លោកហ៊ុន សែន ប្រកាសយកចិនធ្វើជាបង្អែកយុទ្ធសាស្រ្តផ្គត់ផ្គង់វ៉ាក់សាំងបង្ការជំងឺកូវីដ១៩ដល់កម្ពុជា
លោកនាយករដ្ឋមន្រ្តីហ៊ុន សែន នៅព្រឹកថ្ងៃព្រហស្បតិ៍នេះបានបើកកិច្ចប្រជុំពិសេស ដើម្បីពិភាក្សាពីវិធានការបន្ថែមទប់ស្កាត់ការឆ្លងរីករាលដាលនៃជំងឺកូវីដ១៩។ តាមរយៈការផ្សាយផ្ទាល់តាមទូរទស្សន៍ជាតិកម្ពុជា លោកប្រមុខរដ្ឋាភិបាលកម្ពុជាបានប្រកាសយកចិនធ្វើជាបង្អែកយុទ្ធសាស្រ្តសម្រាប់ផ្គត់ផ្គង់វ៉ាក់សាំងបង្ការជំងឺកូវីដ១៩ដល់កម្ពុជា។ សម្រាប់លោកហ៊ុន សែន ចិន គឺជាមិត្តដែលជួយកម្ពុជាដោយពិតប្រាកដ និងទាន់ពេលវេលា ដោយមិនសន្យាខ្យល់ដូចប្រទេសមួយចំនួនឡើយ។
ចុះផ្សាយនៅថ្ងៃ៖
ស្តាប់ - ០២:១៥
ប្រមុខរដ្ឋាភិបាលកម្ពុជា លោកហ៊ុន សែន បានប្រកាសយកចិនធ្វើជាបង្អែកគោលក្នុងការផ្គត់ផ្តង់វ៉ាក់សាំងបង្ការជំងឺកូវីដ១៩សម្រាប់ចាក់ឱ្យប្រជាពលរដ្ឋខ្មែរឱ្យបាន១០លាននាក់តាមផែនការដែលបានគ្រោងទុក។ ចំណែក ប្រទេស និងប្រភពផ្តត់ផ្តង់វ៉ាក់សាំងដទៃ គឺគ្រាន់ជាការគាំទ្របន្ទាប់បន្សំពីចិនតែប៉ុណ្ណោះ។ លោកនាយករដ្ឋមន្រ្តីហ៊ុន សែន បានអះអាងទៀតថា ការសម្រេចយកចិនធ្វើជាបង្អែកផ្តត់ផ្គង់វ៉ាក់សាំងនេះ គឺជារឿងត្រឹមត្រូវ ព្រោះបើគ្មានចិនទេ កម្ពុជាមិនអាចចាក់វ៉ាក់សាំងដល់ប្រជាពលរដ្ឋបានជាង៤លាននាក់ ឫស្មើប្រមាណ៤២%បានឡើយ អាចនិយាយឱ្យខ្លីថា ត្រឹមតែ២០ម៉ឺននាក់ក៏មិនប្រាកដថា បាននោះដែរ។
គួរជម្រាបជូនថា ចិននឹងផ្តល់វ៉ាក់សាំងទាំងជំនួយ និងលក់ដល់កម្ពុជាចំនួន២០លានដូស ហើយគិតមកដល់ពេលនេះ កម្ពុជាបានទទួលវ៉ាក់សាំងពីចិនប្រមាណ១១លានដូសហើយ។ នៅខែក្នុងកក្កដានេះ កម្ពុជានឹងទទួលបានវ៉ាក់សាំងបន្ថែមចំនួន៥លានដូស ហើយនៅក្នុងខែសីហា ខាងមុខនឹងទទូលបានចំនួន៤លានដូសទៀតពីប្រទេសចិន។ បើតាមលោកនាយករដ្ឋមន្រ្តីហ៊ុន សែន កម្ពុជានឹងទទួលបានវ៉ាក់សាំងជាង២៩លាន៧សែនដូស ក្នុងនោះជាជំនួយតាមរយៈយន្តការCOVAX ចំនួន៧លានដូស ពីអូស្រ្តាលីប្រមាណ៣លានដូស និងពីចិនចំនួន២០លានដូស។
ប៉ុន្តែតាមរយៈយន្តការCOVAX កម្ពុជាបានទទួលត្រឹមតែជាង៣២ម៉ឺនដូសប៉ុណ្ណោះគិតមកដល់ពេលនេះ ខណៈចិនបានផ្តត់ផ្តង់ដល់កម្ពុជាជាបន្តបន្ទាប់ចូលដល់រាប់លានដូសហើយ។ លោកនាយរកដ្ឋមន្រ្តីហ៊ុន សែន បានគូសបញ្ជាក់ថា កម្ពុជាមិនរើសអើងវ៉ាក់សាំងប្រទេសណាទេ ប៉ុន្តែប្រទេសខ្លះបានត្រឹមតែសន្យា តែមិនបានធ្វើទេដែលខុសពីចិន។ ចិនដែលលោកហ៊ុន សែន អះអាងថា តែងតែជួយដល់កម្ពុជាដោយមិនសន្យាចោលឡើយ។ ត្រង់ចំណុចនេះ លោកនាយករដ្ឋមន្រ្តីគូសបញ្ជាក់ដោយចោទសួរជាថ្មីថា បើមិនឱ្យលោកទៅពឹងចិន តើឱ្យលោកទៅពឹងអ្នកណាវិញ។
តាមគម្រោង កម្ពុជានឹងចាក់វ៉ាក់សាំងបង្ការជំងឺកូវីដ១៩ដល់ប្រជាពលរដ្ឋឱ្យបានយ៉ាងតិច១០លាននាក់ ដោយគ្រោងសម្រេចឱ្យបាននៅអំឡុងខែវិច្ឆិកា ឆ្នាំ២០២១នេះ។ ក្រោយបញ្ចប់ការចាក់បាន១០លាននាក់នេះហើយ រដ្ឋាភិបាលកម្ពុជាក៏គ្រោងនឹងពិចារណាចាក់វ៉ាក់សាំងលើកុមារដែលមានអាយុក្រោម ១៨ឆ្នាំបន្ថែមទៀតផងដែរ។ នេះបើតាមការបញ្ជាក់ឱ្យដឹងបន្ថែមពីលោកនាយករដ្ឋមន្រ្តីហ៊ុន សែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ