អង្គការសហប្រជាជាតិ៖ បន្ថែមពីការចាក់វ៉ាក់សាំង កម្ពុជាត្រូវបន្តពង្រឹងការអនុវត្តវិធានសុខាភិបាល
អង្គការសហប្រជាជាតិប្រចាំនៅកម្ពុជា តាមរយៈឯកសារព័ត៌មានទី១១ ចេញផ្សាយនៅថ្ងៃទី៣សីហានេះ បានបង្ហាញពីការគាំទ្រដល់ការចាក់វ៉ាក់សាំងការពារជំងឺកួវីដ១៩ថ្នាក់ជាតិរបស់កម្ពុជា។ បើតាមអង្គការសហប្រជាជាតិ ប្រទេសកម្ពុជាមានអាត្រាចាក់លើមនុស្សពេញវ័យ ក្នុងភាគរយដ៏ខ្ពស់បំផុតមួយនៅក្នុងតំបន់ប៉ាស៊ីហ្វិកខាងលិច។ យ៉ាងណាមិញ ដើម្បីអាចទប់ទល់ដែលតាប្រកបដោយប្រសិទ្ធភាព កម្ពុជាត្រូវបន្តពង្រឹងវិធានសុខាភិបាល។
ចុះផ្សាយនៅថ្ងៃ៖
ស្តាប់ - ០២:០៧
សេចក្តីប្រកាសព័ត៌មានរបស់អង្គការប្រជាជាតិចេញផ្សាយនាព្រឹកនេះ ធ្វើឡើងខណៈកម្ពុជាកំពុងប្រឈមនឹងការរាលដាលវីរុសកូវីដ១៩បំប្លែងខ្លួនដែលតាដែលទើបត្រូវបានរកឃើញជាង ១០០ករណីនៅទូទាំងប្រទេស។
បើតាមអង្គការសហប្រជាជាតិ កម្ពុជាកំពុងស្ថិតនៅក្នុងដំណើរការចាក់វ៉ាក់សាំងបង្ការកូវីដយ៉ាងល្អ ដោយកម្ពុជាមានអាត្រាចាក់លើមនុស្សពេញវ័យក្នុងភាគរយដ៏ខ្ពស់បំផុតមួយ ក្នុងចំណោមតំបន់/ប្រទេសចំនួន៣៧ ក្នុងតំបន់ប៉ាស៊ីហ្វិកខាងលិច។
នៅក្នុងសំណេរដ៏វែងរបស់អង្គការសហប្រជាជាតិ ការចាក់វ៉ាក់សាំងលើពលរដ្ឋក្នុងអាត្រាខ្ពស់នេះ កម្ពុជានឹងអាចបញ្ចៀសបាននូវហានិភ័យខ្ពស់ដែលបង្កដោយវីរុសកូវីដបំប្លែងថ្មីៗ ដោយរួមទាំងវីរុសដែលតាផងដែរ។ ការចាក់វ៉ាក់សាំង ជាយុទ្ធសាស្ត្រដ៏សំខាន់មួយក្នុងការប្រយុទ្ធប្រឆាំងនឹងជំងឺកូវីដ១៩។ យ៉ាងណាមិញ ដើម្បីទប់ស្កាត់ការចម្លងកូវីដឲ្យកាន់តែមានប្រសិទ្ធភាពនោះ ការវ៉ាក់សាំងគួរតែត្រូវបានអមដោយវិធានសុខភាពសាធារណៈ និងវិធានការសង្គមនានាប្រកបដោយប្រសិទ្ធភាព។
ទន្ទឹមគ្នានេះ អង្គការសហប្រជាជាតិប្រចាំនៅកម្ពុជា បានបង្ហាញពីការគាំទ្រខ្លួនទៅដល់រដ្ឋាភិបាលកម្ពុជាក្នុងការឃ្លាំមើល និងការអនុវត្តផែនការយុទ្ធសាស្ត្រនានា ដើម្បីទប់ស្កាត់ការឆ្លងរាលដាលកូវីដ១៩ ជាពិសេសដែលតា។
សូមជម្រាបថា យុទ្ធនាការចាក់វ៉ាក់សាំងនៅកម្ពុជា បាននិងកំពុងដំណើរការចាក់លើមនុស្សពេញវ័យ អាយុចាប់ពី ១៨ឆ្នាំឡើង មនុស្សចាស់ចាប់ពីវ័យ ៦០ឡើង ដែលគិតមកត្រឹមថ្ងៃទី២សីហា កំណើនអាត្រាចាក់វ៉ាក់សាំងមាន ៧៤,១៨% ធៀបចំនួនប្រជាជនគោលដៅ១០លាននាក់។ ហើយដើម្បីបង្កើនប្រសិទ្ធភាពការពារប្រភេទរីរុសកូវីដបំប្លែងថ្មី រដ្ឋាភិបាលបានសម្រេចចាក់ដូសទី៣ ដោយផ្តើមចេញពីក្រុមជួរមុខដែលមានចំនួនប្រមាណ៥០ម៉ឺននាក់ ទៅ១លាននាក់។
បន្ថែមពីលើគោលដៅចាក់១០លាននាក់នោះ គិតត្រឹមថ្ងៃទី២សីហា យុទ្ធនាការចាក់វ៉ាក់សាំងមនុស្សវ័យជំទង់ចាប់ពី១២-១៧ឆ្នាំ សម្រេចបាន៤% នៃចំនួនគោលដៅជិត២លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ