អគ្គនាយកដ្ឋានគយ បើកឱ្យមានការនាំចូលសាច់បង្កក និងទំនិញបង្កកពីឥណ្ឌាឡើងវិញ
កម្ពុជានៅថ្ងៃអង្គារទី២២ មិថុនានេះ បានសម្រេចដកចេញបម្រាមនាំចូលសាច់បង្កក និងទំនិញបង្កកពីប្រទេសឥណ្ឌា នៅគ្រាដែលប្រទេសឥណ្ឌា មានស្ថានភាពធូរស្រាល និងការធ្វើតេស្តលើសាច់បង្កកនាំចូលពីឥណ្ឌាទាំងនោះ លទ្ធផលគឺមិនមានវីរុសកូវីដ១៩។ ការសម្រេចនេះធ្វើឡើង បន្ទាប់ពីបិទការនាំចូលសាច់បង្កកទាំងនេះ កាលពីដើមខែឧសភា ឆ្នាំ២០២១កន្លងទៅ ដោយមានការសង្ស័យថាប្រភេទសាច់បង្កក និងទំនិញបង្កកពីឥណ្ឌា គឺមានហានិភ័យក្នុងការចម្លងកូវីដ១៩មកកម្ពុជា ស្របពេលដែលឥណ្ឌាមានអ្នកឆ្លងកូវីដ១៩ប្រមាណពី ៣០ទៅ៤០ ម៉ឺននាក់ក្នុង១ថ្ងៃៗ។
ចុះផ្សាយនៅថ្ងៃ៖
ស្តាប់ - ០២:០៦
ការសម្រេចលើកលែងបម្រាមលើការនាំចូលសាច់បង្កក និងទំនិញបង្កកពីប្រទេសឥណ្ឌានេះ ធ្វើឡើងបន្ទាប់ពីបានពិនិត្យឃើញថា ស្ថានភាពនៃការឆ្លងរាលដាលជំងឺកូវីដ ១៩ នៅប្រទេសឥណ្ឌា មានភាពធូរស្រាល និងលទ្ធផលធ្វើតេស្តជាបន្តបន្ទាប់លើសាច់បង្កក និងទំនិញបង្កកនាំចូលពីប្រទេសឥណ្ឌាទាំងនោះ គឺអវិជ្ជមានវីរុសកូវីដ១៩ទាំងអស់។ នេះបើតាមសេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជានៅថ្ងៃទី១៩ មិថុនា ឆ្នាំ២០២១។
ជាមួយគ្នានេះ ចំពោះវិធានការបណ្តោះអាសន្ន ដែលបានដាក់ចេញរបស់អង្គភាពជំនាញនេះនាពេលកន្លងមកដោយតម្រូវឱ្យមានវិញ្ញាបនប័ត្រ ឬលិខិតបញ្ជាក់បន្ថែមចេញដោយអាជ្ញាធរមានសមត្ថកិច្ច នៃប្រទេសដើមកំណើតទំនិញ ដែលបញ្ជាក់ថា គ្មានវីរុសកូវីដ១៩លើសាច់បង្កក នៅពេលទំនិញមកដល់ និងត្រូវឱ្យយកសំណាកធ្វើតេស្តរកវីរុសកូវីដ១៩ ដោយវិទ្យាស្ថានប៉ាស្ទ័រកម្ពុជា មុននឹងអនុញ្ញាតឱ្យបំពេញបែបបទបញ្ចេញទំនិញពីគយនោះ។ ក៏នឹងត្រូវបន្ថូរបន្ថយ ឬដកចេញទាំងស្រុងដែរ ដោយយោងតាមពេលវេលា និងការវិវត្តជាក់ស្តែង ដែលផ្អែកលើស្ថានភាពធូរស្រាលនៃការរីករាលដាលកូវីដ ១៩ នៅប្រទេសនាំចេញ និងលទ្ធផលនៃការធ្វើតេស្តលើសាច់បង្កក ដោយវិទ្យាស្ថានប៉ាស្ទ័រកម្ពុជាបានរកឃើញជាបន្តបន្ទាប់ថា គ្មានវីរុសកូវីដ១៩។ នេះបើតាមសេចក្តីជូនដំណឹងដដែល។
ជាការបញ្ជាក់បន្ថែម ខ្លឹមសារនៃសេចក្តីជូនដំណឹងនេះ នឹងមានប្រសិទ្ធភាពចាប់ពីថ្ងៃទី២១ មិថុនាតទៅរហូតដល់មានការណែនាំជាថ្មីម្តងទៀត។
គួររម្លឹកជូនថា ការសម្រេចដកចេញបម្រាមនាំចូលសាច់បង្កក និងមុខទំនិញបង្កកពីប្រទេសឥណ្ឌាទាំងនេះ ក៏ជាការឆ្លើយតបនឹងសំណើរបស់លោកស្រី Devyani Khobragade ឯកអគ្គរដ្ឋទូតឥណ្ឌាប្រចាំកម្ពុជា នាជំនួបជាមួយរដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន។ ដែលកាលពីថ្ងៃទី៣ ខែមិថុនាកន្លងទៅ ឯកអគ្គរដ្ឋទូតឥណ្ឌាប្រចាំកម្ពុជារូបនេះ បានស្នើឱ្យកម្ពុជាដកចេញការហាមឃាត់លើការនាំចូលសាច់បង្កក និងទំនិញបង្កកផ្សេងៗទៀតពីប្រទេសឥណ្ឌា បន្ទាប់ពីវិទ្យាស្ថានប៉ាស្ទ័រកម្ពុជាបានប្រមូល និងធ្វើតេស្ដគំរូ លើសាច់បង្កកទាំងនោះថា គ្មានកូវីដ១៩ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ