រដ្ឋាភិបាលកម្ពុជាអនុម័តសេចក្តីព្រាងច្បាប់វិនិយោគ ដើម្បីទាក់ទាញ និងលើកកម្ពស់ការវិនិយោគបន្ថែម
សេចក្តីព្រាងច្បាប់ស្តីពីការវិនិយោគ ត្រូវបានរដ្ឋាភិបាលកម្ពុជាសម្រេចអនុម័តជាផ្លូវការហើយនៅព្រឹកថ្ងៃសុក្រនេះ។ ការអនុម័តនេះ គឺនៅក្នុងអង្គប្រជុំគណៈរដ្ឋមន្រ្តីកម្ពុជាតាមប្រព័ន្ធអនឡាញដឹកនាំដោយលោកនាយករដ្ឋមន្រ្តីហ៊ុន សែន។ លោកប្រមុខរដ្ឋាភិបាលកម្ពុជា បានគូសបញ្ជាក់ថា ការតាក់តែងសេចក្តីព្រាងច្បាប់នេះឡើង គឺដើម្បីជាមូលដ្ឋានគតិយុត្តិសម្រាប់ទាក់ទាញ និងផ្តល់វិសាលភាពដល់វិនិយោគិនងាយស្រួលក្នុងកិច្ចវិនិយោគនៅក្នុងប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:៤៤
សេចក្តីព្រាងច្បាប់ស្តីវិនិយោគនៃព្រះរាជាណាចក្រកម្ពុជានេះ ត្រូវបានរៀបចំឡើងក្នុងគោលបំណងបង្កើតនូវក្របខ័ណ្ឌគតិយុត្តដែលបើកចំហ មានតម្លាភាព អាចប៉ាន់ប្រមាណទុកជាមុនបាន ប្រកបដោយភាពអំណោយផលសម្រាប់ការវិនិយោគ ដើម្បីទាក់ទាញ និងលើកកម្ពស់ការវិនិយោគដោយបុគ្គលសញ្ជាតិខ្មែរ ឬបរទេស ប្រកបដោយគុណភាព ប្រសិទ្ធភាពនៅក្នុងប្រទេសកម្ពុជា។ នេះបើតាមការគូសបញ្ជាក់ឱ្យដឹងរបស់លោកផៃ ស៊ីផាន អ្នកនាំពាក្យរដ្ឋាភិបាលកម្ពុជានៅលើទំព័រហ្វេសប៊ុករបស់លោកនៅព្រឹកថ្ងៃសុក្រនេះ។
បើតាមការលើកឡើងរបស់លោកផៃ ស៊ីផាន គឺថា សេចក្តីព្រាងច្បាប់នេះ មានលក្ខណៈពិសេសជាច្រើន ប៉ុន្តែអ្វីដែលគួរឱ្យកត់សម្គាល់ថា វានឹងបង្កើនភាពប្រកួតប្រជែងរបស់កម្ពុជា ដើម្បីធ្វើឱ្យរចនាសម្ព័ន្ធសេដ្ឋកិច្ចអាចធ្វើពិពិធកម្មបាននិងធន់ទៅនឹងវិបត្តិក្នុងតំបន់ និងសកលលោក ។ មិនតែប៉ុណ្ណោះ សេចក្តីព្រាងច្បាប់នេះ ក៏នឹងផ្តល់ការការពារនូវសិទ្ធិ និងផលប្រយោជន៍ស្របច្បាប់ដល់វិនិយោគិននៅក្នុងប្រទេសកម្ពុជាតាមរយៈការបង្កើតនូវក្របខ័ណ្ឌគតិយុត្តដែលមានលក្ខណៈគ្រប់ជ្រុងជ្រោយ និងមានតុល្យភាព ស្របទៅនឹងផលប្រយោជន៍ជាតិ។
បន្ថែមលើនេះ សេចក្តីព្រាងច្បាប់ស្តីពីវិនិយោគ ក៏បានចែងពីរបបលើកទឹកចិត្តផ្នែកពន្ធដល់វិនិយោគិនផងដែរ។ ការលើកទឹកចិត្តនេះ មាន៣ប្រភេទ គឺការលើកទឹកចិត្តមូលដ្ឋាន ការលើកទឹកចិត្តបន្ថែម និងការលើកទឹកចិត្តពិសេស។ ចំពោះការលើកទឹកចិត្តមូលដ្ឋាន មាន២ជម្រើស គឺទី១ ផ្តោតសំខាន់ទៅលើការលើកលែងពន្ធលើប្រាក់ចំណូលសម្រាប់រយៈពេលចាប់ពី៣ឆ្នាំ រហូតដល់ ៩ឆ្នាំ ទៅតាមវិស័យ និងសកម្មភាពវិនិយោគ គិតចាប់ពីពេលដែលទទួលបានប្រាក់ចំណូលលើកដំបូង។ ចំណែក ជម្រើសទី២ គឺផ្តោតសំខាន់ទៅលើការទទួលបានសិទ្ធិកាត់កងចំណាយមូលធន តាមរយៈការរំលស់ពិសេស និងសិទ្ធិកាត់កងរហូតដល់ ២០០% លើចំណាយសំខាន់ៗផ្សេងទៀត សម្រាប់រយៈពេលរហូតដល់ ៩ឆ្នាំ និងការលើកទឹកចិត្តផ្សេងៗទៀត។
អ្នកនាំពាក្យរដ្ឋាភិបាលកម្ពុជា បានអះអាងថា នៅក្នុងស្ថានភាពវិបត្តិនៃជំងឺកូវីដ១៩ដែលកំពុងញាំញីពិភពលោក រួមទាំងកម្ពុជាផង សេចក្តីព្រាងច្បាប់ស្តីពីវិនិយោគនេះ គឺពិតជាមានសារៈសំខាន់ខ្លាំងណាស់ម្រាប់ប្រទេសកម្ពុជា ដោយសារសេចក្តីព្រាងច្បាប់នេះ នឹងធ្វើឱ្យកម្ពុជាកាន់តែមានភាពទាក់ទាញចំពោះការវិនិយោគផ្ទាល់ពីបរទេសនិងការវិនិយោគក្នុងស្រុក។ រីឯ លោកនាយករដ្ឋមន្រ្តីហ៊ុន សែន វិញបានបន្ថែមថា សេចក្តីព្រាងច្បាប់នេះ នឹងក្លាយជាមូលដ្ឋានគតិយុត្តិសម្រាប់ទាក់ទាញ និងផ្តល់វិសាលភាព ដល់វិនិយោគិនងាយស្រួលក្នុងកិច្ចវិនិយោគមកកម្ពុជា។ បើតាមលោកហ៊ុន សែន គឺកម្ពុជាយល់ឃើញថា អ្នកវិនិយោគត្រូវការសន្តិភាព ស្ថិរភាព ដែលជាអាទិភាពនៃការសម្រេចចិត្តយកកម្ពុជាជាទិសដៅវិនិយោគ ទោះជាស្ថានភាពអន្តរជាតិប្រឈមក្នុងវិស័យនយោបាយ និងពាណិជ្ជកម្មយ៉ាងណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ