លោក ទៀ បាញ់៖ អនុរដ្ឋមន្ត្រី Sherman ពោលពាក្យ១ចំនួនខុសឆ្ងាយណាស់ រឿងរ៉ាវនៅសមុទ្ររាម
លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជា បានថ្លែងថា អំឡុងពេលជួបជាមួយលោកនាយករដ្ឋមន្ត្រី ហ៊ុន សែន កន្លងទៅនេះ អនុរដ្ឋមន្ត្រីការបរទេសអាមេរិកលោកស្រី Wendy Serman បានពោលពាក្យមួយចំនួនខុសឆ្ងាយណាស់ ជុំវិញរឿងរ៉ាវនៅសមុទ្ររាម។ ការលើកឡើងរបស់លោក ទៀ បាញ់ ដូច្នេះធ្វើឡើងខណៈដែលលោកធ្វើជាអធិបតីនៃពិធីនាំយកដំណក់ប្រេងដំបូងរបស់កម្ពុជាទៅតម្កល់ទុក នៅវិមានឈ្នះ ឈ្នះ នាព្រឹកថ្ងៃពុធនេះ។
ចុះផ្សាយនៅថ្ងៃ៖
ស្តាប់ - ០២:១៣
ជុំវិញភាពមន្ទិលដែលថាប្រទេសកម្ពុជាបានអនុញ្ញាតផ្តាច់មុខឲ្យចិនដាក់មូលដ្ឋានកងទ័ពនៅកំពង់ផែរាម នៃខេត្តព្រះសីហនុ និងមានការស្នើសុំទៅពិនិត្យមើលជាក់ស្តែងនៅទីនោះ លោក ទៀ បាញ់ រដ្ឋមន្ត្រីការពារជាតិកម្ពុជា បានបញ្ជាក់ថាលោកកំពុងទុកឲ្យក្រុមការងារក្រសួងការពារជាតិរៀបចំ តែមិនអាចបញ្ជាក់បានទេថា ដំណើទស្សនកិច្ចរបស់អនុព័ន្ធយោធាអាមេរិកទៅកាន់កំពង់ផែរាម នៅពេលណានោះទេ។
នៅក្នុងដំណើរទស្សនកិច្ចរយៈពេលខ្លីនៅកម្ពុជា កាលពីថ្ងៃទី១ ខែមិថុនាកន្លងទៅនេះ លោកស្រី Wendy Sherman អនុរដ្ឋមន្ត្រីការបរទេសសហរដ្ឋអាមេរិក បានស្នើទៅលោកនាយករដ្ឋមន្ត្រី ហ៊ុន សែន ដើម្បីអនុញ្ញាតឲ្យអនុព័ន្ធយោធាអាមេរិកប្រចាំនៅកម្ពុជា បានចុះទៅមើលជាក់ស្តែងតំបន់កំពង់ផែរាម។ សំណើរនេះ ត្រូវបានយល់ព្រមភ្លាមៗពីលោកនាយករដ្ឋមន្ត្រី។
ក៏ប៉ុន្តែ លោក ទៀ បាញ់ នៅក្នុងកម្មវិធីថ្ងៃនេះ សុំការយោគយល់ពីអ្នកសារព័ត៌មាន ថាមិនអាចបញ្ជាក់ពីកាលបរិច្ឆេទ ម៉ោងពេល និងអ្នកចូលរួមបានទេ។ លោកថា ការប្រកាសមុនក្តុងក្តាំងពីកាលបរិច្ឆេទ អាចមានការខកចិត្តពីភាគីអាមេរិក ដូរចិត្តលែងទៅមើលវិញ និងជាការខកការឯកភាពតាមការសន្ទនារវាងលោកនាយករដ្ឋមន្ត្រី ហ៊ុន សែន និងអនុរដ្ឋមន្ត្រីការបរទេសអាមេរិក។
ទោះយ៉ាងណា លោក ទៀ បាញ់ បញ្ជាក់ថា មិនមានរឿងអ្វីចម្លែកនោះទេ ក្នុងការចុះទៅពិនិត្យមើលកំពង់ផែរាម នៅពេលនេះ ដោយសារអាមេរិកធ្លាប់ចុះទៅមើលម្តងហើយ កាលពីពេលកន្លងទៅ។ លោកថា មិនបានតាមបំណងប្រាថ្នារបស់គេ គេមិនទទួលយកទេ។
សូមរំលឹកថា កាសែតអាមេរិក The Wall Street Journal កាលពីខែកក្កដា ឆ្នាំ២០១៩ បានសរសេរនៅក្នុងអត្ថបទរបស់ខ្លួន ដោយមានការចោទប្រកាន់ថា កម្ពុជាបើកដៃឱ្យប្រទេសចិនដាក់មូលដ្ឋានទ័ពនៅសមុទ្ររាម។
ក៏ប៉ុន្តែបញ្ហានេះ ត្រូវបានបដិសេធ ដោយលោកនាយករដ្ឋមន្រ្តី ហ៊ុន សែន ជាច្រើនលើកច្រើនសារ ព្រមទាំងចាត់ទុកថាជាព័ត៌មានប្រឌិត ដែលជាចេតនាអាក្រក់បំផុតប្រឆាំងនឹងកម្ពុជា ដោយសារការអនុញ្ញាតឲ្យបរទេសដាក់ទ័ពនៅកម្ពុជា គឺផ្ទុយនឹងរដ្ឋធម្មនុញ្ញរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ