យុទ្ធនាការចាក់វ៉ាក់សាំងដោយកងទ័ពគ្រោងបញ្ចប់នៅថ្ងៃ២០មិថុនា ហើយនឹងបន្តទៅខេត្តចំនួន៥ទៀត
យុទ្ធនាការចាក់វ៉ាក់សាំងប្រឆាំងកូវីដ១៩នៅរាជធានីភ្នំពេញ ដោយក្រុមកងទ័ព គ្រោងនឹងបិទបញ្ចប់នៅថ្ងៃទី២០មិថុនា ខាងមុខនេះ ខណៈយុទ្ធនាការរយៈពេលជិត២ខែមកនេះ កងទ័ពចាក់ជូនពលរដ្ឋសម្រេចបានជិត១លាននាក់។ ក្រោយបិទបញ្ចប់យុទ្ធនាការចាក់វ៉ាក់សាំងនៅភ្នំពេញ កងទ័ពគ្រោងបើកយុទ្ធនាការដូចគ្នានេះនៅក្នុងខេត្តចំនួន៥ទៀតជាអទិភាព។
ចុះផ្សាយនៅថ្ងៃ៖
ស្តាប់ - ០១:៥០
ខេត្តចំនួន៥ដែលជាគោលដៅអទិភាពក្នុងការបើកយុទ្ធនាការចាក់វ៉ាក់សាំងដោយកម្លាំងកងទ័ព នៅពេលខាងមុខនេះ គឺមានខេត្តព្រះសីហនុ កំពង់ស្ពឺ កំពង់ឆ្នាំង កំពង់ចាម និងស្វាយរៀង។ នេះបើតាមនាយឧត្តមសេនីយ៍ ឥត សារ៉ាត់ នាយសេនាធិការចម្រុះនៃកងក័ងយុទ្ធពលខេមរភូមិន្ទ និងជាប្រធានក្រុមការងារខាងកងទ័ពទទួលបន្ទុកការចាក់វ៉ាក់សាំង។
នៅក្នុងខេត្តចំនួន៥នេះ គឺមានប្រជាពលរដ្ឋជាង១លាននាក់ ដែលត្រូវចាក់វ៉ាក់សាំងប្រឆាំងកូវីដ១៩ ក្នុងនោះកម្លាំងកងទ័ពត្រូវចាក់ជូនប្រជាពលរដ្ឋជាង៨០ម៉ឺននាក់ ហើយក្រៅពីនោះគឺជាភារកិច្ចរបស់មន្ទីរសុខាភិបាលខេត្ត។
បើតាមក្រសួងការពារជាតិកម្ពុជា គិតត្រឹមថ្ងៃទី១២ ខែមិថុនា ឆ្នាំ២០២១នេះ ការចាក់វ៉ាក់សាំងការពារជំងឺកូវីដ១៩ លើកទី១ ជូនកងទ័ព គ្រួសារកងទ័ព និងប្រជាពលរដ្ឋ បានចំនួនសរុប ១,៣០៤,២៤៥នាក់ ក្នុងនោះចាក់នៅតំបន់ក្រហមបានចំនួន ៩៩៣,៩០២នាក់ ខណៈការចាក់លើកទី២ បានចំនួន ១,១២០,៥៤៨នាក់។
ខណៈវ៉ាក់សាំងការពារកូវីដ១៩ ចំនួន១លានដូសទៀត បានដឹកមកដល់កម្ពុជាកាលពីថ្ងៃសៅរ៍ ទី១២ ខែមិថុនា ប្រមុខរដ្ឋាភិបាលកម្ពុជា បានអះអាងថា យុទ្ធនាការចាក់វ៉ាក់សាំងជូនដល់ប្រជាពលរដ្ឋនេះ នឹងធ្វើឲ្យបានលឿន តាមដែលអាចធ្វើទៅបាន។
ទន្ទឹមនឹងនេះ រដ្ឋាភិបាលអះអាងថាខ្លួនក៏ស្វះស្វែងរកវ៉ាក់សាំងមកបន្ថែមទៀតដែលគិតត្រឹមថ្ងៃទី១២ ខែមិថុនា កម្ពុជាទទួលបានវ៉ាក់សាំងជាង៨លានដូសរួចហើយ។ វ៉ាក់សាំងកូវីដ១៩ ដែលកំពុងទទួលបាន ហើយកំពុងដំណើរការជូនប្រជាពលរដ្ឋនេះ គឺភាគច្រើនបំផុតជារបស់ប្រទេសចិន។
បើតាមរដ្ឋាភិបាលកម្ពុជា ផែនការចាក់វ៉ាក់សាំងជូនប្រជាពលរដ្ឋអាយុចាប់ពី ១៨ឆ្នាំឡើង ប្រមាណ១៣លាននាក់ ត្រូវចាក់វ៉ាក់សាំងប្រមាណ២៦លានដូស ក្នុងនោះប្រជាពលរដ្ឋចំនួន ១០លាននាក់ នឹងទទួលបានវ៉ាក់សាំងនៅក្នុងឆ្នាំ២០២១នេះ ឬយ៉ាងយូរបំផុតនៅដើមឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ