អាជ្ញាធរខេត្តព្រះសីហនុ កំពុងចាត់វិធានការលើមនុស្ស ៦នាក់ ដែលទិញលក់ប័ណ្ណចាក់វ៉ាក់សាំងខុសច្បាប់
អាជ្ញាធរខេត្តព្រះសីហនុ នៅព្រឹកថ្ងៃទី ២៥ខែមិថុនានេះ បាននាំខ្លួនមនុស្ស ៦នាក់ ទៅចាត់ការតាមនីតិវិធីច្បាប់ ក្នុងសំណុំរឿងទិញលក់ប័ណ្ណចាក់វ៉ាក់សាំង និងទម្រង់ពាក្យស្នើសុំចុះឈ្មោះចាក់វ៉ាក់សាំងបង្ការកូវីដ១៩។ អ្នកនាំពាក្យខេត្តព្រះសីហនុ បានប្រាប់វិទ្យុបារាំងអន្ដរជាតិ RFI ថា អាជ្ញាធរកំពុងតែសាកសួរ និងស៊ើបអង្កេតជុំវិញភាពមិនប្រក្រតីនេះ ដើម្បីស្រាវជ្រាវបន្តថាអាចមានអ្នកនៅពីក្រោយខ្នង ឬ ទេ?
ចុះផ្សាយនៅថ្ងៃ៖
ស្តាប់ - ០១:៥២
រដ្ឋបាលខេត្តព្រះសីហនុ នៅព្រឹកថ្ងៃទី ២៥ខែមិថុនានេះ បាននាំខ្លួនមនុស្សចំនួន ៦នាក់ដែលពាក់ព័ន្ធនឹងសកម្មភាពទិញលក់ប័ណ្ណចាក់វ៉ាក់សាំង និងទម្រង់ពាក្យស្នើសុំចុះឈ្មោះចាក់វ៉ាក់សាំងបង្ការជំងឺកូវីដ-១៩ យកទៅអធិការដ្ឋាននគរបាលក្រុងព្រះសីហនុ ដើម្បីសួរនាំ និងចាត់ការតាមនីតិវិធី។ លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានប្រាប់វិទ្យុបារាំង នៅថ្ងៃសុក្រនេះថា ការឈានទៅនាំខ្លួនមនុស្សទាំង ៦នាក់នេះ គឺបន្ទាប់ពីមានសេចក្តីរាយការណ៍ជាបន្តបន្ទាប់ពីប្រជាពលរដ្ឋ នៅក្នុងក្រុងព្រះសីហនុ កាលពេលកន្លងមក។
តាមលោក ឃាង ភារម្យ ជាបឋម មនុស្សទាំង ៦នាក់នេះ កំពុងស្ថិតក្រោមការស៊ើបអង្កេត ជុំវិញការបង្កភាពមិនប្រក្រតីដែលផ្ទុយនឹងច្បាប់នេះ ដើម្បីឱ្យដឹងថា តើមានមនុស្សប៉ុន្មាននាក់ ជាអ្នកលក់ និងមានប៉ុន្មាននាក់ជាអ្នកទិញ។ លោកឃាង ភារម្យ បញ្ជាក់ថា ប្រសិនបើរកឃើញថាមានកំហុសធ្ងន់ធ្ងរ នោះមនុស្សទាំង ៦នាក់នេះ នឹងត្រូវនគរបាលក្រុង បញ្ជូនសំណុំរឿងទៅចាត់ការតាមនីតិវិធីច្បាប់នៅតុលាការ។
អ្នកនាំពាក្យរដ្ឋបាលខេត្តព្រះសីហនុ អះអាងថា រាល់សកម្មភាពទិញលក់ប័ណ្ណចាក់វ៉ាក់សាំងបង្ការកូវីដ១៩ គឺជាទង្វើខុសច្បាប់ទាំងស្រុង ស្របពេលដែលរដ្ឋាភិបាលកម្ពុជា បានផ្តល់វ៉ាក់សាំងគ្រប់គ្រាន់សម្រាប់ចាក់ដល់ប្រជាពលរដ្ឋខ្មែរ និងជនបរទេស ដែលកំពុងរស់នៅ និងបំពេញការងារក្នុងខេត្តព្រះសីហនុ។ ដោយឡែក ចំពោះប័ណ្ណចាក់វ៉ាក់សាំង និងទម្រង់ពាក្យស្នើសុំចុះឈ្មោះចាក់វ៉ាក់សាំងបង្ការកូវីដ១៩ ក៏ត្រូវបានអាជ្ញាធរចុះចែកដល់ប្រជាពលរដ្ឋតាមលំនៅដ្ឋាន ដោយមិនគិតថ្លៃនោះទេ។ ដូច្នេះ រាល់សកម្មភាពទិញលក់បណ្ណនេះ គឺត្រូវចាត់ទុកថា ជាទង្វើឱកាសនិយម ដែលផ្ទុយនឹងច្បាប់ និងត្រូវចាត់វិធានការតាមនីតិវិធីច្បាប់។
សូមរម្លឹកជូនថា ខេត្តព្រះសីហនុ គឺជាខេត្តមួយ ក្នុងចំណោមខេត្តអាទិភាព ដែលរដ្ឋាភិបាលកម្ពុជា បានផ្តើមយុទ្ធនាការចាក់វ៉ាក់សាំងបង្ការកូវីដ ១៩ដល់ប្រជាពលរដ្ឋ កម្មករ និយោជិត និងជនបរទេស ក្រោយពេលខេត្តទេសចរណ៍មាត់សមុទ្រនេះ ក៏មានការផ្ទុះឡើងខ្លាំងនៅការឆ្លងជំងឺកូវីដ ១៩ ក្នុងព្រឹត្តិការណ៍សហគមន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ