អង្គការអន្តរជាតិអំពាវនាវឲ្យអាជ្ញាធរបន្តស៊ើបអង្កេតករណីបាត់ខ្លួនសកម្មជនថៃនៅកម្ពុជា
អង្គការសិទ្ធិមនុស្សអន្តរជាតិ Human Right Watch និងអង្គការលើកលែងទោសអន្តរជាតិ Amnesty International បន្តអំពាវនាវឲ្យអាជ្ញាធរកម្ពុជាបើកការស៊ើបអង្កេតស៊ីជម្រៅ និងឯករាជ្យមួយជុំវិញករណីបាត់ខ្លួនសកម្មជនថៃនៅកម្ពុជា។ ការអំពាវនាវជាថ្មីម្តងទៀតនេះ ធ្វើឡើងបន្ទាប់ពីករណីបាត់ខ្លួនលោក វ៉ាន់ឆាលឺម សាត់ស័ក្តិសិទ្ធ បានអូសបន្លាយរយៈពេលមួយឆ្នាំ និងមិនមានបង្ហាញតម្រុយស៊ើបអង្កេតណាមួយនៅឡើយ។
ចុះផ្សាយនៅថ្ងៃ៖
ស្តាប់ - ០២:៥០
សេចក្តីប្រកាសព័ត៌មានពីទីក្រុងញ៉ូយ៉ក នៅថ្ងៃសុក្រម្សិលមិញនេះ អង្គការ Human Right Watch បានលើកឡើងថា អាជ្ញាធរកម្ពុជាបានបរាជ័យក្នុងការស៊ើបអង្កេតស៊ីជម្រៅនៃការបាត់ខ្លួនរបស់សកម្មជនប្រជាធិបតេយ្យថៃ លោក វ៉ាន់ឆាលឺម សាត់ស័ក្តសិទ្ធ ហើយរដ្ឋាភិបាលថៃក៏មិនបានរួមចំណែកធំណាមួយក្នុងការសហការដំណើរការស៊ើបអង្កេត។
លោក Brad Adams នាយកប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស Human Rights Watch បានថ្លែងថា អាជ្ញាធរនៃប្រទេសទាំងពីរហាក់ដូចជាយឺតយ៉ាវក្នុងការស៊ើបអង្កេត ទោះបីជាការចាប់ពង្រត់កើតឡើងនៅពេលថ្ងៃនិងមានសាក្សីជាច្រើននាក់បានឃើញក៏ដោយ។
ជាមួយគ្នានេះ អង្គការ Amnesty International បានអះអាងថាខ្លួនបានផ្ញើលិខិតចំហរមួយទៅកាន់ព្រះរាជអាជ្ញាថៃពីការខកខាននៃការស៊ើបអង្កេតរបស់អាជ្ញាធរកម្ពុជា និងទទូចឲ្យមានការស៊ើបអង្កេតជាផ្លូវការ។ បើតាមលោកស្រី Ming Yu Hah អនុប្រធានប្រចាំតំបន់នៃអង្គការលើកលែងទោសអន្តរជាតិ បានលើកឡើងនៅក្នុងសេចក្តីប្រកាសព័ត៌មានខ្លួនថា ការខកខានជាប្រចាំរបស់អាជ្ញាធរកម្ពុជាក្នុងការស៊ើបអង្កេតអំពីការបាត់ខ្លួនដោយបង្ខំរបស់លោកវ៉ានឆាលឺម គឺជាការរំលោភលើកាតព្វកិច្ចសិទ្ធិមនុស្សអន្តរជាតិរបស់កម្ពុជា។
អង្គការ Amnesty International ជំរុញឲ្យគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (AICHR) ឱ្យមានតួនាទីកាន់តែសកម្មថែមទៀតក្នុងការសម្របសម្រួលកិច្ចសហប្រតិបត្តិការរវាងប្រទេសអាស៊ានទាំងអស់ ដើម្បីស្វែងរកជនរងគ្រោះដែលបានបាត់ខ្លួននៅក្នុងតំបន់អាស៊ីអាគ្នេយ៍។
ពាក់ព័ន្ធនឹងបញ្ហានេះ លោក ខៀវ សុភ័គ រដ្ឋលេខាធិការ និងជាអ្នកនាំពាក្យក្រសួងមហាផ្ទៃ បានប្រាប់វិទ្យុបារាំងអន្តរជាតិនៅព្រឹកថ្ងៃសៅរ៍នេះថា នៅមិនមានទាន់តម្រុយណាមួយជាក់លាក់ពីការបាត់ខ្លួនសកម្មជនប្រជាធិបតេយ្យថៃ លោកវ៉ាន់ឆាលឺម សាត់ស័ក្តិសិទ្ធ នៅក្នុងប្រទេសកម្ពុជានៅឡើយ ក៏ប៉ុន្តែរយៈពេលមួយឆ្នាំ អាជ្ញាធរនៅតែបន្តតាមដានស៊ើបអង្កេតជុំវិញករណីនេះ។ បើតាមលោកខៀវ សុភ័គ អង្គការអន្តរជាតិណាដែលមានតម្រុយច្បាស់លាស់ គួរណាសហការផ្តល់ដំណឹងមកអាជ្ញាធរដើម្បីស៊ើបអង្កេត។
សូមបញ្ជាក់ជូនថា លោកវ៉ាន់ឆាលឺម សាត់ស័ក្តសិទ្ធ ជាសកម្មជនប្រជាធិបតេយ្យថៃ ដែលហ៊ានរិះគន់វាយប្រហារដោយចំៗទៅលើរដ្ឋាភិបាលថៃដឹកនាំដោយលោកនាយករដ្ឋមន្ដ្រី ប្រាយុទ្ធ ចាន់អូឆារ។ ក្រោយរដ្ឋប្រហារថ្ងៃទី២២ឧសភាឆ្នាំ២០១៤នៅប្រទេសថៃ លោកវ៉ាន់ឆាលឺមបានភៀសខ្លួនទៅកាន់ប្រទេសឡាវ និងក្រោយមកមកកាន់កម្ពុជា ដើម្បីគេចពីរឿងក្ដីក្ដាំចោទប្រកាន់ដោយរដ្ឋាភិបាលថៃ ទាក់ទងនឹងបទល្មើសប្រមាថព្រះមហាក្សត្រ និងបទឧក្រិដ្ឋតាមប្រព័ន្ធកុំព្យូទ័រ។
តាមរយៈវីដេអូដែលទទួលបានពីកាំមេរ៉ាសុវត្ថិភាព លោក វ៉ាន់ឆាលឺម សាត់ស័ក្តសិទ្ធ ត្រូវបានមនុស្សមួយក្រុមចាប់បង្ខំឲ្យចូលក្នុងរថយន្តហាយលែនឌឺ នាល្ងាចថ្ងៃព្រហស្បតិ៍ទី០៤មិថុនាឆ្នាំ២០២០ ក្នុងពេលដែលលោកវ៉ាន់ឆាលឺមកំពុងទិញអាហារនៅទល់មុខអគារខុនដូដែលលោកស្នាក់នៅក្នុងខណ្ឌជ្រោយចង្វារ រាជធានីភ្នំពេញ។
ហើយនៅថ្ងៃសុក្រម្សិលមិញ យុវជនមួយក្រុមរួមទាំងបងស្រីរបស់វ៉ាន់ឆាលឺម សាត់ស័ក្តសិទ្ធ បានប្រមូលផ្តុំគ្នានៅមុខក្រសួងយុត្តិធម៌ថៃ ដើម្បីស្វែងរកព័ត៌មានបន្ថែមពីការបាត់ខ្លួនរបស់ប្អូនប្រុស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ