គណបក្សប្រជាធិបតេយ្យមូលដ្ឋានស្វែងរកថវិកាជួយជនក្រីក្រនាឱកាសខួបមរណភាព លោក កែម ឡី
គណបក្សប្រជាធិបតេយ្យមូលដ្ឋានប្រកាសថា ខ្លួននឹងរៀបចំពិធីរំឭកខួប៥ឆ្នាំនៃឃាតកម្មលើលោកបណ្ឌិត កែម ឡី ដោយមានរៀបចំពិធីតាមបែបព្រះពុទ្ធសាសនា និងការចែកអំណោយទៅដល់គ្រួសារលំបាកខ្លាំងក្នុងគ្រាកូវីដ១៩នេះ។ លើសពីនេះគណបក្សនឹងផលិតវីដេអូ រំឭកអនុស្សាវរីយ៍ជាមួយលោក កែម ឡី។ លោក កែម ឡី ដែលគណបក្សនេះចាត់ទុកថា ជាអ្នករូតវាំងននសង្គម និងជាពិសេស ជាស្ថាបនិកដែលបានរួមចំណែកបង្កើតគណបក្សប្រជាធិបតេយ្យមូលដ្ឋាន។
ចុះផ្សាយនៅថ្ងៃ៖
ស្តាប់ - ០២:០៤
មុនពេលខួប៥ឆ្នាំនៃឃាតកម្មលើលោក កែម ឡី ចូលមកដល់ថ្ងៃទី១០កក្កដា ការប្រកាសរៀបចំពីធីរំឭកខួបដល់អ្នកវិភាគបញ្ហាសង្គមរូបនេះត្រូវបានផុសផុលឡើងជាបន្តបន្ទាប់ រាប់ចាប់តាំងពីក្រុមគ្រួសាររបស់លោក កែម ឡី ដែលនៅក្រៅប្រទេស អង្គការសិទ្ធិមនុស្សក្នុងស្រុក និងគណបក្សនយោបាយមួយចំនួន។
ដោយឡែក គណបក្សប្រជាធិបតេយ្យមូដ្ឋានដែលអះអាងថា លោក កែម ឡី គឺជាបិតាស្ថាបនិក បានប្រកាសរៀបចំពិធីរំឭកខួប៥ឆ្នាំនៃឃាតកម្មលើបណ្ឌិត កែម ឡី។ ជាពិធីតាមបែបព្រះពុទ្ធសាសនា និងមានការចែកអំណោយទៅដល់គ្រួសារដែលមានស្ថានភាពលំបាកខ្លាំងក្នុងគ្រាកូវីដ១៩នេះ។ មិនត្រឹមតែប៉ុណ្ណោះ គណបក្សនេះនឹងផលិតវីដេអូ រំឭកអនុស្សាវរីយ៍ជាមួយ លោក កែម ឡី ដែលគណបក្សនេះចាត់ទុកថា ជាអ្នករូតវាំងននសង្គម ដែលបានរួមចំណែកបង្កើតគណបក្សប្រជាធិបតេយ្យមូលដ្ឋាននេះឡើង។
ចំណែកមជ្ឈមណ្ឌលសិទ្ធិមនុស្សកម្ពុជាវិញក៏បានប្រកាសរៀបចំយុទ្ធនាការដើម្បីរំឭកខួប៥ឆ្នាំនៃឃាតកម្មលើលោក កែម ឡី ផងដែរ ដោយអង្គការក្នុងស្រុកមួយនេះ មានសកម្មភាពជាបន្តបន្ទាប់រួមមាន៖ ការផ្លាស់ប្តូរប្រូហ្វាល់ហ្វេសប៊ុកចាប់ពីថ្ងៃទី១ដល់៣១កក្កដា ជាមួយនឹងសាររបស់លោកបណ្ឌិត កែម ឡី។ ការរៀបចំកម្មវិធីតាមប្រព័ន្ធអនឡាញ ដើម្បីឲ្យសាធារណៈជនបានចែករំលែកការនឹករលឹក និងផ្ញើសារទៅកាន់អ្នកវិភាគរូបនេះ។ ការដាក់បញ្ចាំងវីដេអូខ្សែជីវិតរបស់លោកបណ្ឌិត កែម ឡី នៅលើហ្វេសប៊ុក និងចុងក្រោយ នៅថ្ងៃទី១០កក្កដា អង្គការនេះនឹងចេញប័ណ្ណព័ត៌មានស្តីពីនិទណ្ឌភាពដោយរំលេចពីករណី ឃាតកម្មលើលោក កែម ឡី ផងដែរ។
ជុំវិញការរំឭកខួប៥ឆ្នាំនៃមរណភាពលោក កែម ឡី នេះដែរ សហគមន៍ខ្មែរនៅក្រៅប្រទេសនិងគណបក្សប្រឆាំងនៅក្រៅស្រុក បានកំណត់យកថ្ងៃទី១០ ខែកក្កដា ដើម្បីប្រារព្ធខួប៥ឆ្នាំនេះ ដោយប្រារព្ធពិធីតាមបែបព្រះពុទ្ធសាសនា ជាមួយនឹងការទទូចជាថ្មីទៀតឲ្យផ្តល់យុត្តិធម៌ជូនក្រុមគ្រួសារអ្នកវិភាគសង្គមរូបនេះ។
បើតាម អ្នកស្រី ប៊ូ រចនា ភរិយារបស់លោក កែម ឡី ដែលកំពុងរស់នៅប្រទេសអូស្ត្រាលី ការរំឭកខួប៥ឆ្នាំនៃមរណភាពរបស់លោក កែម ឡី ត្រូវបានអាជ្ញាធរប្រទេសនេះអនុញ្ញាតឲ្យមានមនុស្សចូលរួមចំនួន៣០០នាក់ នៅថ្ងៃទី១០កក្កដា ច្រើនជាងកាលពីឆ្នាំមុន ដែលមានអ្នកចូលរួមបានត្រឹមតែ១០នាក់ប៉ុណ្ណោះ ដោយសារតែបារម្ភពីការឆ្លងជំងឺកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ