត
ក្រុមពលរដ្ឋងាយរងគ្រោះទទួចឲ្យមានការយកចិត្តទុកដាក់ចំពោះពួកគេ ដោយព្រមានថាភាពអត់ឃ្លាននឹងកើនឡើងលឿនជាងការឆ្លងកូវីដ១៩ទៅទៀត។ ការបង្ហាញកង្វល់របស់ពួកគេគឺធ្វើនៅថ្ងៃទី៥សីហា មុនពេលដែលអង្គការសហប្រជាជាតិនឹងរៀបចំកិច្ចប្រជុំកំពូលស្តីពីប្រព័ន្ធស្បៀងអាហារនៅក្នុងខែកញ្ញាខាងមុខនេះ។ សម្រាប់កម្ពុជាក្រុមនេះបានប៉ាន់ស្មានថា ប្រជាជន២លាននាក់ ខ្វះអាហារូបត្ថម្ភ ហើយក្នុងនោះកុមារ៤០%កើតជំងឺក្រិនរ៉ាំរ៉ៃ។
ចុះផ្សាយនៅថ្ងៃ៖
ស្តាប់ - ០២:២០
«យើងខ្ញុំសូមសំដែងនូវកង្វល់យ៉ាងខ្លាំងចំពោះភាពអត់ឃ្លានដែលអាចនឹងកើនឡើងយ៉ាងលឿនជាងការឆ្លងកូវីដ១៩»។ តាមការប៉ាន់ប្រមាណមួយបង្ហាញថា អាចនឹងមានការប៉ះពាល់ដល់អាយុជីវិតច្រើនជាងការឆ្លងជំងឺរាតត្បាតនេះទៅទៀត។ ជាក់ស្តែងចំនួនមនុស្សដែលជួបប្រទះនឹងបញ្ហាអត់ឃ្លានបានកើនទ្វេរដងនៅឆ្នាំ២០២០។ ពួកគេកាន់ច្រើនឡើងចូលដំណេកដោយគ្មានអាហារក្នុងក្រពះ។វិបត្តិស្បៀងអាហារមិនដែលកើតមាន និងឈានដល់កម្រិតខ្ពស់ដូចនាពាក់កណ្តាលសត្សវត្សរ៍ចុងនេះទេ។ ទាំងអស់នេះគឺជាការបរិយាយនៅក្នុងលិខិតចំហរបស់ក្រុមកសិករ និងអ្នកដែលរងគ្រោះដីធ្លី ប្រជានេសាទ កម្មករ អ្នកប្រកបមុខរបរសេដ្ឋកិច្ចក្រៅប្រព័ន្ធ ជនជាតិដើមភាគតិច សហជីព និងសង្គមស៊ីវិល ដែលមានសរុបចំនួន៨៧ស្ថាប័ន។
ការបរិយាយពីទុក្ខលំបាករបស់ពួកគេគឺធ្វើនៅថ្ងៃទី៥សីហា មុនពេលដែលអង្គការសហប្រជាជាតិនឹងរៀបចំកិច្ចប្រជុំកំពូលស្តីពីប្រព័ន្ធស្បៀងអាហារនៅក្នុងខែកញ្ញាខាងមុខនេះ។ ជាកិច្ចប្រជុំក្នុងបំណងបង្កើនចំណីអាហារ និងកសិកម្ម ដើម្បីពន្លឿនគោលដៅអភិវឌ្ឍសហសវត្សរ៍ប្រកបដោយចីរភាពនៅក្រោមគោលដៅរួមគឺ«ផ្លាស់ប្តូរប្រព័ន្ធស្បៀងអាហារ ឆ្ពោះទៅរករបបអាហារដែលមានសុខមាលភាព រស់នៅប្រកបដោយសុភមង្គល និងការពារភពផែនដីរបស់យើង»។
បើតាមក្រុមនេះ ការអនុវត្តន៍ក្របខណ្ឌសេរីភាវូបនីយកម្មថ្មីក្នុងវិស័យនេះអស់ជាច្រើនទស្សវត្សរ៍មក បានបង្កើតឲ្យមានគម្លាតដ៍ធំរវាងអ្នកមាន និងអ្នកក្រ ឬប្រទេសអ្នក និងប្រទេសអ្នកក្រ។ ជាពិសេសបណ្តាលឲ្យមានភាពក្រីក្រកាន់តែខ្លាំងទៅដល់អ្នកផលិតស្បៀងនៅតំបន់ភាគខាងត្បូងពិភពលោក។ ភាពអត់ឃ្លានបានកើតមានឡើងជាច្រើនឆ្នាំជាប់ៗគ្នា ខណៈដែលមានកំណត់ត្រានៃការប្រមូលផលកសិកម្មបានយ៉ាងច្រើន និងមានភាពសម្បូបែបនៃអាហារកំពុងត្រូវបានចែកចាយ។
សម្រាប់កម្ពុជាក្រុមនេះបានប៉ាន់ស្មានថា ប្រជាជន២លាននាក់ កង្វះអាហារូបត្ថម្ភ ខណៈប្រជាជន៧៩%នៅរស់ទីជនបទ ពឹងតែលើរបរកសិកម្ម និងព្រៃឈើដើម្បីរស់រានមានជីវិត។ ប៉ុន្តែមានប្រជាជន១,៦
លានគ្រួសារខ្វះខាតស្រូវតាមរដូវកាល ខណៈការចំណាយរបស់ពួកគេប្រមាណ៣០%គឺពឹងលើផលិតផលស្រូវ ស្របពេលកុមារ៤០%កង្វះអាហារូបត្ថម្ភ និងកើតជំងឺក្រិនរ៉ាំរ៉ៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ