អ្នកជំនាញថាសេដ្ឋកិច្ចកម្ពុជាអាចពិបាកងើបឡើងវិញ ប្រសិនបើព្រឹត្តិការណ៍២០កុម្ភៈអូសបន្លាយដល់ត្រីមាសទី៣
សេដ្ឋកិច្ចកម្ពុជាអាចនឹងពិបាកងើបឡើងវិញ ឬមានកំណើន០% ប្រសិនបើព្រឹត្តិការណ៍សហគមន៍២០កុម្ភៈនៅបន្តអូសបន្លាយរហូតដល់ខែកញ្ញា ឬត្រីមាសទី៣នៃឆ្នាំ២០២១។ នេះបើតាមការព្យាករណ៍ពីសំណាក់លោកបណ្ឌិត គី សិរីវឌ្ឍន៍ អ្នកជំនាញផ្នែកសេដ្ឋកិច្ច ប្រាប់វិទ្យុបារាំងអន្តរជាតិនៅព្រឹកថ្ងៃអាទិត្យទី១៣នេះ។ តាមលោក គី សិរីវឌ្ឍន៍ ការឈានទៅបិទបញ្ចប់បាននូវព្រឹត្តិការណ៍សហគមន៍២០កុម្ភៈ ជារឿងសំខាន់ ដែលអាចស្តារសេដ្ឋកិច្ចកម្ពុជាមកវិញ។
ចុះផ្សាយនៅថ្ងៃ៖
ស្តាប់ - ០១:៥៨
រយៈពេលជាង៤ខែដែលព្រឹត្តិការណ៍ឆ្លងជំងឺកូវីដ-១៩ សហគមន៍២០កុម្ភៈបន្តអូសបន្លាយ បានធ្វើឲ្យសេដ្ឋកិច្ចកម្ពុជាហាក់នៅចំណុចមួយដែលមិនទាន់អាចងើបឡើងមកវិញបាន។ លោក គី សិរីវឌ្ឍន៍ ប្រធានមជ្ឈមណ្ឌលសិក្សាចិននៃរាជបណ្ឌិតសភាកម្ពុជា បានលើកឡើងថា សេដ្ឋកិច្ចកម្ពុជានៅក្នុងឆ្នាំ២០២១ស្ថិតក្នុងសភាពមួយត្រដងត្រសងនឹងសេដ្ឋកិច្ចកម្ពុជាកាលពីឆ្នាំ២០២០ នៅពេលជំងឺកូវីដ-១៩ចាប់ផ្តើមវាយលុក។ ការអះអាងដូច្នេះ ក៏ព្រោះតែវិស័យសេវាកម្ម និងវិស័យសហគ្រាសធុនតូចនិងមធ្យមកម្ពុជា នៅមិនទាន់អាចកំរើកបាននៅឡើយ។
ទោះជាយ៉ាងនេះក្តី អ្នកជំនាញផ្នែកសេដ្ឋកិច្ចរូបនេះ លើកឡើងដែរថា ការនាំចេញនូវផលិតផលកសិកម្មមួយចំនួនរបស់កម្ពុជាទៅកាន់ទីផ្សារអន្តរជាតិនៅឆ្នាំ២០២១នេះ ជាការជំនួសបានមកវិញនិងទ្រទ្រង់នូវលំហូរសេដ្ឋកិច្ចកម្ពុជា ដែលកកស្ទះលើការនាំចេញផលិតផលក្នុងវិស័យកាត់ដេរ និងឧស្សាហកម្ម។
បើតាមលោក គី សិរីវឌ្ឍន៍ សេដ្ឋកិច្ចកម្ពុជានឹងមានសញ្ញាណល្អមកវិញ ប្រសិនបើព្រឹត្តិការណ៍ឆ្លងជំងឺកូវីដ១៩ជាសហគមន៍នៅកម្ពុជាបានបញ្ចប់ជាស្ថាពរ។ ពោលគឺប្រសិនបើព្រឹត្តិការណ៍សហគមន៍អាចបញ្ចប់ត្រឹមខែមិថុនា នោះកម្ពុជានឹងមានពេលវេលាល្អមួយ ក្នុងការស្តារសេដ្ឋកិច្ចខ្លួនត្រលប់មករង្វង់១ទៅ២%។ តែក្នុងករណីអូសបន្លាយដល់ត្រីមាសទី៣ ឬខែកញ្ញា នោះកម្ពុជានឹងមានពេលវេលាតិចតួចក្នុងការស្តារសេដ្ឋកិច្ចឡើងវិញ។
កាលពីចុងខែឧសភាកន្លងទៅនេះ ធនាគារអភិវឌ្ឍន៍អាស៊ីADB បានព្យាករថាសេដ្ឋកិច្ចកម្ពុជាអាចមានកំណើន៤%នៅឆ្នាំ២០២១ និង៥.៥%នៅឆ្នាំ២០២២ខាងមុខ។ ស្រដៀងគ្នានេះ មូលនិធិរូបិយវត្ថុអន្តរជាតិ IMF ក៏ធ្លាប់ព្យាករថា សេដ្ឋកិច្ចកម្ពុជាអាចមានកំណើនក្នុងរង្វង់ប្រមាណ៤.២%នៅឆ្នាំ២០២១ និង៦%នៅឆ្នាំ២០២២។ បើតាមស្ថាប័នអន្តរជាតិទាំង២នេះ កំណើនសេដ្ឋកិច្ចងើបឡើងវិញ គឺដោយសារតែសេដ្ឋកិច្ចនៅក្នុងតំបន់ពិភពលោក ជាពិសេស ប្រទេសធ្វើពាណិជ្ជកម្មជាមួយកម្ពុជា បានងើបឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ