លោក ហ៊ុន សែន អំពាវនាវឲ្យអាណាព្យាបាលត្រៀមនាំកូនចៅអាយុក្រោម១៨ឆ្នាំទៅចាក់វ៉ាក់សាំងកូវីដ-១៩
ប្រមុខរដ្ឋាភិបាល លោក ហ៊ុន សែន អំពាវនាវឲ្យអាណាព្យាបាលត្រៀមខ្លួននាំកូនចៅ ដែលមានអាយុចន្លោះពី ១២ទៅដល់ ១៧ឆ្នាំ ដើម្បីចាក់វ៉ាក់សាំងការពារកូវីដ-១៩ ទៅតាមពេលវេលាដែលនឹងត្រូវកំណត់ដោយសមត្ថកិច្ចជំនាញនៅពេលខាងមុខ។ ការដែលអនុញ្ញាតឲ្យក្មេងក្រោមអាយុ១៨ឆ្នាំ អាចទទួលបានការចាក់វ៉ាក់សាំងប្រឆាំងកូវីដ-១៩ នៅពេលនេះ ត្រូវបាន លោក ហ៊ុន សែន ពន្យល់ថា ជាដំណោះស្រាយមួយ ដែលឈានទៅបើកសាលារៀនឡើងវិញ។
ចុះផ្សាយនៅថ្ងៃ៖
ស្តាប់ - ០១:៤៧
តាមរយៈសារជាសំឡេងតាមតេឡេក្រាម ដែលត្រូវបានផ្សព្វផ្សាយជាសាធារណៈនៅព្រឹកថ្ងៃទី១៦ ខែកក្កដា ប្រមុខរដ្ឋាភិបាល លោក ហ៊ុន សែន បានបញ្ជាឲ្យសាលារាជធានីភ្នំពេញ និងសាលាខេត្តកណ្តាល រាប់ទាំងសាលាខេត្តព្រះសីហនុ ដែលជាខេត្តអាទិភាពមួយដែរ ត្រូវត្រៀមរៀបចំ ដំណើរការចាក់វ៉ាក់សាំងដល់ក្មេងអាយុក្រោម១៨ឆ្នាំ។ លោកអះអាងថា ការចាក់វ៉ាក់សាំងនេះ គឺឈរលើគោលការណ៍ស្ម័គ្រចិត្ត ដូចមនុស្សពេញវ័យដែរ ដោយមិនត្រូវបង្ខំក្មេង ដែលខ្លាចម្ជុលឲ្យទៅចាក់វ៉ាក់សាំងនោះឡើយ។
បើតាមលោកប្រមុខរដ្ឋាភិបាល ក្មេងដែលមានអាយុចន្លោះពី១២ ទៅដល់ ១៧ឆ្នាំ គឺមានប្រមាណ ២លាននាក់ ដែលត្រូវការវ៉ាក់សាំងប្រមាណ ៤លានដូស។ តែលោកនៅមិនទាន់បញ្ជាក់ថា ក្មេងអាយុក្រោម១៨ឆ្នាំនេះ នឹងត្រូវចាក់វ៉ាក់សាំងឈ្មោះអ្វីនៅឡើយ ខណៈដែលលោកបញ្ជាឲ្យមន្ត្រីជំនាញចរចាជាមួយភាគីចិន ដើម្បីទទួលបានវ៉ាក់សាំងបន្ថែមទៀត។
ស្របពេលដែលដំណើរការចាក់វ៉ាក់សាំងទៅលើមនុស្សពេញវ័យសម្រេចបានជាង៥,៤ លាននាក់ លោក ហ៊ុន សែន បានលើកឡើងពីសេណារីយូ៉ចំនួន២ សម្រាប់ការចាក់វ៉ាក់សាំងការពារកូវីដ-១៩ លើក្មេងអាយុក្រោម១៨ឆ្នាំ។
ជម្រើសទី១ គឺការចាក់វ៉ាក់សាំងលើក្មេងអាយុក្រោម ១៨ឆ្នាំ គឺរង់ចាំទាល់តែការចាក់វ៉ាក់សាំងលើមនុស្សពេញវ័យសម្រេចបាន ១០លាននាក់ និងជម្រើសទី២ ការចាក់វ៉ាក់សាំងលើក្មេងអាយុក្រោម ១៨ឆ្នាំ គឺត្រូវធ្វើដំណាលគ្នានៅពេលខាងមុខនេះ ដោយចាប់ផ្តើមចេញពីភ្នំពេញ ខេត្តកណ្តាល និងខេត្តព្រះសីហនុ ។
ការដែលអនុញ្ញាតឲ្យក្មេងក្រោមអាយុ ១៨ឆ្នាំ អាចទទួលបានការចាក់វ៉ាក់សាំងប្រឆាំងកូវីដ-១៩ នៅពេលនេះ ត្រូវបាន លោក ហ៊ុន សែន ពន្យល់ថា ជាដំណោះស្រាយមួយដែលឈានទៅបើកសាលារៀន សម្រាប់ថ្នាក់អនុវិទ្យាល័យឡើងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ