ក្រសួងសុខាភិបាលកម្ពុជាប្រកាសរកឃើញវីរុសកូវីដ១៩នៅក្នុងសាច់ក្របីបង្កកនាំចូលមកពីឥណ្ឌា
ក្រសួងសុខាភិបាលកម្ពុជាបានប្រកាសពីការរកឃើញវីរុសកូវីដ១៩នៅក្នុងសាច់ក្របីបង្កកចំនួន៣កុងតឺន័រក្នុងចំណោម៥កុងតឺន័រដែលនាំចូលមកពីប្រទេសឥណ្ឌា។ នេះបើតាមតារាងលទ្ធផលវិភាគរកវីរុសកូវីដ១៩លើសាច់ក្របីបង្កកទាំងនេះរបស់ក្រសួងសុខាភិបាលកាលពីថ្ងៃទី១៩ ខែកក្កដា តែទើបបង្ហាញឱ្យដឹងជាសាធារណៈនៅថ្ងៃទី២៧ ខែកក្កដា ឆ្នាំ២០២១នេះ។ អាជ្ញាធរគយកម្ពុជានឹងដុតកម្ទេចចោលសាច់ក្របីបង្កកទាំងនេះនៅថ្ងៃអង្គារនេះតែម្តង ដើម្បីជៀសវាងការឆ្លងរាលដាលទៅអ្នកបរិភោគ។
ចុះផ្សាយនៅថ្ងៃ៖
ស្តាប់ - ០២:១៧
សាច់ក្របីបង្កកដែលរកឃើញមានវីរុសកូវីដ១៩នេះ គឺ៣កុងតឺន័រក្នុងចំណោម៥កុងតឺន័រនាំចូលពីប្រទេសឥណ្ឌាដោយក្រុមហ៊ុនBovini Food Co.,LTD និងក្រុមហ៊ុន Ashary Investment & Construction Co.,LTD នៅទីលានផែស្ងួតត្រីកូដ ដ្រាយផត។ នេះបើតាមការបញ្ជាក់ឱ្យដឹងរបស់ក្រសួងសុខាភិបាលកម្ពុជា។ ក្នុងចំណោមសាច់ក្របីបង្កកដែលរកឃើញមានវីរុសកូវីដ១៩ទាំង៣កុងតឺន័រនេះ គឺ១កុងតឺន័ររបស់ក្រុមហ៊ុនBovini Food Co.,LTD និង២កុងតឺន័រទៀតជារបស់ក្រុមហ៊ុន Ashary Investment & Construction Co.,LTD។
ជាការកត់សម្គាល់ ការរកឃើញសាច់ក្របីបង្កកមានវីរុសកូវីដ១៩នេះ កើតឡើងបន្ទាប់ពីអាជ្ញាធរកម្ពុជាបានសម្រេចបើកឱ្យមានការនាំចូលទំនិញ និងសាច់បង្កកពីប្រទេសឥណ្ឌាវិញកាលពីថ្ងៃទី២២ ខែមិថុនា ក្រោយពីបិទមួយរយៈកាលពីថ្ងៃទី១ ខែឧសភា ដោយបារម្ភខ្លាចមានការនាំវីរុសកូវីដ១៩ពីឥណ្ឌាមកក្នុងប្រទេសកម្ពុជាតាមរយៈទំនិញ និងសាច់បង្កកទាំងនេះ។ ប៉ុន្តែ បើទោះជាបើកឡើងវិញក៏ដោយ គឺរាល់ទំនិញ និងសាច់បង្កកដែលមកពីប្រទេសឥណ្ឌាចាំបាច់ត្រូវមានការត្រួតពិនិត្យ និងធ្វើតេស្តរកវីរុសកូវីដ១៩ជាមុនសិន ទើបអនុញ្ញាតឱ្យមានការនាំចូល។
យ៉ាងណាក៏ដោយ កន្លងមក ក្រសួងសុខាភិបាលកម្ពុជានៅតែបន្តអំពាវនាវដល់ប្រជាពលរដ្ឋទាំងអស់ឱ្យប្រុងប្រយ័ត្នជានិច្ចជាមួយនឹងសាច់បង្កក ជាពិសេស មកពីប្រទេសឥណ្ឌានេះ។ បើតាមក្រសួងសុខាភិបាលកម្ពុជា វីរុសកូវីដ១៩អាចនៅក្នុងសាច់បង្កកបាន បើពុំមានការសម្អាត ឬធ្វើអនាម័យបានត្រឹមត្រូវទៅលើសាច់ដែលបង្កកទាំងនោះ។
សូមបញ្ជាក់ថា កម្ពុជា គឺទីផ្សារសំខាន់មួយនៃការនាំចូលសាច់បង្កកមកពីប្រទេសឥណ្ឌា។ ក្នុងរយៈពេល២ខែដំបូងក្នុងឆ្នាំ២០២១នេះ កម្ពុជាបាននាំចូលសាច់បង្កកពីប្រទេសឥណ្ឌាក្នុងទឹកប្រាក់ចំនួន៩,៣២លានដុល្លារអាមេរិក។ ទឹកប្រាក់នេះ គឺមានចំនួនជាងពាក់កណ្តាលនៃការនាំចេញសាច់បង្កកកាលពីឆ្នាំ២០២០ដែលមានទំហំទឹកប្រាក់១៧,៧លានដុល្លារអាមេរិក។ ចំណែកកាលពីឆ្នាំ២០១៩វិញ ប្រទេសកម្ពុជាបានចំណាយទឹកប្រាក់ចំនួន៦,៤ លានដុល្លារអាមេរិកក្នុងការនាំចូលសាច់បង្កកពីប្រទេសឥណ្ឌាមកបំពេញតម្រូវការនៅក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ