ប្រមុខការទូតអូស្រ្តាលីទូរស័ព្ទមកនិយាយពីបញ្ហាប្រជាធិបតេយ្យនៅកម្ពុជា និងវិបត្តិភូមាជាមួយប្រមុខការទូតខ្មែរ
រដ្ឋមន្រ្តីការបរទេសអូស្រ្តាលី គឺលោកស្រីម៉ារីស ផេន(Marise Payne)កាលពីថ្ងៃពុធម្សិលមិញនេះ បានទូរស័ព្ទមកនិយាយជាមួយរដ្ឋមន្រ្តីការបរទេសកម្ពុជា លោកប្រាក់ សុខុន អំពីបញ្ហាលទ្ធិប្រជាធិបតេយ្យនៅកម្ពុជា និងវិបត្តិនៅក្នុងប្រទេសភូមា។ លោកស្រីម៉ារីស ផេន គឺជាមន្រ្តីជាន់ខ្ពស់ការទូតទី២ហើយដែលបាននិយាយពីបញ្ហាទាំងនេះជាមួយប្រមុខការទូតកម្ពុជា។ កាលពីខែមុន រដ្ឋមន្រ្តីការបរទេសអង់គ្លេសក៏បានមកកម្ពុជាដោយផ្ទាល់ ដើម្បីនិយាយបញ្ហានេះជាមួយកម្ពុជាផងដែរ មុនកម្ពុជារៀបចំកិច្ចប្រជុំកំពូលអាស៊ាននៅឆ្នាំក្រោយ។
ចុះផ្សាយនៅថ្ងៃ៖
ស្តាប់ - ០២:១០
បញ្ហាវិបត្តិនៅក្នុងប្រទេសភូមា និង ការប្រយុទ្ធប្រឆាំងនឹងជំងឺកូវីដ១៩ គឺជាប្រធានបទសំខាន់ដែលលោកស្រីម៉ារីស ផេន(Marise Payne)រដ្ឋមន្រ្តីការបរទេសអូស្រ្តាលី និងលោកប្រាក់ សុខុន រដ្ឋមន្រ្តីការបរទេសកម្ពុជាលើកមកមកជជែកគ្នាតាមខ្សែទូរស័ព្ទ។ តាមរយៈទំព័រហ្វេសប៊ុករបស់ខ្លួន លោកស្រីម៉ារីស ផេន បានបញ្ជាក់ឱ្យដឹងថា លោកស្រីបានសង្កត់ធ្ងន់ពីការគាំទ្ររបស់អូស្រ្តាលីចំពោះអាស៊ាន និងការឆ្លើយតបរបស់អាស៊ានទៅលើបញ្ហាភូមា។ ក្រៅពីបញ្ហាភូមានេះ រដ្ឋមន្រ្តីការបរទេសអូស្រ្តាលីក៏បានបង្ហាញពីការយកចិត្តទុកដាក់ខ្ពស់របស់អូស្រ្តាលីទៅលើការអភិវឌ្ឍនៅក្នុងប្រទេសកម្ពុជា និងដំណើរការលទ្ធិប្រជាធិបតេយ្យផងដែរ។
ប៉ុន្តែ បញ្ហាលទ្ធិប្រជាធិបតេយ្យនៅកម្ពុជានេះ គឺមិនមានការនិយាយចេញពីរដ្ឋមន្រ្តីការបរទេសកម្ពុជាដោយផ្ទាល់ និងតាមរយៈសេចក្តីប្រកាសព័ត៌មានផ្លូវការឡើយ។ ផ្ទុយទៅវិញ លោកប្រាក់ សុខុន បានអះអាងតាមទំព័រហ្វេសប៊ុករបស់លោកថា លោក និងលោកស្រីម៉ារីស ផេន បានពិភាក្សាគ្នាលើកិច្ចការសំខាន់បន្ទាន់ រួមមាន កិច្ចសហប្រតិបត្តិការក្នុងការឆ្លើយតបទៅនឹងជំងឺកូវីដ-១៩ ការពង្រឹងភាពជាដៃគូអាស៊ាន-អូស្រ្តាលី និងការធ្វើជាប្រធានអាស៊ានរបស់កម្ពុជានៅក្នុងឆ្នាំ២០២២។
ដោយឡែក ទាក់ទងនឹងបញ្ហានៅប្រទេសភូមាវិញ លោកប្រាក់ សុខុន បានឆ្លើយតបតាមសេចក្តីប្រកាសព័ត៌មានរបស់ក្រសួងការបរទេសកម្ពុជាថា កម្ពុជាបានត្រៀមខ្លួនក្នុងការធ្វើការជាមួយបណ្តាប្រទេសសមាជិកអាស៊ាន និងដៃគូអាស៊ានដទៃទៀត ដើម្បីគាំទ្រដល់ការវិលត្រឡប់ទៅរកមាគ៌ាប្រក្រតីភាព និងការផ្លាស់ប្តូរតាមរយៈប្រជាធិបតេយ្យរបស់ប្រទេសភូមា។ ជាមួយគ្នានេះ លោកប្រាក់ សុខុន បង្ហាញការជឿជាក់ថា តាមយន្តការអាស៊ាន ភូមាអាចនឹងរកឃើញដំណោះស្រាយដោយសន្តិវិធី។
គួររំឮកថា ពាក់ព័ន្ធនឹងបញ្ហានៅភូមានេះ កាលពីខែមុនរដ្ឋមន្រ្តីការបរទេសអង់គ្លេសក៏បានមកកាន់ប្រទេសកម្ពុជាដោយផ្ទាល់ ដើម្បីជជែកពីបញ្ហានេះជាមួយរដ្ឋមន្រ្តីការបរទេសកម្ពុជា។ អង់គ្លេសក៏ដូចអូស្ត្រាលីដែរបានមកចែចង់កម្ពុជា មុនកម្ពុជាក្លាយជាម្ចាស់ផ្ទះរៀបចំកិច្ចប្រជុំកំពូលអាស៊ានៅក្នុងឆ្នាំ២០២២។ ទាំងរដ្ឋមន្រ្តីការបរទេសអង់គ្លេស និងអូស្រ្តាលីសុទ្ធតែបញ្ជាក់ដូចគ្នាថា កំពុងទន្ទឹងរង់ចាំធ្វើការជិតស្និតជាមួយកម្ពុជាក្នុងពេលដែលកម្ពុជាជាប្រធានអាស៊ាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ