គណបក្សថ្មីបេះដូងជាតិនឹងដាក់ឯកសារចុះបញ្ជីផ្លូវការនៅក្រសួងមហាផ្ទៃនៅថ្ងៃស្អែក ដើម្បីចូលរួមការបោះឆ្នោត
ក្រុមការងារគណបក្សបេះដូងជាតិនឹងដាក់ស្នាមមេដៃ លក្ខន្តិកៈ និងឯកសារពាក់ព័ន្ធនានាទៅកាន់ក្រសួងមហាផ្ទៃនៅថ្ងៃស្អែកនេះ ដើម្បីចូលរួមប្រកួតប្រជែងការបោះឆ្នោតនាពេលខាងមុខ។ នេះបើតាមលោកសៀម ភ្លុក ស្ថាបនិកបក្សបេះដូងជាតិដែលបានគូសបញ្ជាក់ប្រាប់វិទ្យុបារាំងអន្តរជាតិនៅព្រឹកថ្ងៃព្រហស្បតិ៍នេះ។ ការសម្រេចចុះបញ្ជីជាគណបក្សនយោបាយផ្លូវការនេះ ធ្វើឡើងស្របពេលគណបក្សទើបបង្កើតថ្មីនេះ ត្រូវបានអ្នកតាមដាននយោបាយមួយចំនួនដាក់មន្ទិលសង្ស័យថា ជាគណបក្សដែលមានការគាំទ្រពីក្រុមលោកសម រង្ស៊ី ពីក្រៅប្រទេស។
ចុះផ្សាយនៅថ្ងៃ៖
ស្តាប់ - ០២:១៦
គណបក្សបេះដូងជាតិនឹងបញ្ចប់មន្ទិលសង្ស័យនានាក្នុងពេលឆាប់ៗខាងមុខនេះ។ លោកសៀម ភ្លុក ស្ថាបនិកគណបក្សបេះដូងជាតិបានអះអាងថា ក្រុមការងារគណបក្សបានប្រមូលស្នាមមេដៃ រៀបចំលក្ខន្តិកៈ និងឯកសារពាក់ព័ន្ធផ្សេងៗរួចរាល់អស់ហើយៗនឹងដាក់ទៅកាន់ក្រសួងមហាផ្ទៃនៅថ្ងៃទី១៦ ខែកក្កដា ឆ្នាំ២០២១ ដើម្បីក្លាយជាគណបក្សស្របច្បាប់ចូលរួមប្រកួតប្រជែងការបោះឆ្នោតនៅក្នុងឆ្នាំ២០២២ និងឆ្នាំ២០២៣ខាងមុខនេះ។ ប៉ុន្តែ លោកសៀម ភ្លុក នៅតែមិនទាន់បង្ហាញឱ្យដឹងពីរចនាសម្ព័ន្ធក្បាលម៉ាស៊ីនដឹកនាំគណបក្សនៅឡើយទេ ដោយអះអាងថា នឹងបង្ហាញឱ្យដឹងនៅក្រោយគណបក្សត្រូវបានក្រសួងមហាផ្ទៃទទួលស្គាល់ជាផ្លូវការ។
ការមិនទាន់បង្ហាញពីក្បាលម៉ាស៊ីនដឹកនាំជាសាធារណៈនេះ ធ្វើឱ្យសាធារណមតិ ជាពិសេស អ្នកគាំទ្រអតីតគណបក្សសង្រ្គោះជាតិ ក៏ដូចជាសារព័ត៌មានមួយចំនួនដាក់មន្ទិលសង្ស័យថា គណបក្សថ្មីនេះត្រូវបង្កើតឡើងដោយមានការគាំទ្រពីសំណាក់ក្រុមលោកសម រង្ស៊ី ពីក្រៅប្រទេស។ ក្រុមលោកសម រង្ស៊ី មិនមានការចេញមកទទួលស្គាល់ ឬបដិសេធយ៉ាងណានោះទេ។ ក៏ប៉ុន្តែ លោកសៀម ភ្លុក ធ្លាប់បានបដិសេធថា គណបក្សនេះមិនជាប់ពាក់ព័ន្ធនឹងក្រុមលោកសម រង្ស៊ីឡើយ តែគ្រាន់តែមានមន្រ្តីអតីតបក្សប្រឆាំងខ្លះបានមកចូលរួមតែប៉ុណ្ណោះ។
បើតាមលោកសៀម ភ្លុក គណបក្សបេះដូងជាតិកើតចេញពីទឹកចិត្តស្មារតី និងឆន្ទៈសាមគ្គីនៃអ្នកជាតិនិយមពិតប្រាកដមកពីគ្រប់និន្នាការនយោបាយទាំងអស់ ដើម្បីគោលដៅរួម ផលប្រយោជន៍រួមសម្រាប់ប្រទេសជាតិ។ លោកបានគូសបញ្ជាក់ឱ្យដឹងថា គណបក្សបេះដូងជាតិមិនរួមសាមគ្គី ដើម្បីបំពេញឧបាយកលទុច្ចរិតក្នុងចេតនាបំរើផលប្រយោជន៍បុគ្គល បក្ខពួកណាឡើយ។ សម្រាប់លោកសៀម ភ្លុក គោលដៅរួមរបស់គណបក្សបេះដូងជាតិ គឺដើម្បីសេរីភាព និងយុត្តិធម៌សង្គមតាមមាគ៌ាប្រជាធិបតេយ្យក្រោមឆ័ត្រកិច្ចព្រមព្រៀងសន្តិភាពទីក្រុងបារីស និងរដ្ឋធម្មនុញ្ញកម្ពុជា។
សូមបញ្ជាក់ថា គណបក្សបេះដូងជាតិនេះ គឺជាគណបក្សនយោបាយចុងក្រោយដែលទើបបង្កើតឡើង ដើម្បីចូលរួមការបោះឆ្នោតនាពេលខាងមុខនេះ។ ក្រៅពីគណបក្សនេះ ក៏មានគណបក្សទើបបង្កើតថ្មីមួយចំនួនទៀតផងដែរ មានជាអាទិ៍គណបក្សខ្មែរអភិរក្ស គណបក្សខ្មែរស្រឡាញ់ជាតិ និងគណបក្សកែទម្រង់កម្ពុជា។ ចំពោះបក្សថ្មីៗទាំងនេះ មេធាវីលោកកឹម សុខា បានចេញមកបញ្ជាក់ជាថ្មីថា លោកកឹម សុខា មិនជាប់ពាក់ព័ន្ធនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ