ក្រុមអង្គការសង្គមស៊ីវិលទទួចជាថ្មីឲ្យទម្លាក់ចោលបទចោទប្រកាន់លើ លោក រ៉ុង ឈុន
ក្រុមអង្គការសង្គមស៊ីវិលជាតិ និងអន្តរជាតិបានចេញសេចក្តីថ្លែងការណ៍ដោយឡែកពីគ្នានៅចំពេលខួប១ឆ្នាំនៃការចាប់ឃុំខ្លួនលោក រ៉ុង ឈុន ដោយទទួចឲ្យតុលាការទម្លាក់ចោលបទចោទប្រកាន់លើរិះគន់បញ្ហាព្រំដែនរូបនេះ។ ការទទួចជាថ្មីទៀតនេះ គឺធ្វើឡើងស្របពេលដែលតុលាការបន្តបើកសវនាការឡើងវិញលើសំណុំរឿងលោក រ៉ុង ឈុន នៅថ្ងៃសុក្រនេះ។
ចុះផ្សាយនៅថ្ងៃ៖
ស្តាប់ - ០១:៥៩
ក្នុងសេចក្តីថ្លែងការណ៍ថ្ងៃទី២៩កក្កដា អង្គការសម្ព័ន្ធភាពពិភពលោកដើម្បីការចូលរួមរបស់ពលរដ្ឋហៅកាត់ថាCIVICUS ទទួចដល់អាជ្ញាធរកម្ពុជា ឱ្យទម្លាក់ចោលបទចោទ និងដោះលែងលោក រ៉ុង ឈុន ជាបន្ទាន់ និងឥតលក្ខខណ្ឌ។ អង្គការអន្តរជាតិមួយនេះពិនិត្យឃើញថា រយៈពេល១ឆ្នាំនៃការចាប់ខ្លួនអ្នករិះគន់រឿងព្រំដែនរូបនេះ រដ្ឋាភិបាលកម្ពុជាបានបន្តធ្វើការគាបសង្កត់ លើក្រុមសកម្មជនផ្សេងទៀត ដោយដាក់ជីវិតរបស់ពួកគេឱ្យស្ថិតក្នុងហានិភ័យ ខណៈដែលមានជំងឺកូវីដ១៩ឆ្លងចូលពន្ធនាគារ។
ចំណែកសមាគមគ្រូបង្រៀនកម្ពុជាឯករាជ្យដែលជាសមគមក្នុងស្រុក បានចេញសេចក្តីថ្លែងការណ៍ដោយឡែកមួយទៀតដោយទទួចឲ្យទម្លាក់បទចោលប្រកាន់លើ លោក រ៉ុង ឈុន ដោយសារតែសមាគមនេះព្រួយបារម្ភពីសុខភាពរបស់គាត់ នៅគ្រាដែលពន្ធនាគារកំពុងមានឆ្លងកូវីដ១៩។
សូមបញ្ជាក់ថា សាលាដំបូងរាជធានីភ្នំពេញ ចាប់ផ្តើមបន្តបើកការជំនុំជម្រះលើសំណុំរឿងលោក រ៉ុង ឈុន នៅថ្ងៃទី៣០កក្កដានេះ ក្នុងសំណុំរឿង «ញុះញង់បង្កឱ្យមានភាពវឹកវរដល់សន្តិសុខសង្គម»។
អ្នកឃ្លាំមើលបញ្ហាព្រំដែនរូបនេះត្រូវបានសមត្ថកិច្ចចាប់ខ្លួន កាលពីថ្ងៃទី៣១ ខែកក្កដា ឆ្នាំ២០២០ បន្ទាប់ពីលោកបានចុះទៅកាន់ព្រំដែនកម្ពុជា-វៀតណាម ខេត្តត្បូងឃ្មុំ។ ក្នុងពេលចុះទៅកាន់ព្រំដែនខេត្តនេះ លោក រ៉ុង ឈុន បានចេញសេចក្តីថ្លែងការណ៍ទៅកាន់សាធារណជនថា ការបោះបង្គោលព្រំដែនថ្មី រវាងកម្ពុជា-វៀតណាម បានចូលដីកម្ពុជា ប្រហែល ៥០០ម៉ែត្រ។ ប៉ុន្តែភ្លាមៗនោះ គណៈកម្មាធិការចម្រុះកិច្ចការព្រំដែនកម្ពុជា បានប្រកាសទាត់ចោលនូវសេចក្តីថ្លែងការណ៍របស់លោក រ៉ុង ឈុន ដោយចាត់ទុកថា ជាការផ្សាយព័ត៌មានមិនពិត និងបំផ្លើស។ គណៈកម្មាធិការចម្រុះកិច្ចការព្រំដែនចាត់ទុកថា ការផ្សាយរបស់លោក រ៉ុង ឈុន មានចេតនាទុច្ចរិត ក្នុងគោលបំណងបំភ័ន្តសាធារណៈមតិជាតិ និងអន្តរជាតិ ដោយធ្វើការចោទប្រកាន់ដោយគ្មានមូលដ្ឋាន មកលើការងារព្រំដែនរបស់រដ្ឋាភិបាល។
នៅថ្ងៃទី០១ ខែសីហា ឆ្នាំ២០២០ សាលាដំបូងរាជធានីភ្នំពេញក៏បានសម្រេចចេញដីកាឃុំខ្លួន លោក រ៉ុង ឈុន ជាបណ្តោះអាសន្ន ក្រោមការចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ