លោក ហ៊ុន សែន៖ បើគ្មានជំនួយពីចិនកុំថាឡើយចាក់បាន ៤លាននាក់ សូម្បី២០ម៉ឺននាក់មិនបានផង
លោកនាយករដ្ឋមន្ត្រី ហ៊ុន សែន កាលពីថ្ងៃម្សិលមិញ បានសម្តែងការអរគុណទៅដល់ប្រទេសចិន ដែលបានផ្តល់ជំនួយ និងជួយផ្គត់ផ្គង់វ៉ាក់សាំងប្រឆាំងកូវីដ-១៩ ទាន់ពេលវេលាដល់ប្រទេសកម្ពុជា។ ការបង្ហាញនូវការពេញចិត្តរបស់លោកនាយករដ្ឋមន្ត្រីដូច្នេះ ធ្វើឡើងចំពេលដែលប្រទេសកម្ពុជាសម្រេចបានការចាក់វ៉ាក់សាំង៤០% ក្នុងចំណោមប្រជាពលរដ្ឋ ដែលត្រូវទទួលវ៉ាក់សាំងចំនួន១០លាននាក់។
ចុះផ្សាយនៅថ្ងៃ៖
ស្តាប់ - ០២:៣៩
តាមរយៈទំព័រហ្វេសប៊ុកផ្លូវការ លោកនាយករដ្ឋមន្ត្រី ហ៊ុន សែន បានថ្លែងអំណរគុណចំពោះប្រទេសចិន ដែលបានជួយផ្គត់ផ្គង់វ៉ាក់សាំងដល់កម្ពុជា ដែលធ្វើអោយកម្ពុជាឈានទៅសម្រេចបាននូវការចាក់វ៉ាកសាំង៤០% នៃចំនួនដែលត្រូវចាក់។ លោក ហ៊ុន សែន បញ្ជាក់ថា ប្រសិនបើកុំមានជំនួយឧបត្ថម្ភពីមិត្តចិនទេមកដល់ពេលនេះ កុំថាឡើយចាក់បាន ៤លាននាក់ សូម្បីតែ២០ម៉ឺននាក់ ក៏កម្ពុជាមិនអាចចាក់បានផង ហើយកម្ពុជាច្បាស់ជាកំពុងស្ថិតនៅក្នុងវិបត្តិអត់វ៉ាក់សាំង ដែលគ្មានច្រកចេញ។
ការថ្លែងបញ្ជាក់ដូច្នេះ គឺចំពេលដែលលោកផ្តល់រង្វាន់សំណាង ដល់អ្នកចាក់វ៉ាក់សាំងដូសទី៤លាន កាលពីថ្ងៃទី២៨ ខែមិថុនា បានទៅលើអតីតយុទ្ធជនពិការជើងឆ្វេងម្នាក់អាយុ ៦៥ឆ្នាំ នៅស្រុកបុទុមសាគរ ខេត្តកោះកុង ដោយទទួលបាននូវថវិកាឧបត្ថម្ភចំនួន ១០លានរៀល និងសម្ភារៈមួយចំនួនទៀត។
ជាការកត់សម្គាល់ ប្រទេសកម្ពុជាសម្រេចបានការចាក់វ៉ាក់សាំងលំដាប់ទី២ ក្នុងចំណោមប្រទេសអាស៊ានទាំង១០ ខណៈដែលប្រទេសសិង្ហបុរីជាប់ចំណាក់ថ្នាក់ទី១។
សូមបញ្ជាក់ថា តាមការគ្រោងទុកប្រទេសកម្ពុជាត្រូវការវ៉ាក់សាំងចំនួន ២០លានដូស ដើម្បីចាក់ជូនប្រជាពលរដ្ឋចំនួន ១០លាននាក់ ហើយវ៉ាក់សាំងនឹងត្រូវដឹកមកដល់ ប្រទេសកម្ពុជាគ្រប់ចំនួននៅត្រឹមខែសីហាខាងមុខ ហើយតាមការរំពឹងទុក ក្នុងអំឡុងពេលខែតុលា ឬខែវិច្ឆិកា កម្ពុជានឹងអាចចាក់វ៉ាក់សាំងជូនប្រជាពលរដ្ឋបានចំនួន ១០លាននាក់។ នេះបើតាមលោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ថ្លែងប្រាប់អ្នកកាសែតកាលពីថ្ងៃអាទិត្យ។
លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលបានប្រាប់វិទ្យុបារាំង RFI ថាការចាក់វ៉ាក់សាំងការពារកូវីដ-១៩ របស់កម្ពុជាមានល្បឿនលឿនមែនទែន ខណៈដែលការគ្រោងទុកតាមផែនការមេនឹងត្រូវបញ្ចប់នៅពាក់កណ្តាលឆ្នាំ២០២២ ឯណោះ។
សូមរំលឹកដែរថា មកដល់ពេលនេះ កម្ពុជាទទួលបានវ៉ាក់សាំងចំនួន ១១ ០២៤ ០០០ដូសហើយ ក្នុងនោះវ៉ាក់សាំង Covishield របស់ AstraZeneca ចំនួន ៣២៤ ០០០ដូស វ៉ាក់សាំង Sinopharm ចំនួន ៣,២លានដូស ក្នុងនោះ ២,២លានដូស ជាជំនួយរបស់ចិន និង១លានដូសទិញពីចិន។ វ៉ាក់សាំងប្រភេទ Sinovac ចំនួន ៧,៥លានដូស គឺជាការបញ្ជាទិញពីចិន។ ចំណែក ៩លានដូសទៀត នឹងមកដល់ជាបន្តបន្ទាប់ គឺនៅខែកក្កដា នឹងមកដល់ ៥លានដូស និងខែសីហា មកដល់៤លានដូសបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ