កូវីដ១៩៖ ក្រសួងប្រៃសណីយ៍ថា ការលក់ឧបករណ៍តេស្តរហ័សនឹងឲ្យអាទិភាពដល់ស្ថាប័នមានបុគ្គលិកលើសពី១០០នាក់
ឧបករណ៍ធ្វើតេស្តរហ័សរកជំងឺកូវីដ-១៩ នឹងត្រូវដាក់លក់ជាអាទិភាពដល់ស្ថាប័នឯកជនណាដែលមានបុគ្គលិកធ្វើការជាប្រចាំថ្ងៃលើសពី១០០នាក់ឡើងទៅ។ នេះបើតាមការបញ្ជាក់ឲ្យដឹងពីមន្ត្រីជាន់ខ្ពស់មួយរូបនៃក្រសួងប្រៃសណីយ៍ ដែលបានថ្លែងប្រាប់វិទ្យុបារាំងអន្តរជាតិនៅថ្ងៃអាទិត្យទី០៤កក្កដានេះ។ ចំពោះក្រុមហ៊ុនស្ថិតនៅក្នុងបញ្ជីអាទិភាព ហើយបានទិញឧបករណ៍ធ្វើតេស្តរហ័សរកជំងឺកូវីដ-១៩ ក្រសួងនឹងបណ្តុះបណ្តាលស្ថាប័នទាំងនោះអំពីការយកសំណាក ដើម្បីធានាបានថា ឧបករណ៍ធ្វើតេស្តរហ័សនោះ ត្រូវបានប្រើប្រាស់តាមស្តង់ដារបច្ចេកទេស និងមានប្រសិទ្ធភាព។
ចុះផ្សាយនៅថ្ងៃ៖
ស្តាប់ - ០២:០២
ថ្លែងប្រាប់វិទ្យុបារាំងអន្តរជាតិ នៅថ្ងៃអាទិត្យ ទី០៤ ខែកក្កដានេះ លោក លីវ សុផាណារិទ្ធិ អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ បានគូសបញ្ជាក់ឲ្យដឹងថា ការបញ្ជាទិញឧបករណ៍ធ្វើតេស្តរហ័សរកមេរោគកូវីដ-១៩ ក្រសួងនឹងបញ្ជាទិញដោយផ្ទាល់ពីរោងចក្រនៅប្រទេសកូរ៉េខាងត្បូង ក្នុងតម្លៃ ៣.៧ដុល្លារ និងចែកចាយបន្តក្នុងតម្លៃដើមដូចគ្នា។
ចាប់តាំងពីមានការជូនដំណឹងអំពីការចែកចាយឧបករណ៍ធ្វើតេស្តរហ័សរកជំងឺកូវីដ-១៩ដល់ស្ថាប័នឯកជន កាលពីថ្ងៃទី០១កក្កដាមក លោក លីវ សុផាណារិទ្ធិ បញ្ជាក់ថា ក្រសួងប្រៃសណីយ៍បានទទួលបែបបទនៃការស្នើសុំបញ្ជាទិញជាបន្តបន្ទាប់ពីរោងចក្រនិងស្ថាប័នក្រុមហ៊ុនឯកជនជាច្រើន តែមិនទាន់អាចបញ្ជាក់បានទេថា ក្នុងរង្វង់តួលេខប៉ុន្មាន ខណៈដែលក្រសួងអះអាងថានឹងព្យាយាមផ្គត់ផ្គង់ឲ្យបាន តាមតម្រូវការជាក់ស្តែង។
បើតាមមន្ត្រីជាន់ខ្ពស់រូបនេះ ជាអាទិភាព ក្រសួងនឹងលក់ឧបករណ៍ធ្វើតេស្តរហ័សរកជំងឺកូវីដ-១៩ដល់ស្ថាប័នណាដែលមានបុគ្គលិកធ្វើការកកកុញ ចាប់ពី១០០នាក់ឡើងទៅ និងស្ថាប័នណាដែលមានទីតាំងស្ថិតក្នុងតំបន់ហានិភ័យនៃការឆ្លងរាលដាលនៃជំងឺកូវីដ-១៩។ ចំណែកឯស្ថាប័នឯកជនដែលមានបុគ្គលិកធ្វើការក្រោម១០០នាក់ជាប្រចាំថ្ងៃ និងមិនស្ថិតក្នុងតំបន់រាលដាលខ្លាំងនៃជំងឺកូវីដ-១៩ ក្រសួងនឹងលក់ឧបករណ៍ធ្វើតេស្តរហ័សរកជំងឺកូវីដ-១៩ជូនតាមក្រោយ។ ចំពោះក្រុមហ៊ុនស្ថិតនៅក្នុងបញ្ជីអាទិភាព ហើយបានទិញឧបករណ៍ធ្វើតេស្តរហ័សរកជំងឺកូវីដ-១៩ ក្រសួងនឹងបណ្តុះបណ្តាលស្ថាប័នទាំងនោះអំពីការយកសំណាក ដើម្បីធានាបានថា ឧបករណ៍ធ្វើតេស្តរហ័សនោះ ត្រូវបានប្រើប្រាស់តាមស្តង់ដារបច្ចេកទេស និងមានប្រសិទ្ធភាព។
គួរជម្រាបជូនថា ការប្រកាសចែកចាយឧបករណ៍ធ្វើតេស្តរហ័សអង់ទីហ្សែនមេរោគកូវីដ-១៩ដល់ស្ថាប័នឯកជន ធ្វើឡើងបន្ទាប់ពីមានសំណើពីលោកនាយករដ្ឋមន្រ្តីហ៊ុន សែន កាលពីថ្ងៃទី០១កក្កដា។ សម្រាប់ប្រមុខរដ្ឋាភិបាលកម្ពុជា ការធ្វើតេស្តរកជំងឺកូវីដ-១៩តាមឧបករណ៍ធ្វើតេស្តរហ័ស ចាំបាច់ណាស់ក្នុងការរួមចំណែកទប់ស្កាត់ការឆ្លងរាលដាលជំងឺកូវីដ-១៩ក្នុងសហគមន៍ ដែលរហូតមកទល់ពេលនេះ នៅតែមានស្ថានភាពគួរឲ្យព្រួយបារម្ភ ដោយសារចំនួនតួលេខអ្នកឆ្លងនិងស្លាប់បន្តមានចំនួនច្រើនជារៀងរាល់ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ