សារព័ត៌មានរដ្ឋវៀតណាមថា ពលរដ្ឋខ្លួនដែលរស់នៅលើទឹក ព្រមអនុវត្តតាមបទបញ្ជារបស់អាជ្ញាធរកម្ពុជា
សារព័ត៌មានរដ្ឋរបស់វៀតណាម កាលពីថ្ងៃអាទិត្យម្សិលមិញ បានផ្សាយថាពលរដ្ឋខ្មែរវៀតណាម ដែលរស់នៅលើផ្ទៃទឹកទន្លេនៅកម្ពុជា គឺពួកគេព្រមអនុវត្តតាមបទបញ្ជារបស់អាជ្ញាធរកម្ពុជា។ អាជ្ញាធរកម្ពុជា ដែលបានដាក់កំហិតឲ្យជនអន្តោប្រវេសន៍ទាំងនោះ ចាកចេញពីផ្ទៃទឹកឲ្យអស់ត្រឹមរយៈពេល៧ថ្ងៃ ដោយសារតែការរស់នៅបែបនេះរាប់សិបឆ្នាំមកនោះ បានបំពុលបរិស្ថានយ៉ាងធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០១:៤២
នៅក្នុងអត្ថបទក្រោមចំណងជើងថា ជនជាតិខ្មែរ-វៀតណាម គោរពតាមសេចក្តីជូនដំណឹងស្តីពីការផ្លាស់ប្តូរទីលំនៅអណ្តែតទឹក ទីភ្នាក់ងារសារព័ត៌មានរដ្ឋវៀតណាម VNA បានផ្សាយថា ប្រជាជនកម្ពុជាជិត ១.០០០ គ្រួសារ ដែលមានដើមកំណើតវៀតណាមបានធ្វើតាមសេចក្តីជូនដំណឹងរបស់អាជ្ញាធររាជធានីភ្នំពេញ កាលពីថ្ងៃទី២ ខែមិថុនា ស្តីពីការផ្លាស់ប្តូរទីតាំងផ្ទះអណ្តែតទឹក និងក្បូនចិញ្ចឹមត្រី តាមបណ្តោយទន្លេសាបក្នុងរយៈពេល៧ថ្ងៃ។
បើតាមកាសែតផ្លូវការរបស់រដ្ឋវៀតណាមដដែលនេះ ប្រជាជនខ្លួនដែលភាគច្រើនរកស៊ីចិញ្ចឹមជីវិតដោយការនេសាទ និងចិញ្ចឹមត្រី នៅក្នុងខណ្ឌច្បារអំពៅ និងខណ្ឌព្រែកព្នៅ ក្នុងចំណោមទីតាំងផ្សេងទៀត គឺពួកគេបានរុះរើផ្ទះក្បូនរបស់ពួកគេ ចាប់តាំងពីថ្ងៃទី១១ និង ១២ខែមិថុនា ដោយរង់ចាំទៅរស់នៅទីតាំងថ្មី។
យ៉ាងណាក៏ដោយ គេមិនទាន់ដឹងថា ប្រជាជនវៀតណាមទាំងនោះទៅរស់នៅទីណានៅឡើយ ខណៈអាជ្ញាធរខេត្តកណ្តាល ដែលនៅជាប់តាមដងទន្លេមេគង្គ និងទន្លេសាប បានដាក់ពង្រាយកម្លាំង តាមឃ្លាំមើលទូករបស់វៀតណាមទាំងនោះមិនឲ្យចូលចតនៅក្នុងភូមិសាស្ត្ររបស់ខ្លួនឡើយ។
តែបើតាមទីភ្នាក់ងារសារព័ត៌មានវៀតណាមដដែល ពាក់ព័ន្ធនឹងបញ្ហានេះ គណៈកម្មាធិការកិច្ចការបរទេសនៃក្រសួងការបរទេសវៀតណាម បានពិភាក្សាជាមួយភាគីកម្ពុជា ដោយស្នើឲ្យកម្ពុជាបង្កើតលក្ខខណ្ឌអំណោយផល និងចាត់វិធានការគាំទ្រជាក់ស្តែងសម្រាប់ក្រុមនេះ ដើម្បីតាំងទីលំនៅថ្មី និងធានាផលប្រយោជន៍ស្របច្បាប់របស់ពួកគេ។
ចំណែកឯសមាគមវៀតណាមប្រចាំកម្ពុជាវិញ តាមរយៈសេចក្តីប្រកាសនៅថ្ងៃទី១៣ មិថុនា បានប្រាប់មិនឲ្យប្រជាជនខ្លួនវិលត្រឡប់ទៅប្រទេសវៀតណាមនៅពេលនេះទេ ដោយសំអាងថា ច្រកទ្វារព្រំដែនប្រទេសទាំងពីរ ត្រូវបានបិទដោយសារតែ ស្ថានភាពនៃការរីករាលដាលជំងឺកូវីដ-១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ